الموضوع: حدثني عن نفسك...احكي تاريخك المهني وازاي وصلت لمنصبك

تستحملو رخامتي شوية
=====
أنا إشتغلت مع والدي من وأنا في إعدادي
والدي مهندس كهربا .. كان بيشتغل الصبح في مصنع .. وبعد الظهر كان بيصلح أجهزة تكييف وتبريد
الحمد لله عندي خبرة شوية في مجال التكييف والتبريد
...
دخلت الجامعة .. حولت من طب لــــ صيدلة لأسباب يطول شرحها
وإشتغلت في صيدلية إبن عمي
وإشتغلت سنتين تلاتة في صيدليات
الحج ربنا كرمه .. وصرفو فلوس متأخرة ليهم في الشغل
إداني مبلغ صغير أوي .. أفتح بيه الصيدلية
المبلغ كان أقل بصراحة إنه يفتح ربع صيدلية

وفتحت
كان معايا العربية بتاعت الحج

.
كنت في الصيدلية 24 ساعة في اليوم اول مافتحت
قايم نايم فيها
طول النهار فيها واقف ... وباليل أقفل الباب القزاز
وأفرش فيها وأنام
الصيدلية راس مالها إتضاعف حوالي 3 مرات في سنتن


إلى أن
حصل مشكلة مشابه لأحمد(سكرين بلاي)
المجال دخل فيه الي يفهم وإلي مايفهمش

البلد الي انا فاتح فيها كنت انا الصيدلية رقم 4
حلال 4 سنين
الـــ 4 صيدليات بقوا 9

الشغل إتنيل بنيلة

شغل الحكومة مش جايب حتى مصاريفه
وشغل الصيدلية في النازل بسبب كترة الصيدليات .. والاطباء الي في البلد سابوها ومشيو
والوضع بقا معكوك
وخصوصا بعد الثورة
بيع المخدرات في الصيدليات التانية بقا على ودنه

حتى اعرف طبيب المفروض انه محترم..فتح لمراته الصيدلانية .. صيدلية
وبيشفر الروشتات لها .. وبقدرة قادر كانت روشتاته بــ 20-30 ج
بقت 100-150 ج
وبيجبر الناس تروح لصيدلية مراته بالاسم

المهنة بقت من سئ لأسواء
والحمد لله دلوقتي

قصة الفشل في الشغل وصلت للنهاية
وعرضتها للبيع
ولو لقيت حد ياخدها


هشتغل في مجال تاني
قدامي كام فكرة مطروحة ... محل إكسسوار عربيات ضخم (يعني يكون على مستوى جووو كار أو خلافه )
يكون في الزقازيق أو أي عاصمة لمحافظة... والفكرة فيه اني بحب العربيات .. والحمد لله المنتدى فيه رجالة فيكل محافظات مصر .. ممكن تقف جمبي .. او تشتري مني كمالياتها .. أو تعرف اصحابها بالمحل
اكسسوار العربيات بيكسب مكاسب خيالية ..
انا جربت بنفسي وشوفت الاسعار الجملة .. وعارف سعر المستهلك صاحب العربية بياخدها بكام



.
وقدامي اكتر من فكرة تانية

خلاصة المرحلة

إن المصريين شعب بيقلد
والي له والي مالوش في أي حاجة ... بيعملها

اي مشروع ينجح .. تلاقي الكل بشتغل فيه وبغباء
والناتج ان الكل بيخسر في الأخر

ده انا حتى فتحت محل اكسسوار .. مكملش شهر واحد وكان مفتوح زيه بنفس الديكور كمان .. 3 محلات


.
غباء المصريين مابيديش اي فرصة لاي حد بالتميز


وادينا بنقضي أيامنا