الموضوع: تقرير استلام متواضع .. رينو لوجان اوتو

الباركينج سينسور اشتريه من التوكيل و ركبه لأنك لو ركبته بره الضمان بتاع الضفيرة هيلغوه و أى حاجة كهربا مش هتبقى تحت الضمان و ألف مبروك يا سيدى

تقرير رائع

الف مبروك و ربنا يبارك فيها

يا باشا الف مبروك عليك اللوجان .... و هي فعلا سواقة محترمة لا تمت للقيادة البلاستيكية الشهيرة بصلة و الحمد لله ...... انا لوجاناوي من سنة فاتت و باقولك اصبر شوية و انت تحفظ ابعادها و ما تحتاجش باركنج سنسورز و لا غيره .... العربية دي مثال للعربيات الفلتة المحترمة التي ينعم بها الله علي عباده اللي خد منهم الكوري راقات ... فعلاااااااااااا الاوروبي غيييييييييييييير .... مبروك مرة تانية ....

الف مبروك وربنا يباركلك فيها ويعطيك خيرها ويكفيك شرها وتقرير رائع
ولنا عودة للموضوع ان شاء الله علشان نتعرف اكتر على اللوجان الاوتو

المشاركة الأصلية كتبت بواسطة كوباية شاى

الراجل قالى انت كنت مستعجل فملحقناش نطلع الورق و هاروحلة بعد بكرة علشان اخد الورق و ارخص ان شاء الله .. ادانى ورقة كدة من المعرض انى مستلم العربية و ختمها بختم المعرض و قالى لو وقفت فى مرور ولا حاجة دى هتعديك !

نفس الكلام عند معظم الموزعين زمفيش مشكلة

المشاركة الأصلية كتبت بواسطة كوباية شاى

سميت الله و طلعت ادور على اول بنزينة .. مبدئيا كدة الباور تقيل فعلا .. انا متعود على السيراتو فيمكن دة السبب اللى محسسنى انة تقيل .. هو حلو اوى بعد 80 بس فى السرعات القليلة و المناورة فى الزحمة تقيل.

كلامك مضبوط, بس فعلا التعود بيفرق بالإحساس بيه, عشان حضرتك كنت ؤاكب سيراتو هتحس إنه تقيل , لاكن مثلا أنا كنت راكب مازدا ٣٢٣ مو ٨٣ فطبعا كان البنسبالى ناااااعم. عموما زي محضرتك قوت هو جميل جدا في السرعة.

المشاركة الأصلية كتبت بواسطة كوباية شاى

تانى ملاحظة العربية طلعتها بطيئة .. مش بطة بس مش سريعة .. يعنى لازم تزود بنزين سنتين تلاتة علشان تطلع على سرعة معقولة .. طبعا انا لسة مكملتش 100 كيلو فا يمكن دة بيتحسن بعدين

فولت حوالى 45 لتر لحد الزور .. يعنى كان فيها حوالى 5 لتر. و الكاوتش كان على 40 عملتة 32 قدام و 30 ورا زى ما قريت هنا .. الواد بتاع البنزينة قالى كدة غلط كلة لازم يبقى زى بعضة .. قولتلة اعمل اللى بقولك علية و خلاص.

متقلقش هتتحسن مع التليين وكمان إنت هتتعود على دواسة البنزين وده عن تجربة بعد ما وصلت ل ١٠٠٠ كم وشويه. وعلى فكرة العربيات الأوروبي معظمها كده في الأوتو.

على فكرة التانك كان فيه أكتر من ٥ لتر على كده, لأنه ٥٠ لتر من غير الإحتياطي. دوه كانو كرمه معاك أول على كده هههه

المشاركة الأصلية كتبت بواسطة كوباية شاى

التكييف كويس اوى اوى .. الجو كان حر جدا و انا على الدائرى و شغلتة على 1 و اشتغل بسرعة جدا و زى الفل .. بس اعتقد ان توزيع الهوا مش تمام اوى .. مش عارف انا مش خبير يمكن الوحوش يفيدونا اكتر فى النقطة دى.

تصميم فتحات تكيف اللوجان من النوع الممتاز في توزيع الهواء لأنها بتتحرك معاك ٣٦٠ درجة, فلو عايز الهواء يضرب فيك ممكن (بس حاسب من نزلات البلاد) ولو عايزه ميجيش عليك خالص ويضرب على السقف والأجناب برضه ممكن, حضرتك ظبطة وشوف.

المشاركة الأصلية كتبت بواسطة كوباية شاى

ركزت علشان الاقى موضوع الحرارة دة اللى فى الدواسات و التابلوة و لحد دلوقتى مش لاقيلو اثر .. يمكن يبان بعدين.

هو الموضوع ده بيفرق من شخص لآخر, يعني فيه ناس بتوصفه إنه صهد لا يطاق, أنا حسيت بيه على خفيف, وممكن حضرتك متحسش بيه خالص! بس هي المواسير مصدر الحرار موجوده وبتسخن كده كده.

المشاركة الأصلية كتبت بواسطة كوباية شاى

كمبيوتر العربية عندى معاة مشاكل بصراحة .. اولا انا مش فاهم الترتيب بتاعة .. يعنى انا اللى ثابت قدامى عداد الكيلومتر .. مع كل دوسة على الزرار بيجيبلى رقم تانى مش ببقى فاهم دة بتاع اية .. ماعدا واحد كانت الunit بتاعتة liter per kilometer فا فهمت ان دة معدل البنزين .. الغريب انة باستمرار مدينى 60 لتر لكل 100 كيلو !!!!! طبعا دة تهييس لان انا ماشى 70 كيلو و لسة منزلتش اول شرطة .

ليه بس هو فيه كذا وضع (أعتقد ٦) بس مش فاكر ترتيبهم:
الكيلومتر الأساسي
كيلومتر الرحلات (ممكن تصفره)
المسافة المقطوعة من آخر تصفير لكمبيوتر الرحلات (ملوش علاقة بتصفير كيلومتر الرحلات السابق, يعني بيتصفر لوحده مع كل الأوضاع الآتيه)
الماسفة المتبقة الممكن قطعها بالكمية المتبقة من البنزين
متوسط إستهلاك البنزين بالليتر لكل ١٠٠ كم
متوسط السرعة

بس كده, بس ممكن أكون غلطان في الترتيب.

المشاركة الأصلية كتبت بواسطة كوباية شاى

موضوع نتشة الفتيس دة .. قعدت زى الموسوس ادور علية .. فى مبالغة كبيرة فى وصفها بالنتشة على فكرة .. دة مجرد احساس بالغيار .. و على فكرة فى عربيات كتير اوى كدة و دة مش عيب فى العربية ولا حاجة و لو انت مش مركز مش هتحس بحاجة اصلا.

+١١١١١١١١١١١

المشاركة الأصلية كتبت بواسطة كوباية شاى

عزل العربية معقول جدا .. يعنى لا يرقى لعزل العربيات اللى فى فئات اعلى و لكن معتقدش ان فى عربية فى نفس الفئة تتفوق عليها.

الجملة دى للى هيفهمها بس ,, العربية دى سواقة محترمة مش سواقة بلاستيك خالص !!

+11111111111

المشاركة الأصلية كتبت بواسطة كوباية شاى

الصوت بتاع الكاسيت رايق و كويس بس كنت اتوقع حاجة اعلى بصراحة.

لأ بقه إستناني, دنا صوت الكاسيت كان بالنسبالى مفاجأه, بعد مكنت متصور إن أول حاجه أعملها أغير الكاسيت والسماعات. حضرتك بس محتج تظبط إكوالايزر الصوت, بص معايا...



إضغط على الزرار إللى مكتوب عليه AUD حتلاقي ممكن ضبط البيز والتريبل لحد رقم +٧ من السهمين يمين وشمال, دول أول تكتين لزرار AUD, التكه الثالثة بتاعت loudness خليها ON مش OFF برضه من السهمين يمين وشمال. حتلاقى الصوت بقى حاجة تانيه وإدعيلي.

الصوره من موضوع أخونا جبريل على فكرة :)

المشاركة الأصلية كتبت بواسطة كوباية شاى

فى حاجة رخمة ان اماكن التخزين اللى فى التابلو قليلة اوى .. انا متعود ان لازم يبقى فى حتة كدة احط فيها الفكة و الموبايل .. للاسف مفيش غير مكان المشروب اللى تحت .. متبقاش عارف تحط فية الطفاية ولا الموبايل ولا الفكة و لا الحاجة اللى بتشربها .. كمان التابلوة نفسة مش مستوى علشان تعرف تحط علية حاجة من فوق .. ولا فى مساحة قدام العدادات .. مفيش غير باب السواق و دة مش عملى للحاجات اللى عايزها تبقى فى متناول ايدك على طول!! يمكن دى الحاجة الوحيدة اللى كان عندة حق فيها الراجل المتحيز اللى عمل الفيديو بتاع المقارنة بينها و بين الساجا .

فعلا أنا متفق معاك, بس حليت الحكايه دي شوية بإني ركبت مسند يد فيه مكان للتخزين. صحيح عايز أعملة موضوع بالصور عشان الكل يستفيد.

بس على فكرة فيه خن صغير قدام الهاند بريك ممتاز للفكة.

المشاركة الأصلية كتبت بواسطة كوباية شاى

صوت الموتور مش عالى خالص و لو قرصت على العربية شوية و سمعتة صوتة مش هيدايقك خالص. مش مزعج يعنى.

مرتاح راحة خرافية بسبب العفشة .. اسالوا واحد متعود على سيراتو و سيفيك .. العفشة حكاية مع طرقنا اللعينة .. انا بعدى على النقرة و مش فى بالى اصلا ههههه

عاجبنى اوى ارتفاع العربية طبعا مش محتاج اتكلم علية كتير. بس و انا بركن عندى مشكلة كبيرة انى مش شايف حاجة خالص ورا .. اعتقد الباركينج سينسور هيبقى ضرورة مش كماليات. اشترية منين و اركبة فى التوكيل ولا برة يا رجالة ؟؟ :]


طبعا انا اسف على التقرير التعبان دة و يارب يفيد اى حد و طبعا لو فى اى اسئلة انا فى الخدمة :)

+١١١١١١١١١١١١

سيدي الفاضل موضوع ممتاز لا متواضع ولا تعبان, كل إللى ناقصة شوية صور ويبقى أحسن تقرير عن الأوتوماتك بعد تقرير أخونا جبريل.

الف مبروك عليك ويكفيك شرها وأهم حاجة دلوقت تشتري طقم دواسات وغطاء لطارة الدركسيون وتعمل فرش للكراسي وللشنطة وممكن افرش جلد للأرضية لو حبيت.

الف مليون مبروك وربنا يحميها لك من العين هي الدفعه الثانيه وصلت وهل هي موديل 2013 ارجو الرد علشان انا برضه حاجز اتوماتيك بس من توكيل العبور فلو موجوده بره عند اي معرض ومتوفره ممكن تقولي وانا اجيبها من عنده وياريت كمان السعر واسف علي الاطاله