كيا كارينز 2012 هاي لاين من الوكيل أفضل أم من سمير ريان

**simsim1** · 03-07-2012 11:23 PM

الأخوة المحترمين في أفضل منتدى سيارات

نويت بمشيئة الله شراء سيارة كيا كارينز لأخويا وبعد اتصالات مع الوكيل و مع سمير ريان و جدت التالي :

السيارة نفسها عند التوكيل الهاي لاين سعرها 140ألف و بعد تدخل بعض الأصدقاء أصبحت 139 ألف و تسليم فوري

السيارة بضمان الوكيل سعرها 137 ألف و الأنسة هناك قالت لما تيجي ممكن ننزل تاني ( السيارة بضمان eit ) يعني مفيش فرق عن السيارة الأولى .

السؤال أشتريها من سمير ريان و لا من الوكيل ، أخشى أن يكون سمير ريان مغير حاجة في العربية بفرق السعر ده .

ياريييييييييييييت تساعدوني في أخد القرار سريعا لأني نويت إن شاء الله أشتري السيارة غدا

ملحوظة الدفع هيكون نقدي في كل الأحوال

ياريت أعرف كمان الكماليات المفترض وجودها في الهاي لاين علشان أراجعها و أنا بشتري

وجزاكم الله خيرا

**GMC** · 04-07-2012 12:42 AM

لو انا اكيد حقارن الاول الاوبشن الي موجود في الاتنين واشوف ايه الناقص وياريت بردوا تكشف على الدهان

ميكونش فيه خبطه كده ولا كده واتصلحت وعموما يعني الفرق مش كبير ديه كلها 2000 جنيه بس هههههههههه

التوكيل افضل

**GMC** · 04-07-2012 12:44 AM

الاوبشن

وطبعا الماتور اكيد هوا نفسه ال 1600 CC ال 123 حصان او 125 حصان مش متذكر اوي

اوتوماتيك - جنط 16 - 2 مفتاح ريموت

تكييف تتش ----2 إيرباج ---فرامل ABS

طارة مالتي ---مرايات ضم كهرباء ---- باور ستيرنج

4 زجاج كهربا - -- -راديو CD mp3 ----سنتر لوك

مرايات كهرباء ---- زجاج فاميه ----جنوط سبور

الشبكة الجديدة ----شكمان نيكل ----نواكل خارجية

مسند يد أمامي --- فوج لايت --- فتح الشنطه والبنزين من جوا D:

وفي الاخر لما تشتري ابقى شوف الكوريك والعده الي ورا موجوده واكامله ولا لا

وحقولك على حاجه بس حتستغرب ابقى خد السياره قبل ما تشتريها اكشف عليه كمبيوتر وفحص شامل وارفعها وشوفها من تحت

متستغربش من كلامي قريبي اشترى هوندا سيفيك 2011 وللأسف كان واخده خابطه جامده جدا من تحت وهوا كشف بعد ما اشترى ودفع

وكان فيه خبطه في الباب الشمال وكان متسمكره ومرشوشه

زي ما هما بيهتموا بالفلوس وميتموتوا على كل جنيه لازم انت كمان تموت على حقك وتكشف ومتكسفش مش عاجبه بلاها
ابقى اثبت بقى

**PANERAI** · 04-07-2012 01:38 AM

سمير ريان جربناة اكثر من مرة و ممتاز في اسعارة - الحقيقه يعتبر من افضل المعارض في مصر عن تجربة
قارن الكماليات بالكامل و نوع الكاوتش كمان شوفه و لو زي بعض توكل علي الله من سمير ريان

**Mohab.Nabil** · 04-07-2012 01:48 AM

هو طبيعى ان الوكيل بيبقى اسعاره اغلى شوية عن الموزعين عشان يدى فرصة للموزعين انهم يبيعوا .. لأن لو نفس السعر محدش هيروح يشترى من معرض و يسيب التوكيل

و الطبيعى فى مصر برضه دلوقتى الغش

انا لو مكانك بصراحة التوكيل و اريح دماغى من اى قلق و ممكن برضه تكون عربية اوتو سمير ريان مفيهاش اى حاجة بس الراحة النفسية عامل مهم جدا فى الشراء

بالتوفيق ان شاء الله

**salodas** · 04-07-2012 03:33 AM

أنا هاقولك تجربتى مع سمير ريان ...
أنا اشتريت عربيتى منه من حوالى سنتين سيراتو وبعهالى على أنها خليجى سعودى ... وطبعا عملت فلحوس واتأكدت من الستيكر الى على قايم الباب بتاع السواق (طبقا للمواصفات الخليجية السعوووووووووووووديه) ...
المهم بعد كام شهر كده لقيت الشباب بيتكلمو على حاجة أسمها ven code تقريبا (يا رب أكون كتبته صح) المعم ضربت العربية بالفين طلعت عربيتى عمانى .... أنا زعلت .... بس للأمانة العربية زى الفل معايا ... بس أنا مبحبش الغش حتى لو فى حاجة صغيرة ...
تتم على عربيتك ... أشترى بالنهار ..... جرب كل حاجة .... غسلة حلوة تبين أى عيب فى الصاج أو الدهان

**zangry** · 04-07-2012 09:26 AM

هاتها من التوكيل احسن بلاش المعارض دى انا مش بثق فيها

خصوصا ان محدش بينزل تعريفة فى عربية عليها اقبال شديد

**lenovo** · 05-07-2012 06:24 PM

المشاركة الأصلية كتبت بواسطة salodas

أنا هاقولك تجربتى مع سمير ريان ...
أنا اشتريت عربيتى منه من حوالى سنتين سيراتو وبعهالى على أنها خليجى سعودى ... وطبعا عملت فلحوس واتأكدت من الستيكر الى على قايم الباب بتاع السواق (طبقا للمواصفات الخليجية السعوووووووووووووديه) ...
المهم بعد كام شهر كده لقيت الشباب بيتكلمو على حاجة أسمها ven code تقريبا (يا رب أكون كتبته صح) المعم ضربت العربية بالفين طلعت عربيتى عمانى .... أنا زعلت .... بس للأمانة العربية زى الفل معايا ... بس أنا مبحبش الغش حتى لو فى حاجة صغيرة ...
تتم على عربيتك ... أشترى بالنهار ..... جرب كل حاجة .... غسلة حلوة تبين أى عيب فى الصاج أو الدهان

VIN Code هههههه .. المهم انا كنت خايف زيك كده واشتريت منو كيا ريو سعودي .. بس الحمدلله طلعت فعلا سعودي وكمان في حاجة تثبتلك انها سعودي . بص على الورقة بتاعت الشحن اللي بتبقى ملصوقة على الزجاج الخلفي مش اللي في الشراع . ديه بتبين هوية البلد اللي كانت مشحونه منها