الموضوع: رف خلفي بيكانتو 2012

المشاركة الأصلية كتبت بواسطة medo_sirion

بس هوة تلفون حد فى الحرفين صعب بس لو نزلت انا متاكد انك هتلاقى لان شوفت بيكانتو متقطعة

حتى 2012 لحقت تتقطع؟

المشاركة الأصلية كتبت بواسطة a.saad

عندى رف بس الشكل القديم
2009
مش عارف نفس مقاسك ولا متغير

للأسف مش نفس المقاس :(

المشاركة الأصلية كتبت بواسطة megahome

لو سمحت ممكن تقولي رايك ايه في البيكانتو ٢٠١٢ وايه الفرق بين الخليجي وغيره وهل فيه فرق في السعر

طبعا ممكن :). بص يا سيدي عامة هيه عربية كويسة بس لازم تراعي إنها عربية فئة صغيرة. يعني ما تجيش تقول الكنبة ضيقة ولا الشنطه ضيقة ولا حاسس إنها مش متينه! دي أمثلة من حاجات ما ينفعش تقولها على عربية من الكاتيجوري ده. هيا مش بتاعت جري مع إن سحبها حلو ومقدرش أقولك على ثباتها عشان مامشيتش بيها أكتر من 90كم بس اللي واضحلي إن ثباتها متواضع. مش وحش بس مش بتاعة جري فوق ال100 والله أعلم. سماعاتها سيئة جدا (بس طبعا إنتا ممكن تركب سماعات خلفية). من الآخر عربية مناسبة لسيدة أو حد مشاويره كلها داخل المدينة ومش بتاع جري.

بالنسبة لفئاتها: أولا بالنسبة للوكيل فئاته ثابتة تقريبا كانو 4 فئات. أما الخليجي فئاته كتير وغير ثابتة يعني ممكن فئة تختفي وتنزل فئة تانية بمواصفات مختلفة في وقت ما. طبعا حضرتك لازم تكلم كذا معرض وتستفسر عن الفئات والأسعار وبعدها حتعرف بالضبط كل الفئات الموجودة في السوق وأسعارها ومتنساش تسأل عن الألوان عشان مش كل الألوان موجودة في كل الفئات.

بالنسبة لخليجي ولا وكيل: دي تختلف من شخص لآخر. الكلام اللي معروف للكل إن الوكيل عليها ضمان وزايدة في السعر حوالي 4000 جنيه. الكلام اللي مش كل الناس تعرفه:
1. الخليجي بيتعمله صيانة في التوكيل عادي جدا زي الوكيل بالضبط من غير أي فرق ولا زيادة فلوس ولا دفع مبلغ في الأول زي ما في توكيلات تانية.
2. في حاجات بتلاقيها ناقصة في الخليجي زي ما حصل معايا. في حالتي كان الكاسيت بتاع العربية الأصلي متشال وراكب بداله كاسيت ما يسواش نكله ماركة تعبانة إسمها (Roadstar). طبعا أنا كنت عارف إن الكاسيت بتاعها مش الأصلي بس ماكنتش أعرف انهم حيركبو كاسيت سيء جدا كده. تانيا العربية من غير رف خلفي (اللي أنا بسأل عنه هنا) ودي حاجة ضايقتني جدا.

من الآخر لو ناوي على خليجي تركز جدا جدا جدا في العربية جايه بإيه بالضبط ويفضل تشوف العربية اللي حتشتريها وتفحصها جيدا قبل الشراء بيوم أو أكثر. وتاخد بالك كويس في أي فروق بين الخليجي والوكيل في المواصفات بين نفس الفئة وتقيمه بفلوس. يعني أنا لو كنت عملت كده وقيمت فرق الكاسيت + الرف الخلفي + الضمان, كنت جبت وكيل أحسنلي (مع العلم إني مش بيفرق معايا الضمان).

بس والله الموفق,