نتيجة زياره فرع العامرية .. هوه الفرع طول عمره بالمستوي ده؟!!!

**ahmed_m_ashraf** · 09-07-2012 08:31 PM

فيما يلي نتيجة زيارتي للتوكيل اليوم ونفس الصيغة دي نشرتها على صفحت رينو علر الفيس، لما نشوف حد حيهتم ولا إيه، بجد حاجة تقرف ...

"يبدو أن تجاهل طلبات العملاء في الصيانات وتضييع وقتهم أصبح سمه سائده والتصرف التطبيعي لكل فروع التوكيل.

أنا لسه راجع من فرع العامرية ودي أول زيارة للتوكيل عموما وأول عربية رينو أمتلكها (لوجان أوتوماتيك)، بصراحة قمة الإستهتار والإستخفاف بطلبات ووقت العميل.

كنت حاجز من ١٦٢٠٢ يوم الخميس معاد اليوم الساعة ١٠ صباحا. وصلت في الميعاد بالضبط وكان المطلوب عمله كالآتي:
- تغيير ذراع المالتي فنكشن بالضمان لوجود عيب فيها (العربية ماشية ١١٩٣ كم)
- إلغاء التكيف الساخن لعدم إحتياجي ليه وبسبب السخونية المعروفة بسببه.
- كود الكاسيت.

العربية تم تسلمها مني بدون ما أمضي على شئ ولا يتم تحديد أماكن الخبطات إن وجد، ولم يتم إخطاري بالميعاد المتوقع للإنتهاء منها.
على الساعة ١٢ الظهر إكتسفت إن العربية متسجله دخول الساعة ١١:٤٢، ،ميعد خروجها ٣:٣٠.

على الساعة ٣:٢٠ طلعت أسأل لقيت المهندس إللي إستلم العربية وقللي ١٠ دقايق وتكون خالصه.

فضلت مستني لحد الساعة ٤ ولما زهقت طلعت أبص بصه لاقيت العربية خالصه ومركونه ومحدش نده عليا لسه، وفضلت منتظر للساعة ٤:٣٠ محدش نده، فروحت أسأل الموظف قاللي ثواني وراح ورجع معاه ورق الخروج وقاللي تمام كده ... حلو لحد هنا؟

طلعت أستلم العربية من غير محد يجي معايا يسلمهالي وأتأكد إن كل شئ إتعمل، وجيت أجرب والنتيجة ...

- ذراع المالتي فنكشن إتغير وشغال تمام دلوقت.
- التكيف السخن متعملش فيه حاجة ولما سألت قاللي "خليه في صيانة ال ٥٠٠٠ كم عشان بياخد وقت. بياخد وقت؟!!!! أنا قاعد منتظر ست ساعات، فيه إسه أكتر من كده؟ أبات عندهم مثلا؟!!!
- من غيظي مشيت وبعدين إفتكرت إن محدش إداني كود الكاسيت!!

يعني ٦ ساعات لتغيير ذراع المالتي فنكشن فقط؟!!!!!!! ويعني إيه خليه في صيانة ال ٥٠٠٠؟ أنا ممكن معملش ٥٠٠٠ كم قبل سنه!!! ده جد ولا تهريج؟!!

أنا آخد يوم أجازه من شغلي عشان أعمل ٣ حاجات محدده في العربية ميتعملش منهم غير حاجة واحده وهي أتفه حاجة وكان ممكن فعلا أستنى عليها لصيانة ال ٥٠٠٠ كم.

أنا إللي حصللي اليوم ضياع لوقتي ويوم أجازه من عملي وتجاهل لطلباتي غير مقبول بالمره."

بالمناسبة، المهندس ما إعترضش نهائي على موضوع إلغاء السخن، بالعكس قاللى إنه عاملها في عربيتو الميجان.

إيه رأيكم يجماعة، فرع العامرية عايز حاجه تفوقه، أنا حسب ما قريت من مشاركاتكم إنه كان أحسن فرع على مستوى الجمهورية مش إسكندرية بس!!

**ahmed_m_ashraf** · 10-07-2012 12:53 AM

آخر الأخبار ...

وصلني الرد الشهير على الفيس بوك، "إبعتلنا رقم تليفونك ورقم الشاسيه و أحد المسؤلين هيكلمك ويحل المشكلة".

بس هو أنا مقولتلكوش على آخر إكتشاف في تهييسة التوكيل النهارده؟

أخدو مني الرخصة عشان ياخدو البيانات ومرخعوهاش، وطبعا وأنا في لخمتي ونرفزتي وبعد تعب اليوم الضايع ده نسيت خالص الموضوع ومفتكرتش غير وأنا عايز أطلع رقم الشاسية :019f3b~14:

آآآآآآآآآآآآآآآآه هيجيلي شلل

**Ahmed A Rahman** · 10-07-2012 01:17 AM

شكاوى رينو فرنسا : client@renault.com
رينو الشرق الاوسط: aurelian.popa@daciagroup.com

**akerima** · 10-07-2012 10:32 AM

العامرية فعلا من انضف التوكيلات علي مستوي الجمهورية بس انا بقالي كتير بروح اعمل صياناتي في سموحة

الغريب ان فرع العامرية كان علي حد علمي نضيف جدا قبل ما فرع سموحه يشتغل يعني لما كان الضغط عليه من كل ناحية والشغل كتير دا انا كنت بروح الساعة 8:30 الصبح بلاقي العربيات واقفة زحمة دلوقت ممكن تروح تلاقي عربيتين قدامك الساعة 10 او 11 الصبح يعني الضغط عليه قل جدا

ايه اللي حصلهم؟؟؟؟؟؟؟؟

**ahmed_m_ashraf** · 10-07-2012 01:48 PM

المشاركة الأصلية كتبت بواسطة akerima

العامرية فعلا من انضف التوكيلات علي مستوي الجمهورية بس انا بقالي كتير بروح اعمل صياناتي في سموحة

الغريب ان فرع العامرية كان علي حد علمي نضيف جدا قبل ما فرع سموحه يشتغل يعني لما كان الضغط عليه من كل ناحية والشغل كتير دا انا كنت بروح الساعة 8:30 الصبح بلاقي العربيات واقفة زحمة دلوقت ممكن تروح تلاقي عربيتين قدامك الساعة 10 او 11 الصبح يعني الضغط عليه قل جدا

ايه اللي حصلهم؟؟؟؟؟؟؟؟

أنا داخل الساعة 10 مكنش فيه حد غيري! والنصيبة كاتبين الدخول الساعة 11:42 أكتر من ساعة ونص وأنا مركون وبعدين أربع ساعات شغل في تغيير الدراع!
هو الضغط معظمه على الكيا الرينو مكنش كتير، بس عموما محستش إن الضغط زياده عن حمل المكان، بس معرفش ليه الهياس إللى كانو فيه ده!!!

لسه محدش كلمني وأنا شويه وهكلم 16202 أشتكي برضه.

**كوباية شاى** · 10-07-2012 03:47 PM

اشتكى و متسيبش حقك و لازم اللى فى الفرع يتعاقبوا علشان دة ميتكررش تانى لا معاك ولا مع غيرك

انا رايح بكرة الغى السخن فى فرع المقطم 9 و نص الصبح .. و دة اول تعامل مع التوكيل بردو .. لما نشوف هيحصل اية !!

**ahmed_m_ashraf** · 10-07-2012 09:18 PM

المشاركة الأصلية كتبت بواسطة كوباية شاى

اشتكى و متسيبش حقك و لازم اللى فى الفرع يتعاقبوا علشان دة ميتكررش تانى لا معاك ولا مع غيرك

انا رايح بكرة الغى السخن فى فرع المقطم 9 و نص الصبح .. و دة اول تعامل مع التوكيل بردو .. لما نشوف هيحصل اية !!

طيب هقولك نصيحة عشان مخي شغال في الحكاية دي من إمبارح ... قول لهم على طلبك، بس متقفش على كده، إسأل إيه إللي حيتم بالضبط وإعرف لو كان فيه أي أجزاء حتتفك عشان يتم الوصول للمنطقة إللي فيها الشغل (موتور الأوتو مالي الحوض ويمكن يكون الوصول لمنطقة الشغل صعب عن المانوال) وشوف لو هيكون فيه لعب كتير أنا رأي بلاش العملية دي. وخليك دايما متابع معاهم عشان ميحصلكش إللي حصللي :(

وأرجوك بعد متخلص على خير يحكيلنا عملو معاك إيه بالضبط وإيه النتيجة.

بصراحه ساعات بفكر أتراجع عن الفكرة دي وأتجه لمحاولت زيادة العزل، محتاااار جدا، عايز ألاقي طريقة تنهي موضوع سخونية الأزرار والكاسيت، مثلا وضع عزل خلفهم (وراء القطعة الفضي في التابلوه) وكمان سخونية هواء المروحه لو مش مشغل التكيف بعد فترة طويلة من التشغيل زي مشوار طويل مثلا (حتى لو جايب مؤشر الحراره على آخر البارد.

**ahmed_m_ashraf** · 12-07-2012 03:14 AM

آخر الأخبار، تلقيت مكالمة من مهندسة بفرع العامرية ووجه لي الإعنذار عن ما حدث وطلبو مني تحديح الموعد الذي يناسبني وأصرو إني أروح فرع العامرية مش سموحة عشان يحسنو الصوره إللى خدتها عن الفرع ونضرا لإزدحام فرع سموحة.

يكونوش عملينلي كمين هناك؟ هههههه

إعتراف بالخطأ وتصرف محترم ينم عن إحساس بالمسؤليه والرغبه في الحفاض على السمعة الطيبه، لاكن كان هيكون أجمل لو كل ده محصلش أصلا :-)

عموما الحمد للهلو

**dr_mohamed16** · 13-07-2012 08:03 PM

طب احمد ربنا يا راجل
انا بقى بعد م استلموا منى العربية بحوالى سعتين تلاته ندهوا عليا فى المايك و قالولى حسابك قد كده روحت دافع و طالع استلم فضلت الف حوالين نفسي و مش لاقى حد يعبرنى و كل ما اسال حد يقولى اى كلام و انا مش عارف العربية فين
المهم لقيت واحد كده بيجيب العربيات من جوه روحت قايله عايز عربيتى .. راح واخد منى تصريح الخروج و غاب حوالى نص ساعه كده و انا واقف زى العبيط .. المهم لقيته طالع بيكلم المهندس ( وانا كنت واقف وراهم و هو مش واخد باله ) قاله العربية ديه مش لاقينها !!!!!! ههههههههههههههههههههههههه ههههههههههه اه والله ايه رايك بقى :)))))

المهندس قاله طب اتاكد من رقمها .. الراجل جالى قالى هو رقم العربية كده صح قولتله اه صح !!! نزل غطس تانى و الحمد لله لقاها و رجع بيها :))

بصراحة معملتهم زباله فى العامرية