الموضوع: مقارنه عمليه للباسات 2009 تربو vs السيفيك 2010 بعد عمل 28 الف لكل منهما

صباح الخير ياجماعه

طبعا كلكم شايفين الموضوع غريب شويه و اكيد كل واحد هيقول دي فئه غير التانيه
بس الجديد اني بقارن بين عربيتين امتلكت كل واحده لمدة 20 شهر بالضبط فأكيد كل كلمه هتتقال هتبقى موضوعيه و مافيهاش حاجه سماعي
نبتدي بالباسات ونتفق ان التجربه عمليه يعني من غير صور و هنجيب من الاخر

باسات تربو فتيس DSG

طبعا كلنا عارفيين فخامة العربيه من جوه عامله ايه تحس ان مافيش احلى من كده بصراحه بس مش عارف ليه حسيت ان الكرسي كان ناشف سنه لدرجه ان كرسي الكورولا انعم منه طبعا جودة التشطيبات مافيهاش كلام ندوس بقى بنزين
طبعا بما ان العربيه لسه خارجه من المعرض واخوكم سايقها و هو خايف و الفتيس بينقل بسرعه و الشارع زحمه فحسيت ان سحبها عادي و قعدت اقول يادي النيله المنحوس منحوس هي مش مكتوبالك تركب عربيه تجري (كنت راكب كورولا اوتو 1300) المهم طلعت على الدايري قلت اسقط نقله يمكن ربنا ينفخ في صورتها
يانهار اسود لقيت العربيه بتأمرك و هي ماشيه و هوب طارت بلا مبالغه لدرجة ان رجلك ممكن تترعش من الخضه طبعا شلت رجلي بسرعه و قلت يمكن صدفه طب جرب يا واد تاني نفس النتيجه وده كانت من اسعد الحاجات اللي حصلت في حياتي لدرجة كل ما تيجي عربيه مهما كانت عايزه تعديني ادوس بنزين حاجه بسيطه و في ثانيه واحده تبقى وراك بمسافه كبيره و الناس مستغربه هو راكب ايه؟
طبعا لاحظت ان العفشه ناشفه شويه
الفرامل رهييبه تديلك احساس بالامان الكامل مهما كنت طاير
تكييف معقول احسن من حاجات اوروبي كتير
الفتيس بينقل تصاعدي من غير ماتحس نهائي لدرجة انك بتحس انه نقله واحده ولو سقطت بيحصل ديلاي حاجه بسيطه بس مش مهم عشان العربيه بتبقى طلقه
نييجي للنكد
جيت في يوم مروح قلت ياواد افتح الشباك سمعت صوت شخلله زي مايكون حديد بيخبط في بعضه شبه طول مانا ماشي من عند الموتور طبعا انزعجت كلمت بتاع المبيعات قال لي عادي ياباشا !!!
ليه ياعم عادي
اصل الفتيس يعتبر من غير زيت وده صوت الغوايش بيخبط في بعض و دي احسن صيحه في عالم الفتايس!!!!!!!!
ولو مش مصدق تعال سوق واحده تانيه و انت تعرف
طبعا ضربت كف على كف معقوله المانيا تعمل فتيس يشخلل هما ما بيجربوش العربيات
المهم
اسبوع كمان و صلاح سالم كان زحمه نيله لقيت الطلعه بترعش بطريقه ملحوظه كأن العربيه مانيوال و اسطوانة الدبرياج بتشاور عقلها قلت ياواد طنش خالص لقيت بترجع بضهرها في المطالع قلت ياواد طنش خالص اظنها مانوال و دوس على زرار الهاند بريك
اسبوع كمان و الفتيس ابتدى يدلع العربيه احلى دلع في الزحمه اشي رجرجه في الطلعه رجة جمل كل ما تشيل و تدوس و المهزله ان العربيه تيجي تطلع بيها تبطل عمركم شفتم عربيه اوتو تبطل؟
من غير ما اطول غيرت على مدى العشرين شهر 2 فتيس و 30 زياره و حماية مستهلك و نفس العيوب طبعا طول الوقت ده حرق دم و خناقات و خوف و انت مسافر لحد مره كنت منترفز قابلت واحد معرفه بيتاجر في المستعمل قلت له بايع قال لي شاري و خسرت 60000 جنيه


نيجي بقى للسيفيك VTI 20110

طبعا اي واحد كان راكب TSI و يركب موتور عادي انشالله 320 بي ام هيحسه بطه
انما الواحد استرجع طريقه دوسة الاوتو العادي فالاداء كان معقول بس لسه مش حاسس انهامش متميزه قوي كأداء عن بقية ال 1600 و انا ما بحبش اعدي 3500 لفه لحد ما ابتديت ادخل على المنتدى و عرفت موضوع الفيتك قلت اجرب بعد التليين بأختصار اللي بتعمله الباسات على ار بي ام واطي طبق الاصل السيفيك بتعمله بدايه من 4000 لفه لدرجة ان الواحد لما بيسقط التالت التسارع من 80-120 غير طبيعي تحس ان العربيه مجنونه اقوم دايس شيفت + تاخد الرابع العربيه تسارعها فوق الميه لا يقل عن تحت الميه
طبعا تكييف تلاجه بدرجه رخمه لدرجة انك ممكن يجيلك برد
العربيه اقرب عربيه للالماني في الثبات طبعا الباسات اثبت و افخم
قعدة الهوندا احلى و الكرسي اريح
عفشة الهوندا انعم
فتيس الهوندا تحححححححفه
فرامل الباسات اقوى بمراحل
قطع الغيار المستهلكه
السيفيك لاشىء
الباسات: تيل فرامل خلفي على 15000 كم -طقم بوجيه مش عارف ليه

الانطباع العام

بصراحه لولا ال DSG في الباسات كانت العربيه دي باعت ولا السبرانزا و لو عملوا مسابقه لاوحش اختراع من الناحيه العمليه يكسب بدون منافس ده ممكن ينكد على العفريت شخصيا

السيفيك هيا اللي كسبت عشان ببساطه عمليه و مانكدتش عليا و بتؤدي كل الي انت عايزه
و ممتعه في سواقتها جدا لدرجة اللي معاه العربيه دي خساره يفرط فيها
وده موضوع كنت عامله ليها
http://www.nilemotors.net/Nile/264585-a.html

واسف للاطاله

شكرا ياجماعه لكل اللي شارك