عوده بعد غياب طويييل .. وبعض المستجدات

**amraction** · 11-07-2012 07:02 PM

السلام عليكم.. ازيكم يا احلى عصاااااابه.. وايه اخبار الكبير اوى طنانى باشا ؟؟

واحشنى جدا والله.. بقالى سنه وزياده ما دخلتش.. ظروف الشغل والدنيا بقا.. كنت احيانا يدوب بدخل ابص واقفل وانام طوالى..

هقولكم على شويه حاجات حصلت فى فتره الغياب دى.. والصنايعيه اللى اتعاملت معاهم .. للتوضيح بس مش هكتب اسامى الصنايعيه المخسعين.. الشطار بس اللى هيتقالو

بالنسبه للميكانيكا احسن واحد اتعاملت معاه بقالى اكتر من سنتين.. شكرى فى حسينيه المنصوره
الراجل متخصص اوبل.. وعنده كمبيوتر .. والصنايعينه اللى معاه كلهم اساتذه بصراحه .. والعربيه بتطلع مظبوطه تمام من عندهم
معاه عفشجى اسمه طارق.. شاطر جدا برضه.. وايده خفيفه وحلوه ومش بياخد وقت..
والكمبيوتر بتاع شكرى مع واحد اسمه احمد .. هو عامل زى مخزن للقطع الاستيراد.. لو فيه حاجه بتقوله بيجبهالك.. ممكن يلسع حبتين ف السعر.. بس الميزه انه كل وانت واقف عند شكرى ما بتتحركش .. وحاجته لو بايظه او جرالها حاجه خلال مده قريبه بترجعهاله..
انا كنت خدت منه كبالن.. وبعد شهر فرطت تانى.. رحت رجعتهاله وخد كبالن تانيه وما دفعتش حاجه
واشتريت من عنده مسند دراع اصلى بتاع العربيه.. وركبه ف ثوانى.. هو بيعرف يفك التابلوه كله ويركبه اصلا فى مفيش

قدام شكرى فى واحد بتاع قطع غيار وزيوت.. بيبقا عنده الحاجات السريعه زى ساعه الثرموستات .. زيت فرامل.. جلب وبيض العفشه.. لو مش عنده هتاخد تاكس لحد "" او ممكن تمشى خمس دقايق "" لحد البحقيرى فى شارع قطع الغيار تشترى منه.. واسعارهم اقل من الزقازيق والقاهره.. كنت جبت طقم دبرياج لوك من عند البحقيرى

فيه واحد تانى بتاع عفشه.. بس مش فى المنصوره بقا.. عندى ف الزقازيق.. اسمه عيسى.. شاطر بس ما انصحش بيه اوى للاوبل لانه بيخلى العفشه ناشفه اوى.. معرفش ازاى بامانه.. بس ينفع فى تربيط العفشه او لو حاجه ع السريع

بالنسبه للتكييف.. الكمبروسر كان بايظ عندى وما صلحتوش من سنه ونص.. وكنت بكاكى خلاص من الحر.. لحد ما سمعت عن واحد فى الزقازيق والناس قالو شاطر اوى.. اسمه محمد فيشه.. عند نزله الكوبرى اللى بيتعمل فى طريق هريه الجديد
روحتله وقلت اجرب.. بص يا باشا.. بص.. قالى الكمبروسر بايظ.. قلتله ايه العمل.. قالى يا تجيب واحد استيراد يا اعملك طقم اصلاح.. بكام ده وبكام ده... قالى الاتنين عندى وبالتجربه.. الكبمروسر على 500 وطقم الاصلاح على 300 .. قلتله ايه طقم الاصلاح بالظبط.. قالى هفك الكمبروسر واطلع البساتم القديمه وادخل الجديده "" الاستيراد ""..

قلت فى نفسى انا كنت عامل حسابى على الافات فى تصليح التكييف.. مش هخسر حاجه لو جربت على 300 زى ما بيقول..
قلتله هعمل طقم الاصلاح.. عملناه وشحن فريون امريكى r 134 a .. و كبس وشاف اذا كان فيه تسريب.. والتكييف اهو بقالى شهر ماشى مظبوط ومفيش شكاوى خالص.. الا انه بس مع الشمس الشديد ع الصحراوى ما بحسش بيه.. والعربيه بتسخن مع التكييف.. بس دى الثرموستات بقا هروح اظبط الحراره عند شكرى بتاع المنصوره

فيه شويه مشاكل بقا ظهرت ف العربيه جديد.. ودماغى حاليا بتفكر ف حاجه كده.. بس هبقا اتناقش معاكو فيهم ف موضوع تانى.. لانى مش شايف اكتب اكتر من كده بصراحه ..

مستنى تعليقاتكم.. وللمره التانيه.. وحشتونى فعلا.. الواحد بيحس هنا انه ف بيت الاوبلاويه الكبير وبيطمن ع العربيه ومش بيحس انه ماشى عميانى كده

**A7medelfe2y** · 11-07-2012 07:39 PM

انا فقدت الامل ف تكييف الاوبل للابد

**amraction** · 11-07-2012 07:45 PM

والله كل اللى اتعامل مع محمد فيشه ده شكر فيه.. بتبقا عنده مرسيدسات وبى ام وسكودا ايه فايف.. وعربيات رحلات و عربيات جمارك نضيفه ومحدش عيب فيه لحد دلوقتى .. وبالنسبالى مفيش مشاكل لحد دلوقتى .. بس ده فالزقازيق

اسمع عن واحد اسمه اولاد عشم تقريبا ف المعادى ف القاهره.. سمعت عنه كلام كويس برضه وبيقولو عنده كبمروسر جديد كورى على الف ونص او الف و 600 تقريبا

**m7med_dola** · 11-07-2012 09:08 PM

مبروك علي التصليحات

**tananybasha** · 12-07-2012 12:34 AM

حمد الله على السلامه الأول
ليك وحشة ياراجل
و ده معناه اجى اصلح التكييف عندكم اسهل

**amraction** · 12-07-2012 04:22 PM

المشاركة الأصلية كتبت بواسطة tananybasha

حمد الله على السلامه الأول
ليك وحشة ياراجل
و ده معناه اجى اصلح التكييف عندكم اسهل

تنور يا كبير .. واحنا تحت الخدمه فى اى وقت

**amraction** · 12-07-2012 04:23 PM

المشاركة الأصلية كتبت بواسطة zrzr1

حمدلله ع السلامه يا ريس, فعلا شكري ملوش حل ف الاوبل وكل حاجه بتقضيها والعربيه واقفه ف مكانها
ربنا يعوض عليك ف المصاريف اللي صرفتها, بس فعلا الكباس الاستيراد للأوبل 2000 1.6 ب 500 جنيه؟

عند محمد فيشه ده ب 500 .. وبتاعه بقا.. لو ظهرت فيه حاجه هترجعله .. بس انا عملت طقم الاصلاح فقط

**amraction** · 12-07-2012 04:34 PM

المشاكل الجديده بقا...

من حوالى 5 شهور كده كنت عملت حادثه محترمه.. العربيه عومت منى بعد غرزه اضطراريه.. ولبست فى شجره من الشجر المعمر الكبير ده ... جزع الشجره والله اد نص العربيه كده..
المهم لبست فى الليله دى رفرف والعفشه وعلبه الريداتير بتاعت الساعات
جبت الرفرف استيراد.. ما حبتش اسمكر.. نفس اللون وفبريكه.. وظبطت الحاجه كلها
بس من ساعه الحادثه وفيه صوت خرفشه كده ف العربيه.. تحس انه جاى من الموتور.. افتكرته من العفشه.. غيرتها كلها مرتين.. وبرضه الصوت موجود... العفشجى قالى ده الشكمان مزمم فى الموتور
روحت ظبطت الشكمان وغيرت العلبه الاخيره لانها كانت مسدوده .. وبرضه الصوت موجود..
بتاع الشكمان قالى ده المصفحه مش مربوطه كويس.. روحت للسمكرى خليته ظبط المصفحه والاكصدام.. وبرضه الصوت موجود..

هو له خصائص كده.. بيظهر بعد فتره.. يعنى مش من اول ما تدور العربيه.. لما العربيه تمشى مثلا بتاع ساعه ولا اتنين يمكن يظهر.. يبان فى مطلع مطب.. حوده شمال.. مطب هوا..
وانا بقول يمكن.. لانه بيظهر بمزاجه.. وسبحان الله.. اختفى كده لمده تلات شهور.. ورجع تانى من اسبوع.. وارجع اختفى تانى.. هو شكله عفريت كده !!! :d :d

هتجنن منه لدرجه انى احيانا بفكر ابيع العربيه والله...رغم ان كل اللى ركبها بيقولى عربيتك نضيقه.. ناقصها بس فرش جديد و تظبيطه من بره عشان الخدوش وغباوه الموتسيكلات اللى اودت بحياه مرايتين و اكصدام ..

حاجه تانيه.. العربيه من ساعه ما صلحت التكييف وسحبها ضعف اووى.. بتجيب 120 بالعافيه .. اطفى التكييف.. تنظبط شويه.. واستهلاكها فى البنزين عالى الفتره دى .. دى بوجيهات ولا ايه ؟؟

ثالثا بقا. موضوع تغيير العربيه ده هبقا اناقشكو فيه بعدين

**amraction** · 12-07-2012 04:48 PM

نسيت اقول انه اتضح ان سبب الحادثه ان ال abs ضرب.. وخلى الفرامل تقفش على ناحيه واحده بس .. غيرته عند شكرى على 1200 .. وشغال تمام الحمد لله

-

الموضوع: عوده بعد غياب طويييل .. وبعض المستجدات

LinkBack

أدوات الموضوع

عرض

-

المواضيع المتشابهه

عوده بعد غياب

عوده الامن

عوده بعد غياب النت الرخم... وشويه مشاكل فى العربيه..

من سوف يرث ايميلك - بعد عمر طويييل ؟؟؟؟

عوده من الضلال

الكلمات الدلالية لهذا الموضوع

المفضلات

المفضلات

ضوابط المشاركة