الموضوع: مفييم ليه طالما مش شايف يا أعــــــــــمـــــــــي

بسم الله الرحمن الرحيم
السلام عليكم و رحمة الله و بركاته

انا من اللي بيحترموا القانون بالرغم اعتراضي ع حاجة زي الفيميه لكن بحترم القانون مش خوفا من العقوبة لكن احتراما ليه

( ايه كل الاحترامات ديه يا عم انت هتمثل هات الزتونة ... يووه انت رجعت تاني و زتونة ايه و جبنة رومي ايه احنا في بقالة )

طبعا اللي ميعرفنيش هيقولي ايه البرتقالي ده و اللي عارفني هيبقي عارف ضميري


و أحب اوجه نداء لأي حد بيمشي محترم
لو انت من اللي بيمشي محترم يبقي اركن العربية احسنلك لأنك مش هتعرف تمشي مترين
( ما انت مبهدلني معاك في المواصلات و راكن العربية و انا قاعد اتحسر .... خليك رياضي يا صديقي اللدود :) )


نيجي للمهم القانون و هو حظر الفيميه بالرغم اني معترض عشان الشمس لكن مخلفتش القانون زي بعض الناس

( يا واد يا محترم انت ... ايه رأيك عجبتك صح خليك في حالك يلا )

لكن بعد اللي بيحصل معايا اليومين دول انا مش بس هحترم القانون زيادة ده انا لو شوفت اي حد مفييم هبلغ عنه عشان افيش غليلي فيه او اقرفه باي طريقة

( المنتدي هنا مليان ناس مفييمين الحق بلغ عنهم ..... يبني اسكت هنا احسن نضرب انا و انت و ميعرفولناش طريق جرة )

كل يوم ابقي ماشي الاقي واحد ...تيت ... مفييم بيقفل عليا عشان سعادته مش شايف
و اللي يكسر فجأة و لا كانه عمل حاجة مع انه مشفنيش بسبب انه مفييم بس عمل نفسه من بنها و يبصلي بكل برود
( أصل انت اللي غلطان ازاي تمشي صح ... ايوة عندك حق لازم الواحد يمشي زي سواقين الترامكو عشان ينفع )
و اللي يرجع و هو بيركن و عشان مفييم مش شايف
و اللي راكن صف خامس و لا سادس و مفييم وبيفتح الباب بمنتهي البرود من غير ما يبص مهو طبيعي مفييم و مش شايف و يا ريته عجبه كمان بيزعقلك

و في الحالة ديه بتطلع مني جملة واحدة بس و بتفرج الناس كلها

مفييم ليه طالما مش شايف يا أعــــــــــمـــــــــي


طب طالما مش شايف بتفييم ليه ؟؟؟
لو مفييم و شايف و قادر تمشي بدون ما تقرف حد يا عم زي الفل عيش او مثلا بدون ما تقصد قفلت و اعتذرت انك قفلت و بدون ما تقصد فعلا كتر خيرك المهم متقرفش غيرك
لكن مش شايف بتفييم ليه اقنعني هات سبب واحد

هتقولي شمس و بتتعب منها و الحر كل البني ادميين في الشمس طالع عينهم و مش مفييمين اومال لو محامي بتلف ع المحاكم هتعمل ايه و العبد لله لسه مخلص الليسانس طازة و في انتظار النتيجة او اللي بيشتغل في الشارع كل يوم بص لعامل النظافة او عسكري المرور و هو واقف او اللي ع موتسيكل و انت تعرف المعني الحقيقي للوقوف تحت الشمس و تحمد ربنا ان عندك عربية تحميك من الشمس و المطر و مكييفة كمان اومال دول يعملوا ايه ؟؟

هتقولي أصل خصوصيات و الكلمة الحمضانة دي
مين اساسا فاضي يبصلك و انت في العربية محسسني ان نجم النجوم ماشي و الناس ملخومة في الشارع هيسيبوا الدنيا كلها و يبصوا لخصوصيات سعادتك في العربية اللي هو انت اساسا اخرك قاعد في التكييف بتشرب علبة الكانز و فاتح التكييف و الكاسيت و مقضيها
( معلش يا عمرو جايز الكانز ديه من اسرار الحياة الشخصية .... اه صح اوعي حد يعرف اني بشرب بيرل احسن ديه اسرار يا ضميري )
عايز تقنعني ان سعادتك حمل وديع عمرك ما بصيت جوة عربية حد و لا عن طريق الخطأ
افتكر زمان لما كانوا بيركبوا حصنة و جمال و حمير قدام الناس كلها بلاش ديه
بص دلوقتي للموتسيكل اللي الراجل هو و مراته و عياله فوق الموتسيكل متبهدلين و بيتخبطوا و ع مرأي و مسمع من جميع من في الشارع ع الاقل انت في عربية ليها حيطان بنسميها سقف و قوايم و ابواب رحماك

هتقولي منظرة و انا حر يا اخي طالما حر يبقي خليك حر في نفسك مش حر في غيرك مش تأذي غيرك و مش عاجبك كمان و تقولي حر

هتقولي اشمعني ما فيه ناس بيفيموا و هي عيند بقي في القانون
يا أخي طب طالما دول مفييمين و مخالفيين ما تخليك انت محترم القوانين و تبقي راجل جنتل يا كابتن و لا هو اي هبل في الجبل و لا مينفعش نمشي محترميين


من الأخر ده اللي عايز اقوله لأي واحد من اخوانا اللي فوق دول قولي سبب يقنعني
لأني زهقت من اعمياء القلب و النظر اللي مفييميين و قارفين غيرهم

مش ملاحظين حاجة ع غير العادة ضميري بقي بيحبني اوي


( اوي اوي يا حبيبي .... اه يا دززززمة )


اقعدوا بالعافية