احترس من بتاع كاوتش في الجيزة

**abdulhafeez** · 14-07-2012 08:45 PM

المحل عبارة عم كشك بعد نزلة كوبري الجيزة على شارع كوبري عباس ( شارع صلاح سالم ) مباشرة على اليمين عبارة عن كشك صغير ومفيش غيره في الحته كنت بصلح عنده كاوتش وخليته يكشفلي على عجلة تانية قلي خش العربية لف الدركسيون على الآخر راح خرم العجلة خمس اخرام وقلي ان العجلة منملة ولازم تتعمل .... زوتها هوا وصلحتها عند عيسى في شارع فاطمة رشدي في الهرم ... حسبي الله ونعم الوكيل ....... خدو بالكم منه ويا ريت محدش يصلح كاوتش عند اي حد مش عارفه حتى لو هتزود هوا ... خد المقاس وزود انت العجلة بنفسك .. انا شفت بتوع التاكسي بيعملوا كده ..

**drmagieed** · 14-07-2012 09:23 PM

لا حول ولا قوة إلا بالله ... والله لسة قدمنا كتير علي ما نبقي شعب يحترمه ويقدرة ويعمل له حساب من يحكمه

**semi** · 14-07-2012 09:59 PM

اللي نفسي اعرفه الناس دي بتحلل فلوسها ازاي
دايما اي محل معفن على الطريق كده تلاقيه حرامي
وبشكل عام الصنايعية كلهم بيعملوا حوارات عشان يشتغلوا وخلاص
ونادرا لما تلاقي صنايعي بيقول الحق وعايز يوفر عليك بأي طريقة

انا فاكر قبل كده كنت راكب مع سواق تاكسي وبقوله واحد نصب علي في الفرامل
قالي يابيه ده كده غلبان ده انا روحت وديت العربية لميكانيكي
سرقني وخد حاجات من العربية وانا اصلا ميكانيكي وهو كمان يبقى جوز اختي !!!

**Al-Farooq** · 15-07-2012 12:14 AM

انا حصل فيا الموضوع دة واتنصب عليا ، بس كنت فى شارع فيصل او الهرم مش فاكر ، بس كنت فى إتجاه الرماية ،
محل شكله نظيف وعلى نصاية الشارع ، كان قاعد فيه واحدة ست ، وفى اثنين استلموني واتدبس يمكن فى 250 جنية ، واتحط فى عجلتين يمكن أكثر من 15 خابور ،
اصلا شكلهم بلطجية ، المفروض كنت امشي ، بس للأسف كملت.
بعدها مش بروح لأي مكان للكاوتش غير بنزينة وطنية.