الموضوع: محتاج مساعده من رجاله فيات

المشاركة الأصلية كتبت بواسطة kaza

صباح الخير ياميسو وانت فين ياراجل وحشنا ...موضوع الزيت الثقيل مافيش منه خوف ابدا في الجو بتاع اليومين دول وكمان لو اكتر استخدامك بداخل المدينة دة افضل للتروس والكراسي لكن في البرد بيتحول لشحم وبيتقل قوامة جدا لدرجة اعاقتة لاتياش الفيتيس والنقلات وعقبال ما لزوجتة بتقل باخد وقت بس دة في درجات حرارة منخفضة جدا بقت نادرة في مصر ندرة العنقاء والخل الوفي .. وزيت 140 غير ضار والموضوع مش عربية جديدة او قديمة لان الزيت دة بيستخدم بكفاءة لسيارات النقل الثقيل والنصف نقل واكرر بكفاءة ومش هاشرحلك الاحمال علي التروس في العربيات دي اد اية وبتحتاج تبريد ومعامل احتكاك منخفض جدا وبالاخص لعدد الكيلومترات الاسطوري اللي بتقطعة السيارات دي دون مشاكل عموما فيات كما ذكرت بتنصح بزيت سيلينا 90 للتروس اليدوي والاختيار اولا واخيرا لصاحب العربية

الحمد لله يا بشمهندس ربنا يخليك وشكرا على سؤالك وكل عام وانت بخير وصحه

وفعلا الكتالوج بينصح بزيت سيلينا هههههههه ده حتى زيوت الباور والموتور ده ناقص يقولنا استخدمو زيوت شعر سيلينا ههههههه

ما هو عشان مشكله الزيت ال 140 فى الشتاء دى عشان كده انا قولت 90

وعشان الزيت ميبقاش تقيل جدا على الفتيس فى الشتاء صباحا ويتقل حركه الفتيس والتروس ويأثر على الاولسيهات او اى حاجه لانه ممكن يتعامل معاه بعافيه شويه فعشان كده قولت ال 90 افضل
وانا ذكرت جمله (عشان عربيتك حديثه ) دى لسبب ان العربيه مفيهاش اى تسريبات او اولسيهات بايظه او غوايش او التروس نفسها متاكله زى فى اغلب الفتايس القديمه لما بيبقى فيها مشكله اول حاجه بنروح حاطين زيت تقيل لكن المشكله فى عربيته بعيد عن الزيت خالص دى بليه الدبرياج المفروض المكانيكى بتاعه يكون فاهم كده

بس انا عن نفسى كنت لما بزود زيت بزود 140 عشان يزود اللزوجه بتاعه الزيت القديم اللى فى الفتيس لما يتخلط بيه ولكن لو حنزل الزيت كله واغيره فححط 90 لانه حيبقى لسه بخيره واللزوجه بتاعته كويسه ولما ينقص بعد كام الف كيلو ابقا ازوده نص كيلو مثلا 140 وكده حبقى حققت المعادله المطلوبه

وفعلا الموضوع فى الاخر يرجع لصاحب العربيه هو كده عرف مميزات ال 2 وهو يختار

وربنا يخليك لينا يا بشمهندس وميحرمناش منك وكل عام وانت بخير