الموضوع: يعني ايه هندسه

من الفيس بووووووك

الناس دايماً فاهمه المهندس غلط .. وفاكرينه سوبرمان اللي بيعمل كل حاجه .. دي عينه من اللي كان الواحد بيعانيه قبل الكلية وبعد الكلية وأثناء الكلية ...

و شباب هندسة ويل ريليت ..

واحد صاحبك يقولك :
- التلفون بتاعي بيهنج والكيبورد معلقه والرسايل بتتمسح وفيه أرقام مبتظهرش والرنات صوتها بقى واطي واطي واطي واطي آخر حاجه .. أعمل ايه ؟
- تقوله : وديه لفني صيانة موبايلات
- يعني يبقى صاحبي مهندس واروح لفني موبايلات .. تصدق انك واطي واطي واطي آخر حاجه ..

أبوك يقولك
- عايزين نحول التلفزيون ده من ابيض واسود لــ "ألوان" ونعمله ريموت كنترول ..
- وديه لفني تلفزيونات يا بابا ..
- أمال انا مدخلك هندسه ليه يا حيلتها ؟؟؟!

صاحب أبوك يتصل ترد انت بالصدفة
- سلامو عليكو ..
- وعليكم السلام ..
- كويس ان انا لقيتك يا حبيبي..
- خير يا عمو ..
- لا مؤاخذه الكابينيه عندي بينقط من ورا والسيفون مش عايز يشتغل وبيعلق كل شويه .. جربت احط جبس منفعش .. تفتكر اعمل ايه
- هات سباك يا عمو ..
- بس ابوك قالي إنك في هندسه وأكيد هتعرف
...................................

تبقى مع خطيبتك تلاقي فيه حاجه كده اتحدفت عليك ..
- خد ده
- ايه ده ؟!!
- ده اللاب توب بتاع بابا .. كان شغال عليه لقا الكيبورد علقت و الشاشه شاطت والماذر بورد اتحرقت والبطارية طلعت نار
- طب ما يوديه التوكيل
- مانا قلت لبابا كده .. قالي اديه لخطيبك هو مهندس و هيعرف يصلحه

أخوك الصغير بيلعب عالكمبيوتر ..
- متعرفش ازاي اضيف حسني عبد ربه للفيفا الجديدة وانقل رونالدو لبرشلونه وارجع ميسي لريال مدريد ..
- ؟؟؟؟؟؟؟؟؟؟؟
- امال هندسه ايه وبتاع ايه اللي انت فيها بلا قرف

أختك الصغيرة تقولك
- بقولك ايه
- نعم .
- ممكن تيجي عند صاحبتي تعرفلها كارت الصوت وتنزلها وندوز وشوية خلفيات لانجيلينا جولي وتستب لها لعبة كويك الجديدة .. انا قلتلها ان انت مهندس وبتعرف كل حاجه في الكمبيوتر
- ؟؟؟؟؟؟؟؟؟؟؟؟؟؟؟؟
(ملحوظة : الموضوع ده بيحصل حتى لو انت هندسة قسم ميكاينكا سيارات وغالباً صاحبتها لما بتعرف انك مهندس بتسأل عندك شقة ولا لأ)
...............

جدتك تقولك
- حبيب تيتا الجميل العسل السووووكر .. شوفلي والنبي الكبّة دي بايظة ليه والعصارة واقفة بقالها يومين و مبتعصرش ..
- وديها الضمان يا تيتا
- أمال مهندس ايه يا منيل على عينك ؟؟؟ .. بلا وكسه توكسك انت وامك في يوم واحد.. انجر من وشي .. أنا هنادي عالبواب يعملها

بقال عمارتكو يقولك
- بقولك يا بشمهندس عايزك في كلمتين .. أنا بالصلاتو عالنبي عايز ازبط الاضاءه بتاعت المحل واخليها تجيب الوان كده وحركات واعمل يافطة باللمض فيها البضاعه اللي عندي بأسعارها .. يعني الجبنه الرومي قدامها السعر بتاعها والجبنه البيضا قدامها السعر بتاعها وفي رمضان الاقي اليافطة بتعمل خصومات توماتيكي توماتيكي وتكتب للناس "هابي نيو يير" .. اعمل ايه
- هات كهربائي يا عم الحاج ..
- يعني مهندس حتتنا يبقى موجود واجيب حد من بره .. هديك ربع كيلو جبنه قريش بس اعملي الموضوع ده .
....................

جارك يقابلك صدفة في الشارع
- ممكن يا بشمهندس تبقى تعدي عليا تزبط لي تردد القنوات وتجيب الطبق على اتجاه النايل سات والعرب سات وقمر قبرص ولو فيه وقت تعملي مشترك ريسيفرات عشان عايز اجيب كذا تلفزيون اوصلهم ببعض في البيت ؟؟؟
(الموضوع ده بيحصل دايماً معايا وأحياناً بيطلبوا مني أفك شفرات الشوتايم والايه ار تي واخترعلهم الجهاز اللي بيفك القنوات الأوروبية وبيجيب ماتشات الكورة المتشفره)
...........

وتستمر معاناه طالب الهندسة حيث يظن كل الناس انه سوبر مان اللي بيعمل كل حاجه لكنه غلبان خالص وعلى نياته لدرجة انه بيتخرج وهو مش عارف هو المفروض يعمل ايه أصلاً .. وحسبنا الله ونعم الوكيل ..

شباب هندسه ويل ريليت ..