الموضوع: العلاقة الخفية بين الكباريه .......... و كارفور

اعتبروا الموضوع ده فضفضة لحسن حطق من دماغى


فى العادى انا بنزل أجيب ياميش رمضان قبليه ب10 ايام ولا حاجة تجنبا للزحمة مؤخرا عندى ضغط شغل عنيف بتوصل انى ساعات بشتغل ل 15 او 16 ساعة فى اليوم فا مش فاضى خالص انزل اجيبه

امبارح بس كان عندى نص يوم اشتغلت 10 ساعات بس :)))) فقررت اخد مراتى و ابنى و نروح كارفور أجيب ياميش رمضان ....... و ده كان احد أغبى القرارات اللى أخدتها فى حياتى

ايه ده ؟؟؟!!!!! فيه ايه ؟؟؟؟!!!!!! لو بيوزعوا الأكل ببلاش مش حيبقى زحمة للدرجة دى !!!!!!!!!!!

زحمة غير عادية عمرى ما شوفت كارفور كده فى حياتى خصوصا فى يوم فى وسط الأسبوع

قلت خلاص مش مشكلة حدخل المعترك و خلاص خلينى أخلص مادام جيت بقى

فى قسم الياميش .......... هالنى ما رأيت و ما سمعت

كارفور حاطط كذا نوع زبيب و جوز الهند و الفسدق و اللوز و البندق اللى مش مقشرين فى العراء كده تمد ايديك تعبى و بعد كده تروح توزن الكيس

الناس واقفة بتاكل من الحاجات بطريقة مش طبيعية ...... مش بتدوق انا متأكد ان فيه ناس جاية تتعشى و تحلى كمان

انا أعرف ان الناس ممكن تدوق زبيية او اتنين قبل ما تشترى كيلو او اتنين ...... والله العظيم شوفت ناس بتاكل مالية ايديها زبيب و جوز هند ...... و ناس واقفة بتكسر المكسرات اللى مش مقشرة زى البندق و عين الجمل و بتاكلها و لسان حاله بيقول كارفور دول ناس زبالة مش كانوا يحطوا كسارة !!!!!!

واحده مالية الكيس حاجات و طول ما هى بتلف بتاكل منه لغاية ما وصلت للميزان فى النهاية راحت وازنة اللى فاضل فى الكيس !!!!!

كارفور عامل أكياس متعبية جاهزة مكسرات بس مقشرة بقى ...... واحد و واحدة ماسكين كيس فسدق مقطوع فالفسدق بيقع منه و عمالين يعبوا منه فى ايديهم و فى بقهم قال ايه بيدوقوا و فى الأخر بمنتهى القرف قالتله مش حلو على فكرة رد بهز دماغة ما هو مش عارف يتكلم من اللى فى بقه !!!!!!!

فيه تمر مغلف محطوط فى علب ....... واحدة وعيالها راحوا قاطعين علبة فى الخباثة و فرقوا نص العلبة عليهم قال ايه بيدوقوا برضه !!!!!!

والله العظيم ........... كل أصناف الشعب و فئاته كانت بتعمل كده الراجل و الست و العجوز و الشاب ...... المحجبة و المنقبة و المدندشه ..... الملتحى و اللى لابس حلق فى ودنه ....... كله كله كله كان كده الموضوع كان اشبه بوباء الأنفلونزا سنة 1918

واقف فى الطابور عشان أجيب مكسرات مقشرة (ديه بقى مش محطوطة فى العراء) البياع فوت واحد واقف قبليه بمنتهى قلة الذوق و بيسألنى أنا عايز ايه ..... اتكسفت قلتله الأستاذ الأول مش أنا ...... واحد واقف ورايا بصوت جهورى و بطريقة سوقية "انتوا حتتعازموا على بعض" !!!!!

ادورتله و انا ناوى أطلع فيه تعب اليوم كله ...... رحت مزعق "لأ مش حنتعازم بس فيه حاجة اسمها زوق برضه ولا انت ما تعرفهاش" ....... الغريب انه بدل ما يتخانق معايا جاب ورا زى الجزمة و قالى لا يا باشا اتفضل براحتك !!!!!

وصلت لدورى و طلبت من البياع 2 كيلوعين جمل ....... الراجل راح مطلع شوال شبه فاضى مافيهوش غير شوية عين جمل مكسرين و فرافيت و تراب و بيعبى ...... قلتله "ايه ده ؟؟؟!!!! مش المفروض تحط من شوال جديد ده فاضى أصلا و مافيهوش غير فرافيت و تراب" ...... راح مقلب الشوال يمين شمال فوق و تحت و طلعلى شوية صغيرين فى ايده كده شكلهم كويس شوية و حطهوملى على الوش !!!!!

قلتله انا مش حاخد من ده من فضلك طلع شوال جديد ........ قالى مش حينفع الا لما ده يخلص

كنت خلاص عديت أخرى بشوية ....... رحت راميله الحاجات التانية اللى كنت جبتها و قلتله خلاص مش عايزو سيبتها كلها و مشيت ......... الغريب برضه ان الناس اللى حواليا ماحدش اتكلم و لا اعترض و لاحظت ان فيه ناس برضه أخدت من نفس الشوال بتاع عين الجمل اللى انا رفضته عادى جدا !!!!!!

ايه بقى العلاقة بين كارفور و الكباريه ......... ان زى ما الكباريه اى حد بيشتغل فيه او بقعد فيه كله بياخد ذنوب ........ امبارح كارفور كان كده كله بياخد ذنوب اللى جاى يشتري و بيسرق و اللى بيبيع و بيغش ده حتى أنا أخدت ذنوب عشان كنت عمال أسب و ألعن

بجد شعب أغلبه منافق الا من رحم ربى ....... يتشدقوا بالدين و يملئون المساجد و الكنائس ...... و هم بيسرقوا و يغشوا عينى عينك

ربنا يطلعلنا من البلد ديه على خير ....... قولوا أمين :))))

و يقولك العيب في البلد و العيب في الجيش و العيب في مبارك و العيب في مرسي و العيب في الاخوان و العيب في السلفيين و نسوا ان العيب و كل العيب من الشعب

ربنا يطلعنا منها علي خير ان شالله السودان