السلام عليكم ..
الحمد الله ...
باختصار كدة .. اخوكم مهندس معماري من 2005 .. و بيشتغل في مكتب متخصص في "الاظهار المعماري" و "الكتالوجات" و "الماكيتات" الخاصة بالمشاريع العقارية من ساعتها ... و مغيرتش شغلي لان الحمد الله كنت مرتاح نفسيا ... و صاحب العمل كان بيعملي كانه ابنه يعني ..
للاسف الشديد بعد الثورة .. السوق وقف نسبيا ..(هو مكانش ماوشي اوي) .. , بقى الشغل موجود بس يادوبك على ادي انا و مهندس تحتية و صاحب العمل و 2 محاسبين و فراش ...
كان دايما يقولي لو حصلي حاجة عايزك تكمل باسمي و تبقى شريك في المكتب . و كنت بدات فعلا اقابل العملاء و اجيب انا الشغل و اتناقش في الاسعار و اتخانق على التسليم و القصص دي ... وكنت باخد نسبة صغيرة ولكن الحمد الله مرضية من الارباح
لكن للاسف الشديد ... توفى مديري و صاحب العمل يوم الاربعاء الماضي بدون اي سبب حقيقي .. الراجل صحي يصلي الفجر ... توفى جنب السرير .. الله يرحمه و يدخله فسيح جناته ..
المهم انا كنت تقريبا قايم ب 95% من جميع الاعمال ... و هو كان بيجيب الشغل بس و يتفق على المواعيد و الاموال ..
اولاده مترددين خصوصا بعد ازمة السوق الحالية ... في استكمال المكتب ولا غلقه تماما ...
وللاسف الشديد انا اشتريت سيارتي الجديدة بالتقسيط بعد التشجيع منه و كان كتر خيره بيدفعلي تقريبا 40% من ثمن القسط زيادة على مرتبي لمحاولة مساعدتي يعني ..
وطبعا انا مفيش اي عمل دلوقتي الا حاجات بسيطة يا اما حاجات حتلخلي ابدء من الصفر ثاني ...
مش عارف اعمل ايه بصراحة ...
لسة لم اجلس مع اولاده خصوصا انهم في حالة صدمة حالية ...
اصدقاء اقترحوا عليا اني اقنعم يمولوا مرتبات المكتب 6 شهور قدام مثلا ونشوف عرفنا نجيب شغل ولا لأ ..
اصدقاء تانيين اقترحوا اخد انا المكتب منهم و اعفيهم تماما من اي مصاريف مقابل نسبة كبيرة ليا (لكن للاسف انا لا املك اي راس مال علشان اصرف منه على المكتب).
اصدقاء اخريين اقترحوا اني اطلب مكافئة لنهاية الخدمة كتعويض عن غلق المكتب ...
و في راي بيقولي اكون انا مكتب بتاعي خالص واعتمد على علاقاتي القديمة في اني اجيب شغل .. بس حنرجع لنفس النقطة .. .مفيش راس مال اصلا ...
باختصار وصية الراجل اني اكمل باسمه .. بس الورثة لسة مش راسيين على حل .. لو اني حاسس انه بنسبة 80% حيفضوا المكتب ...
تعملوا ايه لو مكاني ؟؟؟
المفضلات