الموضوع: القاهرة والأسكندريه ومدرسة ابني

فين النصايح يارجاله

خليك في القاهره

شكرا اخي الكريم
في انتظار باقي الأراء

خليك فى القاهرة و لما ربنا ييسر الأمور هات خد أهلك معاك القاهرة

ماهو انا اهلي معايا دلوقتي بس مش عارف اخليهم يرجعو ولايكملو معايا وابقي اذاكر للواد في البيت وخلاص

يعنى دلوقتى ابنك معاك فى القاهرة بس مسجل فى مدرسة فى اسكندرية ؟
لو كده يبقى خليك فى القاهرة و ذاكر له و انقله السنة الجاية أو الترم التانى لأنه كده كده لسه فى حضانة و فى الوقت ده البيت مهم أكتر من المدرسة

اسف اني فتحت الموضوع بس انا كنت عامل موضوع عن شقه في الدور التامن تميلك من غير اسانسير ولا اقعد في ايجار قريب من شغلي احسن بس مش لاقي الموضوع ومش عارف ادخل علي كلامنا عشان مش شغال

وبما ان الموضوع مربتط بمدرسة ابني عشان كده فتحت الموضوع ده

انا اشتريت شقه من سنه في الدور التامن علي اساس ان الأسانسير خلاص هيركب وببساطه صاحبها شربههالي والشقه طلعت محتاجه شغل والسكان مكسلين ومفيش حد شاغل باله بالأسانسير مع ان مفيش بس غير الموتور اللي باقي والدنيا تخلص
المشكله اني حاسس اني اتخميت جامد فيها وكل اما اجي افكر ابيعها الاقي الناس تقولي خساره مش هتجيب وهتخسر فيها وانا موتي وسمي اني حد يضحك عليا وبسبب اني كنت شغال في القاهره خلصت الموضوع كله باستعجال من غير ماسال ولا افاصل ولا حتي استلم الشقه منه وبعديها اكتشفت ان السباكه فيها شغل كتيير وفي حيطه مختاجه تتظبط

كل ده مش مهم وعديته وقلت نصيب ومحدش بيتعلم ببلاش واستحمل واهي رياضه علي السلم كل يوم

مشكلتي دلوقتي مع ابني اللي كان كاره القاهره مووت وعايز يرجع لأسكندريه دلوقتي بقي عايز يرجع القاهره تاني وبقوله ليه ياحبيبي قالي عشان السلم ورجلي بتوجعني منه عشان كل يوم بينزل ويلطع ومفيش حد فيه نفس ييشيله

وانا خايف لايتعقد ويكره المدرسه وكل اما يعدي علي الدور الأول ويشوف الشقه اللي كنا ماجرنها يقولي هاتلنا دي يابايا احسن من اللي فوق عشان مش قادر امشي

وانا كمان بصراحه نفسي اخدها تاني عشان اريح نفسي لاني بجد بتعب من السلم وقرفه وخصوصا لما نبقي في مشوار ولا عند اهلي ومروحين بالليل والعيال نايمه ببقي طالع الشقه شايف اللاب والشنط والواد ومراتي شايله برده الواد التاني وشنط وبنوصل بنطلع في الروح

بفكر دلوقتي في اجازة نص السنه اخد عفشي واطلع علي شقه ايجار تكون قريبه من الشغل والمدرسه وفي دور قريب وفي مكان نظيف بدل المكان المعفن اللي انا قاعد فيه واريح نفسي بقي واسيب دي لما يجيلها بيعه كويسه او الأسانسير يركب

واهو اوفر وقت ومجهود وبهدلة عربيه
انا دلوقتي في سيدي بشر قبلي والطريق بيخبط ساعه كل يوم وبوصل السلم يكمل عليا وشغلي في سموحه

ياريت تفيديوني

يا مهندس حضرتك اخترت خلاص
توكل على الله واعزم وماتبصش وراك