الموضوع: عايز أروح الموسكي ( سنتر درب سعادة )

حبيبى هى دى المشكله انك هتركن بعيد (جراج الاوبرا ابعد من محطة مترو العتبه و انت جاى من الموسكى و كده كده بكره الجمعه المترو فاضى) على العموم الوصفه بالظبط انا مش عارف انت جاى من الدائرى ولا من طريق بلبيس بس لو جاى من الدائرى كمل و انزل نفق السلام و لو جاى من طريق بلبيس خش على اسماعيليه الصحراوى و ما تطلعش كوبرى الحرفيين و لف من تحته و ارجع و خش يمين على الدائرى من قصاد موقف العاشر ...
هتمشى حوالى 10 كيلو هتلاقى مدخل المطار على يمينك و بعديه ب 200 متر منزل يمين (منزل الماظه) تنزل و تمشى هتلاقى كوبرى الجيش تطلعه و تكمل طوالى هتلاقى كوبرى فوقك بالعرض تعدى من تحته و تلف يوترن و ترجع تاخد من جنب الكوبرى يمين (كأنك دخلت شمال من اتجاهك الاصلى) كده انت فى الاوتوستراد هتكمل طوالى لا يمين ولا شمال هتعدى ميدان الساعه (اول عباس العقاد) و بعده اشارة رابعه (شارع الطيران) و دى اول اشاره هتقابلك و بعديها اشارة يوسف عباس و المنصه ... بعد المنصه هتلاقى مطلع لكوبرى اكتوبر ما تطلعوش و خش يمين و امشى تحت الكوبرى (امسك شمال) هتوصل لاشارة صلاح سالم (خلى بالك خليك فى لاشمال عشان تعرف تخش شمال) هتخش فى الاشاره شمال و طوالى هتلاقى كوبرى الفردوس تطلعه و بعديه تمسك النص عشان تنزل نفق الازهر هتطلع من النفق تخش شمال فى شمال فى شمال حوالين الميدان (هتلف الميدان 3\4 لفه) بحيث جراج الاوبرا هتلاقيه على يمينك بعد ما تلف و تخش معاه يمين هتلاقى المدخل
ربنا معاك