زجاج اللوجان الخلفى مش عايز يقفل

**mabdelaziz** · 26-07-2012 02:48 PM

كل عام وانتم بخير جميعاً

النهاردة نزلت أعمل مشوار بالعربية وقلت أفتح الإزاز كله عشان الحر, وياريتنى ماكنت فكرت فى الفكرة دى
الإزاز الخلفى عصلج ومش عايز يقفل

المشكلة دى حصلت معايا قبل كده بس بعد ما حاولت مرة تانية قفل

المرة دى بقى معصلج ومش عايز يقفل خالص

حاولت وفكيت المكان اللى فيه الزراير وقعدت أنفخ فيه شوية عشان الترات

وفتحت علبة الفيوزات وقعد أتبت عليها بس مفيش فايدة

حد يعرف حل سريع للمشكلة دى عشان مش حقدر أروح التوكيل النهارده

وياترى ممكن التوكيل يكون فيه طوارئ ويبقوا شغالين الجمعة؟

**Egyzizo** · 26-07-2012 03:36 PM

حصلت معايا ، ورحت لكهربائى فك المفتاح ونضفه واشتغل تانى.

**mabdelaziz** · 26-07-2012 03:56 PM

أنا كنت فعلاً قرأت عن المشكلة دى هنا فى المنتدى بس ماقدرتش أوصل للموضوع
وفاكر حكاية فك المفتاح وتنظيفه وحاولت أعملها فعلاً بس مفيش فايدة
هو الكهربائى فك الزراير نفسها ولا القطعة البلاستيك اللى راكب فيها الزراير على بعضها؟
أنا اللى قدرت أفكه القطعة البلاستيك كلها, وخفت أقرص على الزراير لا تتكسر معايا

شكراً على الرد على كل حال ونخدمك فى الأفراح إن شاء الله يا زيزو باشا

**Egyzizo** · 26-07-2012 06:03 PM

لأ فك الزرار نفسه وأخده جوه الورشة ونضفه.
الزرار بيتشد عادى وبيتفصل من الكهرباء بكلبس.

**mostafamndy** · 26-07-2012 10:16 PM

عاوزة تنظيف ...

**mabdelaziz** · 27-07-2012 12:47 AM

متشكر جداً يا جماعة لاهتمامكم وردكم
هحاول أنظفه كويس إن شاء الله

**mabdelaziz** · 28-07-2012 12:52 AM

الواحد والله مكسوف من نفسه مش عارف يقول إيه!
بس اعتبروها تخاريف صائم بقى :)

أنا أعرف إن الزرار اللى تحت الهاندبريك بيقفل زراير الزجاج الخلفى, ومع ذلك مجاش فى بالى خالص أبص عليه وقعدت أفك فى الزراير وأنظفها وشيكت على الفيوز وفى الآخر أكتشف إنى دوست على الزرار ده من غير ماخد بالى

مش عارف لو كنت رحت التوكيل فى الموقف ده كنت ممكن أحس بإيه؟

نصيحة لأى واحد تحصل معاه المشكلة دى أول حاجة يتأكد منها هو الزرار اللى تحت الهاندبريك