محتار في عربية شبابي في حدود 70 الف !!

**mikydod** · 30-07-2012 07:49 AM

لو سمحت يا جماعة انا بقالي شهر بدور علي عربية حلوة ليا
وانا شوفت عربية واحد صاحبي ( i30) هوة عارضها للبيع عشان مسافر ب 70 الف موديل 2009 ... والصراحة عجباني اووي لاني بحب التكنولجيا في العربيات (طارةة ملتي فانكشن والشغل دة)
بس انا مش عارف اقرر ولو في عربيات تانية حلوة ممكن نفيدوني لو سمحتم

**S O P H O S** · 30-07-2012 04:22 PM

الاي 30 جميلة لو انت واثق فحالتها توكل علي الله
بس هي ماشية قد ايه ؟؟

**omar-saad** · 30-07-2012 07:44 PM

بيجو 307
وفيها كل التكنولوجيا اللى انتا عايزها

**mikydod** · 02-08-2012 09:45 PM

طب حضرتك البيجو دي عاملة كام ؟

**Dawns_Mist** · 03-08-2012 07:13 PM

لو حالة الهيونداي حلوة توكل على الله حلوة و سعرها كويس و يمكن دي من انضف العربيات الهيونداي في مصر ..
في نفس السعر برضه البيجو 307 حاجة وهم و كانت معايا فترة مالهاش حل و يمكن من أفضل العربيات الشبابي في الفئة دي .. لكن قطع غيار فعلا غالية و كهربا متعبة نسبيا ..
هتلاقي استعمال في البومة و الصني بالسعر ده لو عايز تمشي في المضمون و تريح بالك ..
هتلاقي كمان جين 2 استعمال في السعر ده و عربية محترمة و شبابي و قطع غيارها أرحم بكتير من البيجو ..
هتلاقي فوكس 2007 برضه في نفس الرينج ممتازة و قطع غيارها برضه متوفرة شوية لكن صيانتها صعبة ..
دور على إيبيزا مش عارف هتلاقي بالسعر ده ولا إيه بس مالهاش حل برضه ..
ميجان هاتس باك عسولة جدا ..
نيسان تيدا هاتش باك منتهى الجمال و شبابي و توكيل محترم و قطع غيار متوفرة و موتور كويس ..
ممكن تجيب كريستالة و تسقط مكنه حلوة مع طقم عفشة رياضي مع شنطة و شبكة ميراج و جنوط بقى معاك ميراج و كل ده مش هيكمل 60 ألف كمان بس محتاج واحد رايق و دماغه فاضيه أسبوعين تلاته كده لكن في الآخر هيبقى معاك عربية تحلف بيها بمكنه 2400 سي سي لو تحب كمان ..

لازم الأول تكون محدد انت من النوعيات الزهوقة اللي زيي كده .. تزهق و تتنرفز لو مالقتكش قطع الغيار اللي على مزاجك و ممكن تبيع العربية تاني يوم لو ده حصل معاك يبقى تبعد عن البيجو و الإيبيزا و الفوكس و الميجان .. دماغك رايقة و بتعرف تلعب في العربيات ممكن تسقط بومة و تلعب براحتك أو كريستاله و تلعب براحتك أوي كمان .. بتحب تتعامل مع التوكيل هتدور على تيدا و تتعامل مع التوكيل و الهاتش باك منها شبابي جدا .... شوف مودك الأول قبل ماتنزل سوق المستعمل ....

**mikydod** · 04-08-2012 10:33 PM

شكرا لمشاركتك</B>Dawns_Mist

بص انا ممكن ادور علي قطع غيار بس انا عارف ان البيجو قطع غيارها معمرة عشان والدي عندوا بيجو من زمان وماشاء الله عليها عربية صح

بس لقيت ناس بتشتكي من البيجو 307 من التكيف ومشاكلها كتيرة

فانا مش عارف الكلام دة صح ولا لا

وانت رايك انهو الاحسن من حيث السفر والاستحمال وكدة ( i30 ولا البيجو307)

**Boory** · 04-08-2012 10:45 PM

اظن ان افضل حاجة جين 2
وده راي

**Mohab.Nabil** · 05-08-2012 12:17 AM

307 و citroen c4 عربية واحدة بشكلين مختلفين

لو قارنتهم بالـ i30 انا شايف اى واحدة منهم تكسب بس لازم الحالة الممتازة عشان لو جبت عربية من دول متهانة هتزهق من كل العربيات

بس لو الـ I30 اللى قدامك حالتها حلوة و ضامن صاحبك و العربية شكلها كويس توكل على الله عربية كويسة برضه و اهم من النوع فى المستعمل الحالة لأن لو حالة وحشة فعلا بتكره الواحد فى عيشته