الموضوع: [بالفيديو] النيسان جوك !! واول تقييم لتسارع السيارة بتجربة شد مع اللانوس والفيرنا

السلام عليكم ورحمة الله وبركاته

امبارح كان فطار نايل موتورز وكان يوم اكثر من رائع ويوم جميل

قابلنا فيه اعضاء نايل موتورز فطرنا وكلنا عيش ولحمة مع بعض

مع ان الواحد كان حاسس بشوية من الضيق بسبب ان الياريس اتخبطت وانا رايح الفطار

عربية جيب موديل قديم وقفت قدامي فجاءة وانا ماشي على سرعة 30/40 مع ان كان فيه مسافة كافية للتوقف بس مش عارف ايه اللى حصل !! ؟

يظهر ال ABS هنج فلبست فيه

الخسائر الاكصدام اخد Box وفيه حتت منه اتكسرت من قدام والكبوت مش بيقفل واتعوج من اخره

الحمد لله على كل شئ وقدر الله ماشاء فعل !!

بعد الفطار وفي اثناء ما احنا بنتكلم عن العربيات عرض احمد عبد الهادي "Lanos2004"

لانوس فيها ماتور 2 كامة 16 صمام

انه يجرب تجربة تسارع من 0:100 مع عربية اشرف "Ashraf_ibrahim" الفيرنا !!

انا نصحته وقلتله يابوحميد الفيرنا في الاول صعبة وبلاش احسن بس هو مارضاش يسمع الكلام

وقد كان !! طلعنا على طريق قريب من الحديقة الدولية وكان فيه مساحة كافية نوعا ما لتجربة التسارع

عد بالكلاكس يا كبير 1 / 2 / 3 !! الفيرنا ماشاء الله بتطلع بنطة وتقوم فارقة بعربية تقريبا

وعند الغيار التاني الفرق بيزيد حبة كمان !! والتجربة انتهت بإنتصار المارد الكوري

ابوحميد مش مصدق وقالك نجرب تاني !!

اشرف ابراهيم وثيق من الفوز قالك نجرب يا معلم وماله !!

بيييييييب بيييييييييييب بيييييييييييييييييييييييي يييييب !! كالعادة الفيرنا بتقفز وتكتسح وتنتصر الفيرنا للمرة التانية على التوالي

ابوحميد لسه مش مصدق ايه اللى بيحصل !! ياعم قلتلك بلاش ابعد عن المارد الكوري !! برضوا مافيش فايدة وقالك اخر محاولة عشان التالتة تابتة

بيييييييييب بيييييييب بييييييييييييييب !! نفس الكلام انتصار ساحق للفيرنا

بس اللى لاحظته حاجة !! الفيرنا ماشاء الله في الاول بتنط وبتطلع طلعة اكثر من ممتازة في حين الانوس العجل بيفرك على الارض والعربية واقفة مش بتتحرك !!! وده بيحصل على الغيار الاول والتاني فبيضيع عزم العربية كله في الفرك

مش عارف بقى ده عيب سواق ولا مشكلة في الكاوتش الله واعلم !!

رجعنا المطعم الفيرنا منتصرة طبعا مافيش كلام بنتيجة 3-0 وما احلى طعم الانتصار

الموضوع سخن بزيادة واحمد عبد الهادي قال :

الفيرنا اخرها تطلع مني في الاول بعد كدة بجبها واسبها وامشي !!

اشرف ابراهيم : مافيش الكلام ده اللى بيطلع في الاول بيطلع في الاخر

كريم فوزي : صاحب فكرة اننا نطلع نجرب بقى على العالي والماية تكدب الغطاس

وقد كان طلعنا على طريق NA لتجربة العربيتين !!

دخل معانا في الفكرة بسام حافظ "BassamHafez" بعربيته النيسان جوك واللى كانت مفاجاة من العيار الثقييل !!!

انا مش هحكي اللى حصل في التسارع وهنسيب الفيديو هو اللى يتكلم علما ان التسارع بدا من سرعة 60 تقريبا

Nissan Juke Vs Verna Vs Lanos Drag race acceleration - YouTube

الجدير بالذكر ان عربية احمد الانوس كانت حاطة بنزين 80 وماشي بزيت الماتور 12 الف كيلو !!

في نفس الوقت اشرف ابراهيم قال ان العربية فصلت منه على الغيار التاني لانه جاب 100 على التاني وبالتالي تراجع لورا وده سبب الهزيمة !!!

بس اعلق على الرد ده بحاجة :

الاول كل ماواحد يحكي انه طلع من عربية كوري ... (الكوريين) يقولو عيب سواق !! طب جبنا واحد من هونضاي تيم !! وبرضوا بتقولو عيب سواق

طب نعمل ايه تاني ؟؟؟؟

اما النيسان جوك !! فبصراحة بسم الله ماشاء الله

فعلا كانت مفاجاة من العيار الثقيل انها تثبت مع الفيرنا !!! خصوصا العربية لسه جديدة يعني الماتور لسه ممكن يتفتح اكتر وهتلاقي منه اداء احسن من كدة

بس كون انها تثبت مع الفيرنا وخصوصا عربية قوية زي عربية اشرف ابراهيم !! يبقى لازم نرفع القبعة احتراما للنيسان جوك

10/10 يا بسام وربنا يباركلك فيها ويحفظهالك من العين

منتظر تعليقاتكم >.... !!