الموضوع: Punto Evo 2012 VS. Golf 5 2008

السلام عليكم

كنت في رحلة اختيار سيارة زيرو هاتشباك اوتوماتيك و كنت شبه مستقر على البونتو ايفو على الرغم من الوكيل اوماترا ... انا في كل الحالات هجيب قسط فكان المعروض قدامي في نفس الفئة السعرية الايفو و ال RB هاتشباك و السريون و كنت ممكن اضغط للسيراتو هاتشباك برضو

الكورى ماليش تقل عليه و انتوا عارفين دي راحة نفسية لأن كل العربيات لازم يطلع لها مشاكل و لو الواحد مش مستريح مع العربية اصلا مش هيستحمل فيها اي حاجة صغيرة علشان كده تجنبته بالاضافة لأن الثبات بيكون اعلى في الاوروبى و الياباني

بس كنت بتكلم مع صديق قالي انت ممكن تقسط عربية جولف 5 طالما معداش على الموديل 5 سنين يعني قول 2008-2009 (الشراء هيكون تقريبا على اول السنة الجديدة) ... و هتبقي تقريبا نفس الفئة السعرية من 95-120 الف


بس دماغي رنت رنتين واحد حلوة و التانية

الرنة الأولى: الفكرة ممتازة و الجولف تحفة موتور احسن من الايفو طبعاً (العيب الأول في الايفو بالنسبة ليا) الثبات و الامان مش هيكون ابداً اقل من الايفو و قطع الغيار هتبقي متقاربة نوعاً ما من حيث السعر و التواجد و موديل 2008-2009 في عربية زي دي مش هيقرفني (الواحد عايز عربية تريحه مش تقرفه)

الرنة التانية:
و دي هتبقي DSG ولا تيبترونيك ؟ طبعا بعد ما الواحد قرا مواضيع اصحاب الجيتا و الجولف و الايبيزا و مشاكلهم مع ال DSG يخليني اقول لا لأي حاجة فيها الجير بوكس ده



السؤال بيقول: هل الجولف 5 الجير بوكس فيها DSG ? لأنها لو كده يبقي مفيش نقاش تماماً و كده هتخرج من حساباتي

و السؤال التاني للنقاش ايه رأيكم في الفكرة الايفو لو وقفت جنب جولف 5 تخسر بس لسه موضوع دي زيرو و دي مستعمل (مش متبهدلة اكيد) ... خصوصا ان الاتنين نفس السعر تقريباً


معلومات اضافية:

الايفو ديول لوجيك الفئة التانية 115 الف ...

لاحظت ان في من ال جولف 5 اللي نادر ما بلاقي حد عارضها للبيع في الموديلات 2008-2009 ان بعضهم كاتب tiptronic او ستبترونيك و اماكن تانية كنت قريت انها DSG

و اللي اضاف الاضافة الرهيبة اني لقيت واحدة معروضة على كونتكت و الراجل ربنا يجازيه خير يعلنها صراحة السيارة تحتاج لعقل فتيس Gearbox control valve

و هو ده اللي كان خلاني مش قادر افكر اكتر فيها لأن لو المشاكل هتقرب من الجيربوكس و الموتور مش هقدر عليها اكيد.

لو حد معاه جولف 5 يكون افضل يفيدنا

و اللي عنده خبرة عموما في النوعية دي من السيارات يفيدنا برأيه




جزاكم الله خيراً :)