الموضوع: اتخانقت مع عربجى مكروياص من شويه

كنت ماشى من نزلة كوبرى اكتوبر بتاعت احمد بدوى فى شبرا مصر والطريق ده اخره علطول شارع شبرا يا يمين تدخل شارع الترعة

كان قدامى ميكروباص اجره اسكنريه معفن وكل شويه يقف ينزل حد قلت ماعلينا عديته وبقيت على يمينه ونورت اشارتى عشان ادخل يمين قدامه وادخل شارع الترعة وهو ماشى جنبى ومش عايزنى اعدى

وانا افتكرته داخل معايا الترعة اتاريه مكمل علطول لشارع شبرا ومعندوش اشارات ينورها اصلا

فضل ماشى علطول لحد ماكبس عليا ماهو داخل شمال وانا يمين وبيزعق من الشباك رحت وقفت ونزلت ونزلى وبيقولى انت احول قلتله دانت اللى احول انت مش شايفنى مولعلك اشاره يمين قاللى انت مولعتش حاجة..
قلتله يعنى انت واخدها بلطجة يعنى!!!!

نزلى عيل متسول معاه غالبا التباع وبيقولى اه بلطجة..قلتله امشى يالا العب بعيد

طبعا خناقتى معاه وقفت كل الطرق

وكان فيه كمين احمد بدوى وفيه ظباط وامناء شرطة ومرور
جه ظابط حاشنى وجه كام امين شرطة حاشوه وركبوه المكروباص

والظابط وهو بيحوشنى بيقولى على فكره انت غلطان بصتله واستغربت!!بيقولى انت شكلك محترم وابن ناس ينفع اللى عملته وتبهدل نفسك مع الاشكال دى!!

سكت وعادها تانى وقاللى صح؟؟مش انت غلطان برضو؟؟
قلتله عندك حق انا غلطان

وركبت ومشيت وانا تعبان من حال بلدنا

اللى ضايقنى من كل ده انه شاف البلطجى ده نازل يتهجم عليا هو والصيع اللى معاه وبيقولولى هى بلطجة قدامه وهو ولا عمل اى حاجة وطلعت انا غلطان انى عايز امشى فطريقى فحالى

وخاف يتكلم معاه..وحتى الصيع دول معملوش حساب ان فيه شرطة وكمين لا ونزلوا عادى وبيبلطجوا
يااااااااه فين ايام زمان لما كانوا يترعبوا لما يشوفوا عسكرى بس

ربنا يستر عليكم وعلينا

معلش العيب مش فاصحاب الميكروباص
العيب فالبشوات الي بيقفوا يتفرجوا وخايفين منهم
وفالاخر بيقولك انت الي غلطان !!!

فعلا عندك حق

يا باشا البلد دى بقت ماشية كدة والله انا قريب بالصدفة كنت فى موقف عبود بوصل ناس قرايبى وقلت اركب مواصلات ركبت ميكروباص رمسيس من هناك حتته عيل ميجيش 14 سنة واقف يتنك ويحمل المكروباص والاغرب انه طلع هو السواق بعد ما مشى مفيش 3 دقايق كان فى كمين معرفش اسمه اية الصراحة والله الواد بيرخم على الكمين ووقف ادامهم فى نص الشارع رخامة ولا بينزل حد ولا بيطلع حد بعد مش تانى رخامة على الظباط عشنا وشفنا عيال بيعملوا اية بصراحة السلوكيات الزبالة دى الى بتخلى ناس كتير يقولوا الله يرحم ايام زمان كانت احسن من كدة

يانهار ده عبود فظيعة هى ومكروباصاتها..دانا خبره فيها :)

بتوع الميكروباسات دول انا بقه بقفل عليهم الطريق ولو مش عاجبه يضرب راسه فى الاسفلت

انا بكون فحالى ومش عايز ارخم على حد ومبحبش المشاكل

خلي الاولاد يلعبوا
ده عز وقتهم دلوقتي وهيرجعو فراخ بعد كدة
شلنا طنطاوي .. مش هنعرف نشيل حبة جرابيع ورعاع زي دول؟
وعلى العموم انا معايا احتياطاتي ومش محتاج ولا شرطة ولا زفت

يارب كلامك يكون صح..احنا تعبنا بجد

انت الغلطان.....

لانك على شماله وعايز تدخل يمين من تاني حارة

الصح انك تهدي وتبقى وراه وتمسك الحارة اليمين علشان تدخل يمين

لكن اللى انت عملته انك كسرت عليه طريقه ، واى كان انت اديت اشارة ما ديتش اشارة

ده لا يعفيك من خطا فى القيادة وانت اللى اتسبتت فى الموقف

ده غير انك وقفت الشارع ونازل تتخانق وعطلت حركة سير المرور

قبل ما تشتكي ، حاسب نفسك الأول وشوف انت عملت ايه

ازاى يافندم انا اللى غلطان ؟؟
انا نورت اشارتى عشان ادخل يمين باحترام ومدخلتش كسر زيه وكنت سابقه اصلا بتلات ارباع عربيتى
وانا اصلا كنت وراه بس هو اللى بيقف كل شويه يحمل وينزل فعديته باحترام وقلت اجى قدامه يبقى انا اللى غلطان؟؟رغم انه وقف قبلها من غير اى سابق انزار وكنت هالبس فيه وجيت داخل يمين فضل مكمل وحكلى العربيه واجبرنى اقف لانه اصلا سد مدخل شارع الترعة كله مش انا وانا كنت واقف عمودى عليه..يبقى انا اللى غلطان ووقفت حركة المرور؟؟
هو المفروض افضل وراه ويقف كل شويه وافضل وراه مستنيه لغايه مدخل يمين؟؟؟هو ده الصح؟؟
وانا نزلت لما لقيته داخل فى نص عربيتى عشان يكمل طريقه وعايز يكسر تعب وشقى السنين ومكمل فى العربيه ووقف وسد الشارع عشان ينزل كمان يزعق ويشتم
كل ده وابقى انا الغلطان؟؟واحاسب نفسى؟؟
حضرتك فعلا فكرتنى بالظابط لما قاللى انا اللى غلطان فعلا