الموضوع: متسوبيشي لانسر بومه 2013

ماشاء الله ربنا يباركلك فيها بس ياافندم ياريت تقولنا جبتها بكام ومنين

المشاركة الأصلية كتبت بواسطة flavio_egypt

الف مبروك وربنا يعطيك خيرها ويحفظك من شرها
ممكن سؤال بس حضرتك اشتريتها منين وجبتها بسعر كام والفئة الاولى فى الاتوماتيك برضه سعرها كام
وجزاك الله خيرا

الله يبارك فيك ياباشا

بالنسبه لسؤالك .. أنا جبت العربيه من التوكيل دايموند موتورز نفسه

وسعرها الكاش 130 ألف (الفئه بتاعتي اللي هي هاف سبورت)

وتقريبا على مااعتقد كده الفئه الأولى في الأوتوماتيك كانت ببحوالي 113 ألف

بس انت ممكن تسأل عند سمير ريان هاتلاقي السعر أقل بحوالي 1000 جنيه

بالتوفيق ياباشا

المشاركة الأصلية كتبت بواسطة jackson_75

ألف ميروك على العربية
أنا كان معايا لأنسر خليجى 2009 وبصراحة كنت مستمتع بيها جداً بس للأسف حصل ظروف لأداعى لذكرها هنا ومكملتش معايا , وحالياً بدور على عربية جديدة بس لما رحت أتفرجت على الأنسر لقيتها كلها بفتيس مزدوج ومفيش منها خليجى وبصراحة موضوع الفتيس المزدوج مضايقنى جداً وكنت أفضل فتيس أتوماتيك بس , وكمان شكل العدادت فى موديل 2009 كان أحلى بكتير بس دلوقتى بحس أنهم مسترخصين أوى .. ولأ أيه رأى حضرتك لأنى بصراحة محتار جداً وشكلى كده هاجيب الهوندا سيتى 2013 لأنى لأحظت أن شكلها أحلى بكتير من جوه ومن برة وكمان فتيس أتوماتيك 5 غيار

كلامك يحترم طبعا بما إن حضرتك ركبت الموديل اللي قبل كده , وكمان كانت مواصفات خليجي

لكن بالنسبه لموضوع العدادات أنا شايف ان بقى شكلها أحلى دلوقتي وغيروا الشكل التقليدي بتاعها اللي كان ثابت من أول مانزلت البومه , وبخصوص الفتيس الستيبترونيك , أنا لحد دلوقتي مريحني ومافيش منه شكوى , ممكن بقى حضرتك تكون أدرى مني بحكم انك سوقت اللانسر بالفتيس القديم

أما عن موضوع المقارنه بين اللانسر والهوندا .. أنا عن نفسي باحب الانسر أكتر ده غير فعلا ان قطع الغيار هاتبقى أغلى , وفي الأول والآخر ده اختيارك انت , بس أنا مش عارف الهوندا سيتي ارتفاعها عن الأرض ايه لأن الهوندا سيفيك واطيه جدا على الأرض مع انها عربيه فخمه جدا لكن للأسف ماتنفعش في شوارعنا هنا

المشاركة الأصلية كتبت بواسطة limo

ربنا يحفظهالك يا رب ويكفيك شرها
انا حاسس ان الفيرانى بتاع الموديل ده فاتح شويه عن موديل 2008 و 2009 بس بسم الله ما شاء الله اللون جامد اوى عليها ربنا يباركلك فيها يا رب

أولا الله يبارك فيكم جميعا .. متشكر على مشاركاتكم

وبالنسبه ياجماعه لموضوع اللون , هو فعلا اللون الفيراني بقى ينزل أفتح شويه زي ماشوفتوها كده في الصور , بس الموضوع ده مش في الفيراني بس , قالولي في التوكيل ان الألوان كلها بقت تنزل أفتح يعني حتى النبيتي بتاعها بقى لونه قريب من الأحمر

وبخصوص الأعضاء اللي كانت بتسأل عن سعر العربيه , هو سعرها من التوكيل 130 ألف (الفئه الهاف سبورت)

المشاركة الأصلية كتبت بواسطة mkhayiat

الاخ العزيز اولا الف الف مبروك ربنا يعطيك خيرها ويكفيك شرها....ركبت جديدا وعشت سعيدا باذن الله
انا معايا 2012.....كل الملاحظات اللى حضرتك قلتها صحيحة وموجوده عندى ما عدا ان لمبه الاير باج بتنور عندى....وانا لاحظت انهم فى التوكيل لما تقولهم على حاجه زى دى اسهل حاجه يقولك بطلوا ينزلوها فى ....2013 زى نور لمبه الولاعه والطفايه....ونور الفتيس الاوتوماتيك ...بس دا صحيح لانه مفيهوش لمض ...كتابه بس...ما علينا...والحاجات اللى مش موجوده زى الطفايه والعده ...الخ ....مضبوط مبتنزلش مع العربيه
ثانيا ...العربيه تحفه بكل المقايس اللى احنا بنحتاجها واكتر شويه...بمعنى مش مقايس الشكل الروش والاوبشن الفظيعه زى الكرسى اللى بيهرشلك فى ضهرك.....انا بتكلم على مواصفات عربيه متناسبه واكتر مع احتياجات الاسره المصريه من كل النواحىز
ثالثا....هتلاقى عفشه العربيه ناشفه حبتين فى الاول وده عادى عشان جديده وعفشه رياضيه بالظبط بعد 4000 كم هتلاقيها زى الفل.
رابعا ...الفرش اللى انتى عملته اكثر من تحفه وهو نفس الفرش الجلد الاصلى اللى كان بينزل فى الخليجى .....ما شاء الله لاقوه الا بالله...ربنا يبعد عنك الحسد ويحافظ عليك اولا وعليها ثانيا.
خامسا....انا تحت امرك فى اى سؤال خاص بالعربيه او الصيانه.
واسف على الاطاله ...والسلام عليكم ورحمه الله ....اخوك د محمد الخياط

شكرا أخي العزيز على المشاركه وعلى التهنئه . . الله يبارك فيك
وشكرا على ردك في موضوع العفشه انت كده طمنتني وبالفعل انا ابتديت احس شويه شويه ان العفشه بتاعتها بقت أريح شويه من أول مااستلمتها .

أما بخصوص الفرش , برضه متشكر جدا على رأيك فيه وهاتلاقي انا عامل مشاركه ليا عن الفرش بالتفصيل لو حبيت تستفيد منها , وفعلا كلامك مظبوط الحاج أحمد لما عملي الفرش قاللي انا هاخليهالك زي السوبر أكشن لأن التفصيله اللي اتعملت في عربيتي نفس اللي بتنزل في السوبر أكشن فعلا
وأخيرا .. متشكر جدا لحضرتك وأكيد لو احتجت حاجه في العربيه هابقى اسألك وآخد رأيك ان شاء الله
وياريت أشوف حضرتك في رابطة اللانسر البومه لأني متابعها باهتمام وأي خبرات بحاول اقراها لأن الناس هناك عاملين شغل حلو ماشاء الله