هوندا سيتى مستعمل 2009 ولأ رينو لوجان زيروووو2013

**jackson_75** · 20-08-2012 01:53 AM

السلأم عليكم ورحمة الله وبركاته
أنا محتار وكنت عاوز نصيحتكم , هل أشترى هوندا سيتى بحالة جيدة مستعملة وتكون موديل 2009 أو 2010 ولأ أشترى رينو لوجان زيرو بريحة الفابريكة موديل 2013 ... على فكرة أنا سفرياتى كتير ما بين القاهرة وطابا ونويبع وتقريبا عايش معظم وقتى فى جنوب سيناء .
شاكر جداً لحضراتكم وكل عام وأنتم بخير.

**S O P H O S** · 20-08-2012 04:10 AM

هو الزيرو زيرو وجميل
لكن لو السيتي بحاجة ممتازة الي حدا كبير انا اميل ليها هيا
مجرد راي فقط
والله اعلم
بالتوفيق ..

**Dawns_Mist** · 20-08-2012 05:02 AM

السيتي كعربية أعلى من اللوجان طبعا و فيه فرق في الإمكانيات و الكماليات كمان ...
لكن المشكلة بس في الحالة اللي قدامك ..
لو حالة السيتي تمام .. توكل على الله لإنها في السفر أكيد أحسن بكتير من اللوجان ..
ولو حتى استقريت على اللوجان بإذن الله مش هتزعلك و هتوفرلك في المصاريف .. بس السيتي أعلى منها

**hugan** · 20-08-2012 05:07 AM

اللو جان
اكثر انتشار
واكيد ليها مزايا الانتشار الكبيره
السيتي نادره جدا في الشارع
وطبعا ليها عيوب عدم الانتشار المعروفه
لكن لو ما يفرقش يبقي سيتي

**jackson_75** · 21-08-2012 03:07 PM

ياريت يا جماعة بعد أذنكم حد يرد على سؤالى الأخير ويدلنى

**ahmedeihab** · 21-08-2012 03:10 PM

السيتى لو بحاله الزيرو اتكل على الله

لكن منصحكش بالوجان

^_^

**Y a r i s** · 21-08-2012 03:26 PM

حبيب قلبي رغم اني تويوتاوي اصيل
لكن شهادة حق احاسب عليها يوم القيامة انا كان عندي اللوجن. واحب اقولك ان كفائة عربية ياباني مستعمله تسوى كفائة عربية رينو جديدة حتى يا اخي الماتريل تفرق الثبات يفرق. توفير البانزين يفرق. نوعية العزل الداخلي للصوت والحرارة والغبار والتلوث تفرق في الهوندا اركب وسك القزاز. تفصلك تماما ً عن العالم الخارجي. شغل تكيفك في الهوندا واسحب بطنية وناااااااااااااااااام وغفلك ساعتين براحتك ياريس في اللوجن القعدة ناشفة وحرارة بتيجي من نحت التابلوة وشبابيك قزاز ضعيفة
في الهوندا قطع الغيار بتعيش وتعيش وتتوارثها الاجيال. في الرينوا. قطع غيارها عادية جداً وسعرها بنفس اسعار قطع غيار الياباني. فبعد ده كلوا .... لو عاوز تشم ريحة الفبريكة اشتري لوجن. وهيا يومين هتشم فيهم ريحة الفبريكة. وبتروح مع اول سوجارة هتولعها في العربية وتشم روائح غريبه عجيبة.

الثبات ذات نفسوا بيفرق. جامد في الهوندا هتسوق على ١٢٠ و١٤٠ وانتا سايب الدريكسيون. او مسكو بطراطيف صوابعك
في اللوجن هتحضن الدريكسيون. وتمسكو بايدك واسنانك ورجلك وتبقى سايق على اعصابك
في الهوندا لمن تبقى مدايق او زهقان كفاية ياباشا تاخود بيها لفه تجدد من معنوايتك وترفعها
في اللوجن هتنزل منها وتقول ياااااااا ساتر اخيراً وصلت دي البلد بقت فظيعه والعيب مش في البلد طبعاً
لان البلد معيوبه من زمان هههههههه

@@@@@@@@@
ده حتى لمن يكون راكب معاك ناس. وتيجوا توصلوا مشواركوا وتسك القزاز وتقول يالله يا جماعه ننزل
في الهوندا هتلاقي الي جمبك يطمطع ويقلك لا رووحوا انتوا وانا هستناكوا في العربية خلوني قاعد شوية
في اللوجن هتبص تلاقي كل الي معاك وانتا في نص الشارع وقبل ما تركن فتحوا الاربع ابواب ونزلوا جررررررري وتقعد ياعيني تقولهم يا جماعه استنوا مش كده اصبروا عليا شوية لحد ما اركن العربية. وهكذا ياباشا.
@@@@@@@@@@
حتى شوف مسحات الامامية للوجن الجديدة الي بتمسح القزاز. نصوا وتسيب نصو. وتيجي تضرب رشاش. المية تبص تلاقي العربية الي وراك بتزمرلك وتقولك ايه يا عم غرقتنا. هههههههههههههه. وشوف رشاشات ومسحات الهوندا. ومساحت الرؤيا في العربيات القديمة. فهتلك هوندا قديمة ياباشا برقبت عربية فيرنا ولا لوجن ولا لانوس جديدة وتحياتي

**M_SALLAM** · 21-08-2012 05:18 PM

هو المفروض يعنى ان الزيرو زيرو و احسن كتير من المستعمل و انا عندى اركب سيات زيرو و مركبش مرسيدس مستعملة ..

بس برضو الهوندا ركوبة و اللوجان ركوبة تانية خالص و لكن لو الهوندا ضامنها و بحالة الزيرو تبقى طبعا افضل من اللوجان لكن لو مش ضامننها بلااااااااااااش و افتكر انى قولتلك بلاش لأن العربيات دى لما بتخرب بتقول عليها يا رحمان يا رحيـــــــــــــــم و بتغلب فى قطع غيارها و هتلاقى بلية اصلا مش فاهم فيها حاجة و لو حبيت تبيع العربية هتلاقى سوقتها تقيــــــــــــــــــــــ ــــل جدا جدا جدا و مش هتجبلك فلوس ..

رأيى لوجان زيرو افضل و لو عاوز مستعمل خوش فى لانسر بوما يا معلم عربية وش و عندك برضو شفرليه اوبتا و بتمن اللوجان تجيب انضف اوبترا فى السوق و انضف لانسر بوما فى السوق ..

و بعدين ميـــــــــــــــــــــــ ــــــــــــدو بيقول كلام مش واقعى خالص و بيغويك فى الهوندا علشان متحيز لها جدا و كمان علشان عربية و دة بيعتبر انحياز و عدم الواقعية فى الكلام ....