الموضوع: ضمان aaa ؟؟؟؟

يعني حضرتك شاري العربية خليجي وبتعمل الصيانه بتاعتك في وكيل كيا مصر ؟؟؟؟
وياريت حضرتك تقولي نوع العربية اللي معاك ايه

المشاركة الأصلية كتبت بواسطة moha4tec

السلام عليكم
لو هتحكى يبقى تحكى كل شىء بالتفصيل
و لازم تقول انك اخدت حقك عفيه و غصب عنهم .و هما مجوش بالكلام العادى و ان الشكوى للمقر الرئيسى جابت نتيجه .انت ناسى و الا اه ؟؟؟؟؟؟؟؟؟؟
و هل كمان ناسى اللى حصلى فى مركز من بتوعهم ؟؟؟؟و المشاكل معاهم .


عموما السيراتو مشاكلها بسيطه باذن الله و 95% مش هتحتاج الضمان .

طب ما تحكيلي انت يا باشا ياريت تفيدني اكتر وخصوصا اني في محافظة المنيا يعني ايه اقرب مركز صيانه ليهم

المشاركة الأصلية كتبت بواسطة moha4tec

و على فكره انا مكنتش هاخد حقى فى تانى مره .الا ان بفضل الله و بفضل المهندس حاتم .بفضل الشكوى المحترمه و الشغل اللى عمله .اللى هو حضرتك .
و انا اول مره مخدتش حقى اصلا و مش عاوز اخش فى تفاصيل ..................
انا اول مره اتنازلت عن حقى من المركز لكن تانى مره اخدت حقى تالت و متلت و كانوا كويسين جدا معانا و محترمين .بس كانوا متغاظين و هيموتوا من الشكوى بتاعة المهندس حاتم ههههههههههههههه .
عموما عشان تبقى على ميه بيضاء
مشاكل السيراتو اللى هما ممكن يحلوها .
1- مشكلة دراع النور :و هى عباره عن انه بيفك الدراع و بيلحم سلكه جديده اطول و خلاص .لانه السلكه الاصليه بتبقى قصيره .و عموما فى واحد معانا من المنتدى صلحه عند واحد كهربائى ب 50 جنيه .مش قصه يعنى .
2- مشكلة كركره صوت الموتور مع التكييف فقط .و ده بسبب خشونه البليه بتاعة شداد التكييف .و ممكن تتغير البليه او الكمبريسور و البليه على حسب الحاله .و تمن البليه معدى ال 1200 او 1400 بالتركيب فى التوكيل جديده و لكنها لوحدها ب 500 او 600 جنيه فقط.و هما مغيروهاش عندنا الابالشكوى و قعدو يقولونا ده عادى جدا و صوت عادى خالص .و لحد دلوقتى محدش عرف الحل فى المشكله دى اه خالص و الصوت رجع عندى تانى و عند المهندس حاتم و هما كانوا غيرولوا كباس و بلية شداد .و بعد شهر و نصف رجع الصوت تانى .....
و عموما الصوت ده او المشكله دى مبتاثرش على اى شىء فى العربيه اصلا .و ممكن تتجنبه انك تشغل التكييف بعد ما العاربيه تسخن و تمشى بيها شارع على سرعه تحت ال 40 .و كمان اوعى تغسل الموتور بالميه خالص و خصوصا و هو سخن .هتبوظ البوجيهات و كمان الميه لو جت على بليه شداد التكييف هتبوظها .لو عاوز تنضف الموتور نضفه بالهوا و لو عاوز تلمعه ابقى اشترى سفنجه ارمورل ال من اى بنزينه بتاعة تلميع التابلوه و ابقى لمع بيها فقط البلاستيك و اى حاجه فى حوض الموتور .
3- علبة الدركسيون و دى من ضمن عيوب التصنيع فى السيراتو و ظهرت فى كذا عربيه .بس الحمد لله فى ناس كتير معندهمش المشكله دى و كله تمام و مش عارف اذا كانوا هيغيروهالك تبع الضمان و الا هيقولولك دا عيب استخدام ....؟؟؟؟
4- الفوانيس الاماميه :بتسرطن من الغسيل و هى سخنه بليل او فى الشتاء .و لذلك تجنب الغسيل بليل او عموما تجنب الغسيل و الفوانيس سخنه اصلا .
5- لمض الصالون.و دى سهله او تتغير و رخيصه و ممكن تركب ليدات كمان مكانها .
لمض النور الواطى :و اللمضه ب 40 جنيه بتبوظ بعد سنتين تلاته تقريبا .عادى عمرها الافتراضى كمان .
6- لما تركب زينون على النور الواطى :هيعملك مشكله فى التقليب بالنور العالى مع الفلاشه هيخليها ترستر كل ما تقلب نور .و ملهاش حل تقريبا عند اى حد و ربنا يسهل و الاقيلها حل قريب .و الحل المؤقت متركبش زينون فى الواطى و ممكن تركبه فى الشبوره فقط .و ممكن تركب لمض اوسرام نايت بريكر او فيلبس الجديده 100% اضائه زياده .
7-مشكلة البلالين مع الجنط ال 17 ملهاش حل و عمرهم ما هيغيرولك الكوتش اصلا حتى لو عملت اه و هيقولك عيب استعمال .فى ناس جربت الكوتش ال my01 بريدج ستون و قالوا مبيعملش بلالين و كويس بس ده كلام ....و الله اعلم
8- البرابريز متوسط القوى و بيتنقر بسهوله من الظلط اللى على الدائرى و ناس كتير غيرته .و دى على حسابك طبعا .
9- الطنابير بتعمل ريجه نتيجه الغسيل بميه و هى سخنه .(يعنى لما تحب تغسل العربيه ابقى اغسلها بعد ما العربيه تبرد و متغسلهاش و العربيه راجعه من مشوار او و هى سخنه و الكلام ده عموما ممكن يحصل فى اى عربيه مع كذا غسله .خلى بالك يعنى هتاثر على اداء الفرامل طبعا .
10- الابواب بتزيق او بتعمل اصوات بعد مرور فتره مثلا سنه مع القياده فى الاماكن الوعره او فيها مطبات كتيرو دا نتيجه ان السيليكون اللى ماسك ما بين صاج الباب الخارجى و بارات او مواسير الحمايه من الحوادث فك و عاوز سيليكون جديد .بس خلى بالك دا مش اى سيليكون و موجود فى مكان واحد بس عند شركة 3m . و كمان اصوات من جراب النضاره و دى ليها حل مش مكلف و لكن التوكيل او الضمان مش هيعملهملك اصلا .و مش هيعرف يعملهم .و ليها حل بس انا مش عارف اقوله ممكن ابقى اعمل موضوع مصور بيه .و كمان اصوات من البلاستيك اللى عند نور الاستوب اللى ورا الكنبه و تحت الزجاج الخلفى و ليها حل بردو و مش مكلف .
11- صوت تخبيط او رزع مع الحفر و المطبات :و دى توكيل ابو رواش فقط اظن هو اللى بيعرف يعملها .و دى حلها سهل و شرحته قبل كده .و عموما هو صوت فقط و مش مؤثر على اى شىء و حلها قطعه كوتش عمله زى الرينجات و بتتحط ما بين كوتشة صدادة المساعد و الصاج بتاع البطاحه .


من الاخر العربيه دى عاوزه تعرف مركز كويس و فاهم و امين زى القاهره اوتو مثلا و خلاص و تنسى اى حاجه .و تعمل صياناتك فى ميعادها
و العربيه دى بتستحمل البهدله و نفسها طويل

و لو عاوز اى شىء اسال و هتلاقى كتييييييييييييير بيردوا على حضرتك فى اى استفسار .
و الله اعلم

يا باشا الف مليون شكر كلامك مفيد جدا
يعني من الاخر اتوكل على الله واجيبها خليجي وانفض للوكيل
لاني مخنوق جدا من الوكيل ان العربية اغلى ومفهاش :
كاميرا - تكييف تتش - فرش جلد !!!!!!