إلى أنا عملتة دة صح ولا غلط ؟ أنا دوست واحد

**MaNoLa** · 30-08-2012 06:00 AM

فى الكام يوم إلى فاتوا بعد صلاة الوقفة حبيت أقعد أيام العيد فى البيت نظرا للأخبار إلى بتحصل و أن لو فيه أى شئ بيحمل أسم أنثى كان بيتلعب فيه البخت قولت أجيبها من قاصرها و أركن فى البيت اليومين دول و مش هخسر حاجة يعنى

بس المشكلة بعد العيد على طول حبيت أنزل و أول مانزلت روحت لصحابى لأنهم كانوا عايزنى أنزل معاهم و ركبت أنا و 3 صحابى و كنت أنا سايقة و الأزاز كله مفتوح للأربع أبواب و أنا أصلا مش بطيق فتحه الأزاز كله لأنى عارفة أن يا أما حد هيحدف حاجة جوة زى صاروخ أو طوبة أو هيسرق حاجة أو هيدخل أيده لأى غرض

مكانتش دى المشكلة فقط لكن المشكلة الأكبر لما جينا نقف لأن الدنيا كانت زحمه جدا و مرة واحدة لقيت صوت هبد على الشنطة حوالى مرتين كدة وطيت الكاسيت خالص و ببص لقيت واحد لابس فانله حمالات مقطعة و معاه صحابه قولت للبنات إلى معايا أقفلوا الأزاز راحوا قافلين الأزاز الحمد لله بسرعة و مرة واحدة لقيته واقف أدام الكبوت و عمال يخبط بأيدة عليه و بيعمل حركات غريبة و أشارات لا يتوقعها البشر كل دة و أنا قاعدة مش عارفة أرجع ورا و أدغدغ العربيه إلى ورايا ولا أقف لحد مايكسروا علينا الأزاز ولا أجرى و أخبطة و طبعا مع زيادة الأستفزاز لقيته نايم على الكبوت و عمال يعمل حركات غريبة جدا و الأغرب من كدة أن مكانش فيه بنى أدم إلا و بيبص و للأسف مكانش فيه رجاله اليوم دة شكله كدة أو بمعنى أصح الرجاله الموجودة خسارة فيها لقب رجاله دول كانوا واقفين بيتفرجوا و بيضحكوا و مرة واحدة فكرة جت فى بالى أننا أجرى و إلى يحصل يحصل

و بالفعل مرة واحدة طلعت أجرى بسرعة جدا راح الأخ دة وقع وقعة غبيه جدا و من الظاهر أننا دوست على رجله لأن العربيه نطت لفوق مرة واحدة و إلى مخلينى متوترة ان البنات إلى معايا لحد ما وصلتهم عمالين يصوتوا و كأنى مثلا نزلت ضربتة بسكينه

الكارثة أننا من اللحظة دى مش عارفة أية إلى أنا عملتة دة

**eng.m7md.ali** · 30-08-2012 06:20 AM

يستاهل
ده كان بيستعد عشان يسرق وكان بيلفت نظرك ليه عشان حد تاني يسلك المصلحة
واحنا في زمن دلوقتي انك تدوسي على اي حد قدامك ضمان لينا

**محمد عز** · 30-08-2012 06:28 AM

واحد لابس فانله حمالات مقطعة و معاه صحابه

وكنتى موتيه كمان ، واحد بالوصف ده يعنى بلطجى

ويخبط ليه على العربية وينام على الكبوت

ولا تحطى فى بالك والحمد لله انك بخير

**zangry** · 30-08-2012 06:41 AM

اللى حضرتك عملتيه صح 100% وده الطبيعى اصلا :d

اى واحد يقف ادامك وانتى ماشية دوسيه على طول

**حماده المصري** · 30-08-2012 06:42 AM

هو في الغالب كان حرامي والموقف ده بنتعرض له عموما يجي واحد يخبط من ورا في الشنطه او الباب عن عمد ويجي يقولك انت مبتشوفش والجو ده وفجاه تلاقي حاجات مش موجوده موبايل محفظه بتاع وغالبا ما بيقى معاه ناس مستخبيين ممكن يصيعوا ويعملوا فيها ناس بتتفرج ويقلبوا برضو وممكن يسرقوا العربيه اساسا

الي انتي عملتي عين العقل وصح الصح وكويس ان قلبك جابك انك تمشي لانك لو كنتي عملتي حاجه تانيه غير انك تمشي اكيد كان هيبقى في حوار هيحصل

عموما لو حاجه زي كده اتكررت تاني نفس الفعل الي حضرتك عملتيه يتعمل تاني بس المره دي تتاكدي انك دايسه على دماغه

**egyptiandiver** · 30-08-2012 06:55 AM

لا إله إلا الله... و الله الواحد لما يتحط في قلب الموقف ما يعرف هيكون رد فعلو إيه؟ غالباً ده حرامي أو متحرش أو الاتنين... لكن إحتمال 1% يكون متخلف عقلياً. أنا كنت ماشي و ولد يمكن 15 - 16 سنة و بيعدي الشارع أنا كملت مشي عادي و إذ فجأه راح متسمر قدامي و بيبوصلي و يضحك! جة واحد إبن حلال خدو من دراعو و عداه الناحية التانية .... ربنا يكفينا جميعاً الشر - و بلغة الشارع نفضي ولا أكن في حاجة - أحمد سامي

**HAITHAM1985** · 30-08-2012 08:16 AM

so cute .......... ياحراااااااااااااااااااام

دى معلش فى اللفظ ........*منك ........ اللى إنت عملتيه تمااااااااام التمااااااااااام وأقل من المتوقع من ناس تانية

الرجاء إنتقاء الألفاظ

م ع 3

**Ahmed_Ramadan** · 30-08-2012 08:42 AM

أنا لو مكانك كنت بعد أما عديته رجعت دوست عليه تانى و بعدين طلعت

**adelhamed** · 30-08-2012 09:27 AM

المشاركة الأصلية كتبت بواسطة ahmed_ramadan

أنا لو مكانك كنت بعد أما عديته رجعت دوست عليه تانى و بعدين طلعت

والاضمن انك ترجعي كمان مره عليه عشان تتأكدي انه انتهي

بس والله برافو عليكي انك عملتي كدا ولو اتكررت تاني اعملي كدا تاني وتالت وعاشر لحد لما نتربي تاني او الامن يرجع تاني ( وعليكي بخير يعني )