ايبيزا ;بيجو207 ; ميجان ; ريو ؟

**ENG-ELKASHEF** · 02-09-2012 10:57 AM

السلام عليكم ...

اولا احب اشكر اعضاء المنتدى الرائع نيل موتورز لانى بستفاد من هنا كتير

ثانيا بقى انا واحد من الناس خبرتي بالسيارات قليلة اوى وان شاء الله ناوى انى اشتري عربية (ادعولى )
المهم انا رحت معرض ببص على عربية عجبتني اوى كيا ريو 2013 هاتش باك خليجي هاي لاين 1.4 سي سي وهي عاملة (135000) كامله وفتحة سقف
ممكن تنزلها بتاع الف جنيه ولا حاجة

المهم سالت واحد صحبي قالى هي حلوة بس فى حجات تانى فى نفس السعر لازم تبص عليها وتقارن ..علشان كدة انا جيت هنا لانى معنديش اى خبرة فى المووضع دا

دخلت كونتكت كار ابص ايه العربيات ال فى نفس السعر

وطلعت دول

1-سيات ابيزا فول اوبشن هاتش باك 1.6 سي سي (سعر 134,800)
2-بيجو 207 1.6سي سي (133000)
3-رينو ميجان هاتش باك 1.6 سيسي (135000)
4- طبعا كيا ريو ال قلت عليها فوق
طبعا كلهم اوتوماتيك

انا بقى مش عارف اختار بس انا عجبني اوبشن الكيا وشكلها
وفى واحد تانى قلى حاجة خوفتى اوى منها قالى لو ماشي 130 وجه شوية هواء هيزعلوك والبقاء لله

قفلنى بصراحة

بس هى فعلا الكيا للدرجادى اتزانها وحش اوي كدا ؟!
مع ان معلوماتى ان العربية الهاتش باك الرياضية عموما بيكون عربية جري واتزانها حلو

وحد تانى قلى سحبها مش حلو ولما بتيجي تعمل كيك داون بتاخد 5 ثونى عقبال لما تفهم انك دايس بنزين ...طبعا دي لو انت مثلا فى اى موقف وعاوز تسعف نفسك اكيد القاء لله ساعتها (5ثوانى

معلش بقى انا عارف طولت عليكو اخر حمعلومة بس انا هجيب العربية قسط 50% (مش عارف دي هتفيد ب ايه بس ممكن يكون ليها فايدة :)

شكرا..

**Hosam_Optrawy** · 03-09-2012 01:18 AM

الكلام بتاع 5 ثوانى وشوية هوا يقلبوك وكدا فيه مبالغه طبعا

مبدأيا سعر الريو الخليجى غالى وانصحك تشوف بتاعت الوكيل سعرها الرسمى 126 الف وممكن يكون الفروق بينهم مش كتير وتعجبك

ثانيا الميجان تعتبر فئه اكبر واعلى من التلاته التانيين , الميجان فئة ال 308 والليون والاسترا والجولف وال C4 والفوكس

العربيات التانيه اللى فى فئة الريو هى ال 207 والبولو والفييستا والكورسا والابيزا والفابيا

العربيات دى متتوقعش منها اداء خارق ولا فى المواتير ولافى الثبات على السرعات العاليه لانهم فى الاول والاخر عربيات مدينه صغيره City Car , مش شرط عشان هاتش باك تبقى رياضيه , الكلام دا هايبقى موجود فى الفئه الاكبر اللى قولتهم فى الاول

**ENG-ELKASHEF** · 04-09-2012 12:07 AM

طيب تمام
شكرا الاول على الرد

العربيات دى متتوقعش منها اداء خارق ولا فى المواتير ولافى الثبات على السرعات العاليه لانهم فى الاول والاخر عربيات مدينه صغيره city car , مش شرط عشان هاتش باك تبقى رياضيه , الكلام دا هايبقى موجود فى الفئه الاكبر اللى قولتهم فى الاول
___________

يعني افهم من كدا انى اخليني فى الميجان ؟

اصل انا معلوماتى عنها مجرد انى دخلت ع كونتكت كار قريت المواصفات والسعر مش اكتر ...

**Hosam_Optrawy** · 04-09-2012 12:44 AM

المشاركة الأصلية كتبت بواسطة eng-elkashef

طيب تمام
شكرا الاول على الرد

يعني افهم من كدا انى اخليني فى الميجان ؟

اصل انا معلوماتى عنها مجرد انى دخلت ع كونتكت كار قريت المواصفات والسعر مش اكتر ...

بصراحه انا خبرتى فى العربيات دى عموما شبه مش موجوده :) ماليش تجارب معاها نهائى تقريبا

بس بشكل عام فى حدود السعر دا لو عايز حاجه اوسع واكبر وثبات تبقى الميجان بس هاتبقى اقل فئه فى الاوبشنز سعرها 135 وموتورها برضه مش هايبقى جامد لانها 105 حصان على وزن اتقل منهم

لو يهمك الموتور والكماليات يبقى هاتنزل للفئه الاصغر لان موتورهم هايبقى معقول على وزنهم الى حد ما وهايبقوا كاملين من حيث الاوبشنز

ال 207 هاتبقى فى المركز الاول 1600 سى سى 120 حصان , بس المفروض ان اتوقف انتاجها والبديل بتاعها 208 بس اعتقد التوكيل لسه منزلهاش ولسه عنده بواقى ال 207 موديل 2011

تيجى بعدها الفابيا 105 حصان 153 نيوتن

وبعدهم الريو

وفى كمان الاكسنت ار بى هاتش باك الجديده 1600 سى سى 124 حصان هاى لاين ب 123 الف بص عليها