الموضوع: بعض الشكاوى لتوكيل دايموند موتورز

انا عرفت صفحة دايموند على الفيس من احد مشاركات الاعضاء وهى Mitsubishi Egypt | Facebook

وكتبتلهم بعض الاستفسارات وحبيت ان اعرضها على حضراتكوا وكانت المشاركة لى على صفحتهم كالتالى :


اولا انا مبسوط جدا من الصفحة الخاصة بدايموند موتورز على الفيس وانا روحت التوكيل اللى فى طريق اسكنرية الصحراوى وكانوا ناس محترمين جدا جدا ولكن لى ملاحظة على المهندس مع احترامى لذوقه واخلاقه انه لسه معندوش خبرة كافية بالسيارة لانسر عموما يمكن يكون مهندس سيارات ماهر ولكن لسه لم يحفظ السيارة جيدا يمكن علشان التوكيل جديد وانا من عشاق السيارة لانسر وكان عندى مكواة مستعملة ثم بومة زيور ثم شارك الان ولكن لى بعض الملاحظات والاستفسارات فى نفس الوقت وأرجو من المشرف على الصفحة ان يبجيب عليها حتى استفيد منها ويستفيد الكل منها أيضا :

1- السيارة البومة فيها عيب ان الطين اللى فى شوارعنا بيتكون فى الجزء الخلفى (التجويف الخلفى) أمام العجلات الخلفية مما يسبب بارومة فى هدا الجزء فلماذ لا تخاطبون الشركة الام لعمل عزل كويس فى هذه المنطقة وعلى فكرة البومة الجديدة من غير اعتاب واعتقد انه لهذا السبب

2- البومة دائما فيها صوت زى حديد بيخبط فى حديد ويسمع فى الدريكسيون أثناء المطبات الناشفة زى النقر ومطبات عين القطط وبالاخص وانت كاسر شمال لان عمود المشرشر اللى داخل علبة الدريكسيون بيكون طوله كله فى اليمين فى الفاضى فبيخبط فى البستم الحديد اللى موجود لعمل رجلاش على العلبة وبيعمل هذا الصوت
ولا تقولوا لى ان هذا الصوت غير موجود لانى خبير باللانسر وجربت يمكن اكتر من 50 عربيات منهم الزيرو ومنهم المستعمل فى كل فئات البومة ولو قولتوا ان هذا غير صحيح هاجى التوكيل واجرب العربية الزيرو عندكو لو فى الامكان وعلى فكرة انا حاولت مخاطبة الشركة فى اليابان ولكن لم استطع الحصول على الاميل خالص من على النت زى مايكون حاجة سرية وكان دائما الناس بتشتكى من الموضوع ده فى التوكيل القديم فلماذا لا تخاطبوا الشركة الام لتعديل علبة الدريكسيون أو جعل البستم الحديد فايبر زى ماركات اخرى بدون ذكرها وفى هذا الشأن .. ولى تساؤل هل علبة الدريكسيون فى الشارك 2012 تختلف عن البومة لانى ملاحظ ان الصوت هادى لحد دلوقتى وعربيتى عاملة 2500 كيلوا فقط وأرجو الرد .

3- فى مشكلة خطيرة عندى فى الشارك واعتقد انها موجودة فى البومة الاوتوماتيك ايضا وهى ان السائق ممكن يجيب الفتيس على حرف R يعنى للرجوع للخلف من غير مايدوس فرامل طبعا انا بدوس فرامل ولكن هذا الشىء خطير جدا جدا جدا لان لو جنب السائق طفل ولعب فى الفتيس والسيارة بتجرى للامام وجاب الفتيس على R اعتقد ان الفتيس هيدمر طيب ازاى الشركة عاملة كده ده لازم يكون فى سيفتى ان الرجوع للخلف لا يأتى الا والسائق دايس فرامل فلماذا لا تخاطبون الشركة بخصوص هذا الشىء .

4- عندى تساؤل اخر انا عندى فى الشارك العدادات السرعة ولفات الماتور بيضاء فهل اللمبات الخلفية ليدات ولا لمبات عادية ارجو الاجابة للمعرفة بالشىء .

5- اخر شىء وهو مشكلة العزل الصوتى فى الشارك مع احترامى له عن البومة ليه دائما فى صوت ونة أثناء وضع الفتيس على N طبعا ونة خفيفة وبتروح مع أول دوسة بنزين وطبعا الونة بتزيد مع التكييف فلماذا لا تخاطبون الشركة فى تعديل العزل بطريقة أحسن من كده .

ارجو ان يكون دايموند موتورز توكيل يحظى على احترامنا جميعا ويكون همزة وصل حقيقية بيننا وبين الشركة المنتجة للسيارة ويكون ردودهم ناتجة عن مخاطبتهم للشركة وليس ردود من التوكيل نفسه لترضينا وخلاص فنحن من عشاق اللانسر ونرجو دائما عمل التعديلات .

متابع