حادثة على الكورنيش

**gamela** · 09-09-2012 02:16 AM

الحمد لله على كل شئ اولا واخيراً عملت حادثة كبيرة على الكورنيش كنت فى الحارة الشمال واخدة سرعة كبيرة اكتر من 80 وكان ورايا واحد حسبى الله ونعمة الوكيل عمال يكلاكس ورايا وهو كمان بيجرى المهم قلت اخليه يعدى يمكن يكون متاخر على شغله ولا حاجة لان الوقت كان 7 الصبح وادخله المهم ماخلنيش لسة اعدية الا ويمسح العجلة الشمال اللى ورا عندى لدرجة ان الاكصدام بتاعه بقه اسود من لون الكويتش بتاعى يخلى العربية تلف بيا وتعرض على الكورنيش وتطلع على الجزيرة ولولا الحمد لله ماسكت فى الدريكسيون جامد وشديت فرامل العربية وشيلت المفتاح من الكونتكت كانت حاتعدى الجنب التانى على العربيات وبدات العربية تتمرجح بيا لولا ستر ربنا فردت الكويتش فى الشمال امامى اتفرتكت بمعنى الكلمة خلت العربية ركزت المهم بعد مانزلت لقيت العربية تحت منها بركة زيت والعجلة متفرتكة وطبعا سواقين المشاريع ومسكوا الاخ وطلبوا المعاينة وجاه الوينش بتاع المرور علشان ينزل العربية اخد اكتر من ساعة علشان ينزلها وبهدل العربية بمعنى الكلمة طبق الشبكة من قدام وحكات المهم لما والدى جايه رفض ياخد اى فلوس من الاخ ده لان العربية حتى ماطلعتش بتاعته بتاعة ابوه وعملنا محضر مصالحة طلبنا كساحة ورحنا على توكيل العامرية العربية طول السكة عمالة تنزل فى زيت دخلت العربية فى التوكيل عند الحوادث وتانى يوم ردو عليا وعن التلفيات وتكلفة االمقايسة التلفيات كالتالى: مقص شمال & مساعد & كوبلن & جنط & طاسات&ورمان عجل & شمعدان & وزيت فتيس وطبعاً غير السمكرة انا حاعملها برة رقم المقايسة 7200 جنيه
طبعاً لمارحت اشوف المقايسة لقيت الكوبلن 3250 فى المقايسة وانا كنت سالة فى قطع الغيارقالى ان فى كوبلن 1710 رومانى & 3250 فرنساوى انا اعترضت انهم حاطين الفرساوى وطلبت انه يحط الرومانى
وطلبت انه يركب الاستبن لحد مااتصرف فى واحد تانى وشيلت طبعا الطاسات لان مش وقته المهم التكلفة وصلت 5087 جنيه وقالى احتمال يطلع الرمان العجل والشمعدان سليم

سؤالى الكوبلن الرومانى اللى اخترته ده كويس ولا كان احسن الفرنساوى؟؟
وهى حالة العربية بعد الحاجات الكتير اللى اتغيرت دى حاتكون زى الاول ولا كده المفروض كفاية عليها وافكر فى حاجة تانية

**mstool** · 09-09-2012 05:45 AM

اولا الف حمد الله على سلامتك و مش مهم الصاج و الحمد لله ان الموضوع متطورش اكتر من كدة
انا هفتى فى اللى انا اعرف فية الكوبلن حتى لو صينى بيبقى حلو جدا ميفرقش غير ان الرومانى دة هو الاصلى و اللى بيبقى فيها فمش فارقة كانك حطيتيتى زى اللى فيها بزبط و موضوع الفرنساوى دة كلام فاضى بالذات فى السعر
انا مركب كوبلن صينى فى عربية تويوتا و شغال زى الفل من خمس سنين فسيبك من الموضوع الفرنساوى دة نصب و فلوس على الارض بمعنى الكلمة واللى يقول غير كدة يبقى واحد بيخاف و محسوك فى موضوع العربيات
و العربية هترجع عادى جدا و زى الاول بزبط لان دية الحمد لله متعتبرش خساير جامدة اوى يعنى جمب اى عربية تانية بتتهرس طول ما الشاسية سليم العربية هتبقى الحمد لله و انصح تتعمل فى التوكيل حتى لو هتكلف شوية
و انا عملت حوادث اكبر من دية بكتير و على سرعات اعلى من دية بعربية اضعف و الحمد لله التوكيل طلعها زيرو و مشيت بيها كتير لحد لما بيعتها
بس اكيد حتى لو التكلفة 5500 تبقى عاملة موضوع الحساب مش اقل من 8000 عشان بتصرف غير السمكرة الله اعلم حالتها عاملة ازاى
و الحمد لله انها جت على كدة طبعا

**gamela** · 09-09-2012 03:19 PM

الله يسلم حضرتك متشكرة جداً الحمد لله انى اطمنت من حضرتك انا كنت خايفة الا يكون الكوبلن الرومانى مش بتاعها وانى بستخسر فيها لانى لما غيرت البوجيهات فى الصيانة كان مكتوب على العلبة صناعة فرنسية الحمد لله ان طلع الكوبلن رومانى
ولتانى مرة بشكر حضرتك لانى والله كنت قلقانة جداً من الموضوع ده

**ehab78** · 09-09-2012 03:35 PM

الف حمد لله على سلامة حضرتك 00ومش مهم اي حاجة المهم انك بخير

**gamela** · 09-09-2012 06:11 PM

الله يسلم حضرتك متشكرة جداً

**blackhorse123** · 09-09-2012 09:24 PM

يا اخى الحمد لله على كل حال

انا عملت حادثه والعربيه اتقلبت بيا مرتين على الطريق الصحراوى
وكلتفنى تصليح 40 الف جنيها فى التوكيل ........... ده معناه ان العربيه ادمرت فعلا بس الحمد لله

على فكره قضاء اخف من قضاء والله رؤوف بعباده والحمد لله على كل حال

**zkralla** · 09-09-2012 09:27 PM

حمد لله على سلامتك
بالنسبة للكوبلن خليكى فى الرومانى اعتقد انه مش هيقل كفاءة عن الفرنساوى خاصتا ان مصنع رينو الى بيصنع لوجان فى اوربا موجود فى رومانيا مش فرنسا

**gamela** · 10-09-2012 12:03 AM

المشاركة الأصلية كتبت بواسطة zkralla

حمد لله على سلامتك
بالنسبة للكوبلن خليكى فى الرومانى اعتقد انه مش هيقل كفاءة عن الفرنساوى خاصتا ان مصنع رينو الى بيصنع لوجان فى اوربا موجود فى رومانيا مش فرنسا

الله يسلم حضرتك متشكرة جداً الحمد لله حضرتك كده طمنتنى اكتر بمعلومة المصنع اللى رومانيا جزاك الله كل خير

**gamela** · 10-09-2012 12:13 AM

المشاركة الأصلية كتبت بواسطة blackhorse123

يا اخى الحمد لله على كل حال

انا عملت حادثه والعربيه اتقلبت بيا مرتين على الطريق الصحراوى
وكلتفنى تصليح 40 الف جنيها فى التوكيل ........... ده معناه ان العربيه ادمرت فعلا بس الحمد لله

على فكره قضاء اخف من قضاء والله رؤوف بعباده والحمد لله على كل حال

الحمد لله كل اللى يجيبه ربنا كويس وفعلا قضاء اخف من قضاء وربنا يسهل لمايخلص شغل الميكانيكا فى التوكيل برده حاتعمل شغل سمكرة ودهان بمبلغ برده محترم لان الشغل فى منطقة مش ساهلة اللى سمعته من اللى حوالية بيقولوا وقت الحادثة ومهندس الاستقبال اللى فى التوكيل نصحنى اعمل برة السمكرة لانها حاتتكلف كتير فى التوكيل ولسة اما حانصلح الجنط لو ينفع او حاجيب واحد جديد وفردة عجل جديدة بدل اللى اتفرتكت الحمد لله على كل شئ اولاً واخيراً