الموضوع: تقرير تصليح حساسات فتيس فيكترا بي 2

السلام عليكم و رحمة الله

طبعا انتوا عارفين مشكلة الفتيس اللي كانت حصلت معايا .. و اللي الشيخ هيثم كان قال لي ان الفتيس باظ .. و صابر قال لي انه حساس اللي كانت في الموضوع ده

http://www.nilemotors.net/Nile/306048-2.html

و بصراحه لما قعدت مع نفسي و فكرت شوية قلت أنا ازاي لما المشكلة حصلت فكرت للحظة ان ممكن الفتيس يكون باظ .. كان واضح جدا انها مشكلة حساس عشان لما حصلت السبورت درايف مكنش بينور ولا التراكشن.

هي عموما المشكلة متكررتش تاني .. بس عشان أكون في الأمان خصوصا اني بسافر كتير .. قلت أشوف فيها ايه

طلعت على صابر يوم الجمعة وصلت له على الصلاة بالضبط .. سبت العربية و رحت صليت عشان تكون بردت شوية .. رجعت و كان في ولد اسمه مصطفى (دكش) كان شغال في عربية أسترا .. و خلصها و صابر قال له فك حساسين الفتيس من عندي عشان نقيسهم.

ده شكل الحساسات

فكهم واداهم لصابر .. وبدأ يقيسهم بالأفو .. المفروض قرايتهم تكون 0.740 فولت .. و لما يسخنوا يطلعوا نفس القرايه .. المهم بدأ يسخنهم بولاعه .. فقرايتهم بدأت تتغير لحد ما واحد فيهم فصل خالص.

قال لي روح هات زيهم من الحرفيين .. قلت لمصطفى على ما أروح و اجي تكون غيرت لي تيل و طنابير كانوا في شنطة العربية .. و رحت لمليجي .. مكانش عنده .. ففكهم لي من على فتيس .. و قال لي و الله ما بفك الحاجات دي من فتايس أبدا و عشان خاطرك و بتاع .. اداهم لي ب 200 جنية .. و صابر كان قايل لي من 250 ل 300 .. الحمد لله.

بقول له هو ده أعراضه ايه لما بيبوظ يا عم مليجي؟ .. قال لي العربية تطلع على التالت و متجيبش الرابع و لمبة الأعطال تنوّر .. قلت له ده انت أستاذ

رجعت كانت الساعه 07:00 تقريبا .. لقيت مصطفى ركب التيل و الطنابير .. و مشي عشان كان عنده مشوار (كان رايح يقرا فاتحه بيني و بينكم ) ) .. و طبعا استنيت لحد ما حد تاني فضي) .. ولد اسمه طاهر .. ركب لي الحساسين و فلتر بنزين.

المهم جربت العربية .. كله تمام الحمد لله .. الحساب كام يا عم صابر .. قال لي 150 جنية عشان خاطرك .. قلت له ماشي .. و حاسبته و مشيت.

و طبعا كانت ممكن تحصل مع حد تاني و يروح لميكانيكي يقول له الفتيس باظ و سيبها و تعالى خدها بكره و هتدفع 2500 جنية .. و يقول له ماشي .. فطبعا الواحد لازم يسأل كذا واحد ومياخدش كلام حد ثقة أبدا مهما كان.

و مشيت من عند صابر الساعة 09:00 مساءا تقريبا .. وبصراحد الموضوع كله كان ممكن ياخد 3 ساعات بالكتير بمشوار الحرفيين .. بس عشان مكانش في صنايعية كفاية و الصنايعي اللي كان معايا مشي في نص اليوم .. و الحمد لله و ربنا يسترها علينا جميعا.