الموضوع: الي كنت خايف منه حصل وفعلا عربيه اتسرقت

الحمد لله ان ربنا نجاك منها وطلعت منها بالسلامه
الموضوع ده انتشر بشكل بشع وبقي شغله البلطجيه وبقوا بيطلبوا اسعار مبالغ فيها وبترجع العربيه بعد كده متنفضه تماما ياريت ياجماعه اللي اتعرض لموقف زي ده او صديق ليه او جار اتعرض له يحذر منه ويقول علي الأماكن ومبدئيا خليكم في الزحمه واقفلوا السنتر بتاع الأبواب وتجنبوا الوقت المتأخر والطرق المظلمه الفاضيه لأنها بتكون انسب اماكن يتعمل فيها الكمين علشان يلحقوا يثبتوا ويجروا ومفيش حاجه تعطلهم والطريق يكون مفتوح قدامهم نفسي يكون معايا ار بي جي علشان انسف الناس دية الناس دية معندهاش شفقه ولارحمه في قلوبهم انا شوفت اكثر من موقف مأثرين فيه لحد دلوقتي وكانوا في رمضان واحد لقيته جاي عمال يصوت وعايز موبيل يتكلم بأي شكل كنت فاكره حرامي الأول لأن شكله متبهدل وغرقان دم واديته الموبيل وانا متردد لقيته بيتصل بأهله علشان يدوله رقم واحد من اقاربه علشان له معرفة برئيس المباحث علشان يرضوا يعملوله محضر علشان كانوا مش راضين بيقولوه وهنعملك ايه يعني استني لحد مايتصلوا بيك ويتفقوا معاك الراجل ده ثبتوه تحت كوبري مسطرد بعربيه نص نقل فيها 6 اشخاص معاهم اسلحه آليه ووقفوا قصاده وراحو ضاربين نار عشوائي واصابوا اتنين وضربوه بكعب السلاح في دماغه بعد ماثبتوه وخدوا منه العربيه والموبيل الراجل كان معاه هونداي اكسنت ار بي وشايل ايس بوكس فيه اكياس دم كان شاريهم علشان مراته ربنا يشفيها يارب هي واللي زيها عندها مرض خبيث ومحتاجه دم وكان رايح يودي الأكياس دية المستشفي وقعد يعيطلهم ويقولهم خدوا كل حاجه و سبولي اكياس الدم راحوا فتشوه وخدوا كل اللي معاه ومرضوش يدولوا الأكياس لأنه كان ملهوف عليها وقالوله دية لوحدها تمنها 3000 جنيه والله العظيم انا بكيت جدا لما سمعته عمال يبكي وهو بيحكي في التليفون وعمال يقول مراتي هتموت لو مرحلهاش الدم النهارده حسبنا الله ونعم الوكيل ربنا ينتقم منهم اشد انتقام
وانا هبدأ واقولكم علي كام مكان
الطريق الدائري وخاصة دائري شبرا الخيمه في الطلعه --تحت كوبري مسطرد وانت رايح بلقس علشان تاخد اليوتيرن وتخش لمسطرد والله العظيم كمين الشرطه بيبقي فوق وهما عاملين كمين تحت واكتر من 10 مرات ناس اتثبتت في الحته دية اخرهم جاري باردو تحت كوبري مسطرد اتاخدت منه هونداي النترا هاي لاين 2012 ودفع 40000 الف جنيه و1000 جنيه تأمين خروج ولو مدفعش التأمين هيثبتوه تانيه وياخدوها منه ويدفع 20000 الف جنيه تاني -----تحت كوبري السواح والطريق من جنب كوبري السواح علشان يدخلك علي طريق ترعة الأسماعليه والطريق ده كله لحد بنزينة موبيل باردو خطر جدا زائد من بعد نزلة كوبري السواح وانت رايح لمسطرد ----- طريق مزرعة البط وعزبة المرجوشي صاحبي احمد عبد الرحيم عنده 35 سنه وعنده طفلين طلعوا عليه وحاولوا يوقفوه فامرضاش يقف راحوا ضاربين عليه نار من اسلحه آلي وقتلوه ربنا يصبر اهله
ياريت ياجماعه اللي ساكن في منطقة شبرا الخيمه وخاصة شبرا الخيمه تاني يحفظ اسماء الأماكن والأماكن دية ويتجنبها ليل ونهار والله المستعان عليهم وربنا يورينا فيهم يوم اسود حسبنا الله ونعم الوكيل