الحقوني بالله عليكم بسرعه

**walidadel81** · 17-09-2012 06:36 AM

انهارده كنت بمرسي مطروح ونازل عالقاهره خرجت عادي واستلمت طريقي طبعا عامل اتشكك علي الزيت والمايه وكله تمام المهم وانا في الساحل قولت ادخل امون قبل ما ادخل الوصله بتاعت العالمين بالفعل دخلت بنزيه وطنيه مونت اجي ادور العربيه العربيه دارت عادي جدااا ببص في التبلوه كارررثه لمبه الزيت منوره بطلت العربيه بسرعه ونزلت شوفت الزيت تمام صوت الماتور تمام فتحت غطاء التكهات عشان اشوف الزيت طالع ولا لاء تمام المهم توكلت علي الله ومشيت بيها وانا مرعوب واللمبه منوره لحد ماجيت القاهره دخلت غيرت الزيت والفلتر لسه اللمبه منوره كلمت المكانيكي قالي اعمل رستارت للكنترول يمكن واخده امر غلط عملت مافيش فايده المهم الكلام ده كان علي الساعه 4 تقريبا الساعه 6 سافرت بيها تاني المنصوره ورجعت القاهره واللمبه زي ماهي والمكانيكي شكله ناوي يشتغلي وبيقولي هنغير طقم الفيوزات والساعه بتاعت الزيت الكلام ده ايه ظروفه
العربيه لانسر بومه 2007 $1600 عامله 60 الف ياترا ممكن ساعه الزيت تبوط علي 60 الف ؟؟؟

**kaza** · 17-09-2012 08:07 AM

لو عندك مشكلة في ضغط الزيت وضربت المشوار من مرسي مطروح للقاهرة كان الموتور راح بس الحمدلله وولضح ان المشكلة ممكن تكون في وحدة ارسال ضغط الزيت وفعلا ممكن تبوظ عادي جدا ودي اول حاجة تبتدي بيها غيرها وشوف النتيجة وحضرتك لسة مغير الزيت والفلتر يبقي مش هنيجي ناحيتهم لو لسة يبقي العربية محتاجة ريست للكونترول لو برضة لسة يبقي نقيس ضغط الدورة برضة عن طريق بلج الساعة ومانوميتر للزيت خارجي دي كل الاسباب اللي ممكن تعمل العطل دة وربنا يستر وماتكونش حاجة تانية مش هاقولك عليها علشان ماتتخضش بس ماتقاقش ان شاء الله بالحاجات اللي ذكرتها تلاقي حل ..تحياتي وطمنا

**walidadel81** · 17-09-2012 02:17 PM

المشاركة الأصلية كتبت بواسطة kaza

لو عندك مشكلة في ضغط الزيت وضربت المشوار من مرسي مطروح للقاهرة كان الموتور راح بس الحمدلله وولضح ان المشكلة ممكن تكون في وحدة ارسال ضغط الزيت وفعلا ممكن تبوظ عادي جدا ودي اول حاجة تبتدي بيها غيرها وشوف النتيجة وحضرتك لسة مغير الزيت والفلتر يبقي مش هنيجي ناحيتهم لو لسة يبقي العربية محتاجة ريست للكونترول لو برضة لسة يبقي نقيس ضغط الدورة برضة عن طريق بلج الساعة ومانوميتر للزيت خارجي دي كل الاسباب اللي ممكن تعمل العطل دة وربنا يستر وماتكونش حاجة تانية مش هاقولك عليها علشان ماتتخضش بس ماتقاقش ان شاء الله بالحاجات اللي ذكرتها تلاقي حل ..تحياتي وطمنا

جزاك الله كل خير علي الرد بس ايه الحاجه التانيه تقصد حضرتك طربمه الزيت ؟؟؟ ولا ايه

**mody1221** · 18-09-2012 04:07 PM

حصلت معايا ف عربية كروز بس لما عملنا ريسيت للكارتة اللمبة انطفت
طمنا عملت اية ؟؟؟؟

**walidadel81** · 18-09-2012 06:54 PM

الحمدلله انهارده رحت للمكانيكي اللي بتعامل معاه وهو عنده الكهربائي عمل قياس لطرميه الزيت لاقها تمام جاب الكهربائي شيك علي الساعه بتاعت الزيت قالي المشكله منها رحت سالت عليها لاقيت التيواني ب 25 خفت اجبها بصراحه طلعت منفذ بيع بتاع المصريه اللي في الكت كات لاقتها ب90 جنيه جبتها ورحت ركبتها وبفضل الله طلعت المشكله منها واتحلت
وجزا الله كل خير كل من اشترك معانا بحلول او قرائه الموضوع ودي معلومه عشان لاقدر الله لو المشكله دي حصلت مع حد معاه العربيه دي وحلت معاه المشكله دي