صني 2013 - تغيير الكاوتش فى تاير مانيا + تقرير استهلاك بنزين (طوالى)
اخوانى الاعزاء
حتكلم اليوم عن حاجتين هما الكاوتش و تقرير فى السريع عن استهلاك البنزين
السيارة صنى 2013- 1500cc - مشيت 2500كم
اولا: موضوع الكاوتش
منذ ان استلمت السيارة و انا لاحظت النشوفية الواضحة للكاوتش الماكسس الصينى اللى راكب فيها
ناهيك عن نقشته الغريبة اللى بتلم زلط كتيييير و كمان انه مش بيسعف فى الفرامل كويس ( ينزلق بسهولة)
و كنت ماجل تغييره لانه لسه جديد و قلت امشى بيه 20 او بالكتير 30 الف
لكن لان العبد لله معظم مشاويره فى منطقة معينة شوارعها تكسر اجدعا عفشة
قلت لا ده بوجود الكاوتش ده فى ظروف الطريق اللى بمشى فيه ده المسالة مش حتنفع
بعد لف و دوران محاورات و مشاورات مع اخوة هنا فى المنتدى و ابرزهم الاخ يوسف قلب الاسد ( المنسق المساعد بقسم نيسان) و هذا الرجل له باااع و خبرة فى هذا المجال
استقرينا ان افضل مقاس لهذه السيارة هو 195/60/15
و بالفعل غيرت الاربع اطارات الى بردجستون turanza er300 H- made in france
( انا جبتهم من تاير مانيا و اخدت الخصم بتاع نايل موتورز و احب اقول انى اتعرفت هناك على الاخ محمد يسرى صاحب المكان و هو بالفعل شخص على خلق و احسبه على خير و هو انسان محترم و امين جداااا بجد ربنا يبارك له)
و بعد كده مشيت بالعربية فى الطريق المكسر اياه
يا خبر!!! دا انا كانى كنت لابس قبقاب و قلعته و لبست جزمة اديداس ( بجد ده اقرب وصف للحقيقة)
و جريت فى نفس اليوم على طريق السويس على 140 و العربية كانت ثابته جدا ( اكثر من الاول لان الكاوتش اصبح اعرض الجديد كان 195 و القديم كان 185 و كمان العربية اصبحت اوطى 6ملى متر)
ده غير ان الكاوتش الجديد مش بيتزحلق بسهولة زى القديم
ثانيا: استهلاك البنزين طوالى من القاهرة الى الاسماعيلية و بالعكس
كنت رايح اقدم للماجستير فى جامعة قناة السويس
فولت السيارة و طلعت
تنقسم الرحلة لاربعة مراحل
المرحلة الاولى : 100كم طوالى السرعة متوسط 95 ( و هنا عداد الكمبيوتر عمل متوسط الاستهلاك 5.8 لتر لكل 100كم)
المرحلة الثانية: شوية مشى بالراحة جوه البلد وصولا للجامعة ثم خروجا منها و توقف متكرر الى ان خرجت من الاسماعيلية ( و هنا عداد الكمبيوتر متوسط الاستهلاك بتاعه على لانى كنت باتمشى داخل البلد اصبح 6.1 لتر لكل 100كم)
المرحلة الثالثة : عودة من الاسماعيلية الى القاهرة 100كم طوالى متوسط السرعة 95
( متوصت الستهلاك مازال 6.1 بسبب ما حدث فى المرحلة الثانية)
المرحلة الرابعة : دخول القاهرة و التوقف و بعض التمشية ( مما ادى الى زيادة متوسط الاستهلاك فى الكمبيوتر الى 6.3)
النتيجة النهائية:
فولت تانى لحاد الاخر زى ما كنت مفول التنك الصبح
الرحلة بالكامل تمت مع تشغيل المكيف
قطعت السيارة فى كامل الرحلة 223كم انقسمت الى
200كم طوالى بمتوسط سرعة 95 ( نصفهم فى اتجاه و النصف الاخر فى الاتجاه المعاكس مما يلغى تاثير اتجاه الريح فى حساب الاستهلاك)
23كم فقط بسرعات اقل متفاوته و توقف متكرر
استهلكت السيارة فى كامل الرحلة 223 كم بقيادة متزنة مع تشغيل المكيف 14 لتر
بما يعادل 318كم فى الصفيحة لكامل الرحلة فردين من الوزن الثقيل
و بما يعادل 345كم فى الصفيحة فى الطوالى و بالمكيف
