الموضوع: مياة الحنفية دمرت العربية (نقل التجربة للإفادة)

كل ده من مية الحنفية ربنا يسترها علينا
شكرا لنقل التجربة

اتكلفت كام فى الحوار ده؟

يا ريت تقول لينا عنوان الورشة ورقم تليفوناتهم وازاى توصل ليهم

يانهار اسود الحديد مستحملش امال الكلى بتاعتنا حالتها ايه؟

المشاركة الأصلية كتبت بواسطة lamada

اتكلفت كام فى الحوار ده؟

انا مش فاكر التفاصيل بالظبط بس هنفتكر سوا

مجموعة المياة اللي هي جواها ثرموستات الكوعه دي كانت ب 250

ماسورة مياة ب 210 و بالمناسبة انا اخدت واحد منهم و انا بشتريها عشان اتأكد انها اصلي لاني بخاف جدا جدا من قطع الغيار المضروبة خصوصا اني بهرس العربية هرس بدون اي مبالغة تقريبا بعمل من 5 الي 6 الاف كيلو في الشهر

طبتين مياه 10 جنية
غطاء ريادياتير اصلي بس مستعمل لاني الغطاء بتاعي كات اتعوج و اتكسر في الخبطة و ده كان ب 30 جنية

فرن ب 250

نجمع لحد هنا يبقي 250 + 210 + 10 + 30 + 250 = 750 جنية

تنظيف كاربيراتير و فكه و تغيير جوان داخلي و بالمناسبة الجوانات الداخلية للكربيراتير دي كارثة لو باظت او اتغيرت بجوانات غير اصلية لانها بتبهدل العربية

التنظيف كان بالاسبراي و ده كان تقريبا ب 40 + جوان ب 60 يبقي 100 جنية

يبقي لحد كده الحساب 850 جنية

عندك بقي فلتر بنزين اصلي ب 40 و بوجيهات ب 60 يبقي كمان 100

يبقي وصلنا ل 950 جنية

نيجي بقي للحاجة اللي حرقت دمي اني ملقتشي فلتر هواء مصري و اضطريت اجيب فلتر هواء اصلي من عندهم ب 155 جنية و بصراحة كنت مستغليه جدا بس اتناقشت معاهم ففهمت ان فيه اختلاف بين الاصلي و المصري و ان المصري بيعمل صوت صفاره خفيف و انت واقف ده غير انه بيكتم العربية بس مش اوي يعني و قولت بجملت بقي مجتشي علي ده هي اساسا كانت بايظة بايظة

كده بقينا 1105 قول 1100 جنية

كل ده منغير مصنعية

المصنعية بقي كانت 300 جنية و هو رقم مش كبير ولا صغير يعني ممكن يكون زيادة مثلا 50 جنية عن اي صنايعي بره بس للأمانه هم تعبوا جدا جدا في العربية و ريحوني جدا يعني معملتش اي حاجة غير مشوار شارع دمشق و هم اللي ودوني بعربية واحد منهم و انا بصراحة مفرقشي معايا المصنعية قد ما فرق معايا اني مطمن للشغل
هم اشتغلوا في العربية من الساعة 9 الصبح لحد الساعة 6 اخر النهار تقريبا بدون توقف

المصنعية دي كانت : تنظيف كربيراتير و فكه بالكامل
تركيب الماسورة و طبتين مياة و مجموعة مياة
تركيب فرن
كشف علي الفرامل
كان السنتر بيعلق غيرولي مكنة سنتر و ظبطولي السنتر في الاربع ابواب و كان الزجاج الشمال تقيل عملوه
كشفولي علي المارش و طلع عايز يتغير بس انا بصراحة كنت شطبت كل الفلوس فكبرت خصوصا انه بيعلق بس لسه ما ماتشي
غيرت قواطيش البطارية عشان كانوا متاكلين جامد من كتر الاملاح
تغيير بوجيهات و فلتر بنزين و فلتر هواء
و لما حسوا ان المارش بيعلق فكوا الفبره اللي ورا الدركسيون اطمونا علي الكونتاكت و علي الفيشة بتاعتة و غسلوها و هم فاكينها
فكوا قربة المياة بتاعة الريادياتير و غسلوها

يعني لما بفتكر كل الحاجات بحس ان 300 جنية مش كتير خصوصا انك مستريح و ضامن النضافة

اخيرا : بجد يا جماعة بلاش مياة الحنفية انتوا مش متخيلين كمية الاملاح اللي كانت جوه الماسورة و مجموعة توزيع المياة والله تحس انها كتل حجارة مش املاح

التكلفة مجمل بالمصنعية 1400 جنية و لو زودت ماكينة السنتر و القواطيش ممكن يبقي كمان 50 جنية تقريبا فيبقي 1450 قول 1500 جنية عشان لو ناسي حاجة

طبعا مش هوصف الموضوع ده زنقني اد ايه خصوصا انه جه علي غفله بس ربنا سهل في الفلوس و فعلا الواحد بقي مطمن

مش فاضل غير اني اغير فبرة الريادياتير اللي فوق لانها مشروخة و بتسرب بس والله من اللي شفته بقيت ازود المياة لما تنقص بمياة خضراء جركن شارية مخصوص للموضوع ده عقبال ما افضي اغير الفبرة او الريادياتير كله و اريح نفسي لاني غيرت الفبرة دي مرةز

الناس دي فين بقي ؟

هم في الاميرية و انت نازل من كوبري الطاهرة تخلي سور المخابرات علي شمالك الناحية التانية و تعدي علي طول اول بنزينة هتقابلك موبيل عند ميدان هتعدي علي طول ملكشي دعوه بأي تقاطع و تكمل تلاقي بنزينة تعاون تكمل برضة بس تهدي شوية وتخليك في اليمين تكمل هتلاقي شارع علي يمينك و هتلاقي جامع قبله علي طول الشارع اتجاهين تدخل الشارع ده هتلاقي موقف اوتوبيسات في اخره انت بقي مش هتكمل للأخر هتلف اول لفه و دي هتكون بعد 50 متر بالظبط و هترجع هتلاقي واحد اسمه رجب اسبيرانزا و هم بعديه الورشة بتاعتهم اسمها المتخصصون تعتبر علي اول الشارع لو انت هتطلع علي الشارع الرئيسي تاني

اتمني اكون افدت الناس زي ما بتعلم من الناس هنا

طيب يا باشا عندك فكرة فبرة الرداتير دي بتتكلف كام وهل هي اصلي اللي هتتركب
ولو الرداتير كله يكون بكام
وشكرا جزيلا

انا كنت غيرتها من زمان اوي ايام ما كنت في الكلية و كانت ب 100 جنية بالتركيب و هي مش اصلي خالص دي تقريبا كمان والله اعلم صناعة مصرية

هي اشتغلت حلو اوي لحد الخبطة و بعد كده سربت بس الموضوع عايز صنايعي شاطر

الريادياتير كله بكام معرفشي والله انا لسه هسأل و هسال كمان هل التيواني هيبقي كويس ولا هيفرقع بسرعة لان الاصلي ب 1000 و شوية فأكيد مش هجيبة