لوجان اوتو او صنى 2013 اوتو

**pinocchio** · 01-10-2012 01:24 AM

السلام عليكم
انا معايا لانوس وهى بصراحة عربية جميلة وحمالة اسية وبستحمل مطبات مصر وعفشتها جامدة بس انا تعبت من سواقة المنيوال ونفسى اسوق اتوماتيك زى الناس المحترمة انا دائما مقياسى فى اختيار السيارة هو رقم واحد التوكيل انة تكون معاملة محترمة مع العملاء من ناحية الصيانة وميكونش عندو غش فى قطع الغيار لان بعض التوكيلات بتجيب قطع غيار صينى وتركبها على انها اصلى ويشيلنى فى فترة الضمان من الالف للياء غير بعض التوكيلات بتتهرب من مسؤليتها عن السيارة اثناء الضمان وتكلف العميل ثمن الصيانة وقطع الغيار ودة اسمة نصب طبعا والتوكيل اللى يعمل كدة ميبقاش توكيل محترم ثانيا انا ماتفرقش معايا شكل السيارة من الخارج بقدر ما يفرق معى وسع صالون السيارة ووسع الشنطة وعلو السيارة عن الارض علشان المطبات والحاجات العملية اكتر هى اللى تفرق معايا انا محتار بين عربيتين اللوجان والصنى الجديدة ارجو من السادة الاعضاء ابداء اراءهم فى العربيتين دول بس ياريت محدش يرشحلى اى سيارة اخرى لان انا استقريت على الاتنين دول بس وياريت يذكر اسباب ترشيحة للسيارة دى وعدم ترشيحة للسيارة الاخرى مع العلم ان الصنى اغلى من اللوجان بحوالى 23000جنية هل تستحق فرق السعر دة واللجان 110 حصان الصنى 108او 99حصان فى تضارب فى المعلومات وفى كل الاحوال اللوجان عدد احصنتها اعلى اما الصنى فيها ميزة الفرامل absهل فرامل abs اصبحت شئ اساسى فى اختيار اى عربية او هى مش فارقة فى شوارع مصر وهى مجرد رفاهية زيادة وشنطة اللوجان اكبر من شنطة الصنى ب20لتر 510-490 لتر هل ال20 لتر دول فرق كبير ولا صغير والصنى فيها فتح خزان الوقود من الداخل اللوجان مفيهاش دركسيون اللوجان مالتى فنكشن الصنى مفهاش الصنى فيها مراوح للمقاعد الخلفية لكن هى مجرد مراوح مش تكيف الصنى لا يوجد بها مؤشر حرارة مجرد لمبة و الصنى الكاوتش بتاعها صينى يعنى لما تشتريها لازم تتكلف ثمن اربع كاوتشات جداد وشكرا

**Egyzizo** · 01-10-2012 01:50 AM

أنا كنت فى الحيرة دى من 3 سنين بين اللوجان المانيوال والصنى المانيول واللى حسم الاختيار للوجان هو ضيق الصنى.

لكن دلوقتى الوضع اختلف والصنى الأوتو واسعة جداً فالاختيار هيكون الصنى ببساطة لأن الصنى فئة أعلى من اللوجان فيها كماليات وأساسيات أكثر.

**pinocchio** · 01-10-2012 04:00 AM

المشاركة الأصلية كتبت بواسطة Egyzizo

أنا كنت فى الحيرة دى من 3 سنين بين اللوجان المانيوال والصنى المانيول واللى حسم الاختيار للوجان هو ضيق الصنى.

لكن دلوقتى الوضع اختلف والصنى الأوتو واسعة جداً فالاختيار هيكون الصنى ببساطة لأن الصنى فئة أعلى من اللوجان فيها كماليات وأساسيات أكثر.

شكرا لرد حضرتك

**pinocchio** · 01-10-2012 11:18 AM

اية يا جماعة انا مستنى اعرف رأى اللوجانوية ولا اروح للنيسانوية يمكن هم يردو عليا

**walid mohamed** · 01-10-2012 07:15 PM

انا كنت زيك بالضبط ؟؟؟ لكن لما حسبتها صح لقيت ان اللاوجان الاوتو تمام وفى الجون ؟؟ عربية بقالها فتره ماشية وبقت زى الرز فى الشارع انما لسه النيسان الشكل الجديد بتتجرب ؟؟ كمان نفس الاوبشن تقريبا وموضوع abs مش مهم اوى فى مصر ؟ لكن كمبيوتر الرحلات وكمان المالتى فنكشن يزيدوا عن الصنى وكمان الشنطة دى نعمة يا باشا ؟؟ وفة الاخر فرق السعر كبييييييير بالنسبة للى قولتهولك ؟ انا كنت والله رايح احجز الصنى بس سبحان الله حجزت اللوجان لأنها بصراحة تحفة بالنسبة لإمكانياتها مع سعرها الجاااااااااااااامد وكمان الصنى بوووووووووووور جدا من الداخل خامات ضئيلة بالنسبة للثمن وشوفها على الواقع واحكم وعلى العموم استخير ربنا وشوف قلبك هايميل لمين ؟؟

**ali_333** · 01-10-2012 09:30 PM

الاتنين واسعين والاتنين اوتوماتيك واي عربية جديدة بتبقى مريحة اللوجان عالية عن الارض لكن معرفش الصني والاتنين نفس القوة

يبقى تشتري اللوجان وتوفر ال 23 الف جنيه

انما لو مش مشكلة ال 23 الف بالنسبالك يبقى الصني فئة اعلى اكيد

**pinocchio** · 01-10-2012 10:21 PM

المشاركة الأصلية كتبت بواسطة walid mohamed

انا كنت زيك بالضبط ؟؟؟ لكن لما حسبتها صح لقيت ان اللاوجان الاوتو تمام وفى الجون ؟؟ عربية بقالها فتره ماشية وبقت زى الرز فى الشارع انما لسه النيسان الشكل الجديد بتتجرب ؟؟ كمان نفس الاوبشن تقريبا وموضوع abs مش مهم اوى فى مصر ؟ لكن كمبيوتر الرحلات وكمان المالتى فنكشن يزيدوا عن الصنى وكمان الشنطة دى نعمة يا باشا ؟؟ وفة الاخر فرق السعر كبييييييير بالنسبة للى قولتهولك ؟ انا كنت والله رايح احجز الصنى بس سبحان الله حجزت اللوجان لأنها بصراحة تحفة بالنسبة لإمكانياتها مع سعرها الجاااااااااااااامد وكمان الصنى بوووووووووووور جدا من الداخل خامات ضئيلة بالنسبة للثمن وشوفها على الواقع واحكم وعلى العموم استخير ربنا وشوف قلبك هايميل لمين ؟؟

شكرا لرد حضرتك ولو ما فيهاش رزالة ممكن اسأل سؤالين كدة لحضرتك او لأى واحد معاة لوجان
رد حضرتك على اللى بيقول ان اللوجان قطع غيارها غالية اما الصنى فقطع غيارها رخيصة؟
سمعت ان اللوجان الاوتوماتيك بتاعها مش حلو او بمعنى اخر ان سحبها بطئ انما المنيوال هى الكويسة؟
هل الاماكن الغريبة لزرار الكلاكس او زراير الازاز او البكرة اللى بتعد تلف فيها علشان ترفع او تنزل الكرسى مؤثرة فى راحتك فى العربية ولا دى حاجات بسيطة واتعودت عليها؟
وفى النهاية اشكر حضرتك على ردك

**pinocchio** · 01-10-2012 10:25 PM

المشاركة الأصلية كتبت بواسطة ali_333

الاتنين واسعين والاتنين اوتوماتيك واي عربية جديدة بتبقى مريحة اللوجان عالية عن الارض لكن معرفش الصني والاتنين نفس القوة

يبقى تشتري اللوجان وتوفر ال 23 الف جنيه

انما لو مش مشكلة ال 23 الف بالنسبالك يبقى الصني فئة اعلى اكيد

حضرتك الصنى بردو عالية عن الارض زى اللوجان

**Ahmed A Rahman** · 01-10-2012 11:21 PM

بص يا باشا انا اترددت قبل ما اكتب لك ردي بقالي كذا يوم
سعادتك عامل مقارنة حقيقية بكل اللي في العربيتين وعارف كل حاجه عنهم الاثنين
طالما وصلت للمرحلة دي يبقى القلب وما يريد يا باشا لانك زي مانت شايف الاثنين واحد

جايز تشتري اللوجان وتبص على الصني وتشتهيها
جايز تشتري اللوجان و تيجي تفرمل في غرزة تفتكر الabs
جايز تشتري اللوجان ولما ينزل الشكل الجديد تتحسر حتى لو نزل بعد سنتين

جايز تشتري الصني ويطلع فيها خوازيق لانها لسه جديدة وساعتها حتتقهر من اللوجان اللي مغرقة الدنيا
جايز تشتري الصني وتتخانق في مودرن موتورز وتفتكر توكيل رينو الاحسن بدرجة طفيفة
جايز تشتري الصني وتتحسر على ال 23 الف جنيه وتقعد تفتكر الاستثمارات العملاقة اللي كان ممكن تعملها وتبقى مليونير والشالية بتاع الساحل الشمالي اللي حتيجيبه من الارباح

زي ماحضرتك شايف الشيطان حيدخلك حيدخلك ويحاول يحسرك مهما اشتريت وعشان كده :
1. اللي انت بتحبها اكتر هاتها
2. الاستخارة
3. التوكل على الله حتى لو العربية الثانية بتقول بابا وماما