الموضوع: تجربتي للكيا بيكانتو الجديده

السلام عليكم ورحمه الله وبركاته

اعضاء الكيا ازيكم وايه اخباركم

انا بعتذر في البدايه التجربه مش مصوره انا مش من هواه التصوير

صديق ليا اشتري البيكانتو الجديده (مبيعرفش يسوق اوتوماتك ف انا روحت معاه استلمها من سمير ريان)

باختصار شديد

العربيه من برا تحفه

من جوه شيك جدا ما شاء الله عليها ولكن تبقى الخامات مش عاليه الجوده بتفكرني بخامات النيو اكسنت الحقيقه نفس البلاستيك المستعمل ولكنه كويس نوعا ما مش رديئ وانا بقول ده من خلال استعمالي للنيو اكسنت 4 سنوات محصلش للخامات اي بلاء

طبعا انا كنت نازل من النيو ريو هاي لاين ف خاماتها وقعدتها حلوين اوي ومريحه عن البيكانتو

ف لما ركبت دي اتدايقت الحقيقه شويه

طبعا تابلوه شيك وفي حته في الكنسوله الي تحت الكاسيت الي فيها ال cup holder فيها لمبه بتنور نور مايل للازرق جميله اوي بالليل

شماسه السواق فيها 6 لمض صغيريين ومرايه كبيره عشان البنات الحلويين يعرفوا التورته استوت ولا لسه

وشماسه جنب السواق مفيهاش اي حاجه غير مرايه

هي باختصار من جوه جميله ولكن ضيقه نوعا ما ف مش هتصلح اكيد لاصحاب القامه الطويله والناس التخيينه اوي وهي في المقام الاول اعتقد انها عربيه حريمي اوي

فتيسها طبعا زج زاج زي الالنترا ال 2007

فيها 2 ايرباج بلوتوث مالتي فانكشن وجنط اسبور العربيه خليجي كويتي

-------------------------------------------------

ركبنا سمينا بسم الله الرحمن الرحيم

العربيه وهي واقفه باورها ميااااااااا انا قولت بس زي النيو اكسنت نعدي 60 نلاقي نفسنا في الحماده والدركسيون بيلعب

ولكن الحقيقه فرحت لاني اول ما تحركت بالعربيه الدركسيون تقل بشكل ملحوظ كان العربيه تحولت من باور كهربا ل هيدرولك مثلا وكل ما السرعه بتزيد الباور بيتقل حقيقي

لاني في ناس كتير بتتكلم على عربيات كتير معاها وبتقول باورها بيتقل ومفيش ولا عربيه فيهم الباور بيتقل فيها والناس دي طبعا حماااااااده اوي

بس العربيه الحقيقه باورها متطور جدا حسيت اني راكب عربيه محترمه مصروف على الباور بتاعها

فيها نظام ايكوو شغال اوتوماتك على ما اعتقد طول منتا شايل رجلك من الدواسه او دايس بالراحه علامته منوره في الطبلوه يبقى شغال تدوس بنزين سنه علامته تطفي

العربيه سحبها على متورها وحجمها خرافي انا كاني بتعامل مع عربيه 1.6 وللعلم انا محاولتش اقرص على العربيه الا لما جبت ال 120 فقط ثواني ورجعت تاني

وانا اساسا مش مقتنع بموضوع التليين ده الي حد كبير ولكن برضو مقرصناش على العربيه

يعيبها طبعا انها على السرعات العاليه النسب عليا يعني على اخر نقله على 120 الاربي ام 3.5 في العربيات التانيه الاوتو برضو بس 1.6 بيبقى على 3 بالكتير وعربيات عاديه 4 غيارات برضو

طبعا التعامل معاها كان سلس وجميل والطبيعي مش شايف الكبوت ولا اي حاجه منه واتعودت خلاص على كل العربيات بالمنظر ده

يمين وشمال وقطر دوران جمال اوي

كاسيت سماعاته رديئه الحقيقه مع انه نفس ستايل السيراتو ولكن مش نفس جوده الصوت

مفيهاش عداد حراره وعموما اضائتها الليله ممتعه وجميله

ايييييييه تاني ايييييييييييه تاني

جربنا التكييف والعربيه واقفه مش قوي اوي ولكن بمجرد تحركها الموضوع بيختلف وبيبقى جلو وجيد جدا


صوت المتور في الطبيعي مش ملحوظ او احيانا بيبقى ملحوظ شويه بس هو صوته جميل عموما الله اعلم في الحرق هيبقى عامل ازاي بس هو عموما صوته مش مزعج

عدينا على شويه مطبات ما احتجناش نتلت ولا اي حاجه وكنا 3 في العربيه

قعدت ورا وجه حد تاني ساق العربيه انا كنت قاعد مسترييح نوعا ما بالنسبه لعربيه صغيره مكنتش متدايق لانها مش اوفر برضو في الضيق وانا حجمي مش كبيير ف جميله

العفشه طبعا والثبات

العربيه اكييد عندي تحفظ على عفشتها ناشفه واستايل السيراتو الي حد ما ولكن في النقر الجامده احيانا بتحس في رزع ناحيه الشنطه او القزاز الحلفي مش عارف المهم ان في حاجه بتسمع في حسم العربيه وانا شايف ان ده لان دي عربيه برضو صغيره ومستحيل هيبقى جودتها مثلا زي الكيا سيد او الجولف والحاجات دي

على الطرق المستقيمه والنضيفه ثباتها كويس اوي خصوصا بالباور ده وهي كده كده مش بتاعه غرز وبرضو مش مخيفه على سرعه 100 مش حاسس اني طاااااير اوي بالمقارنه بالحجم والامكانيات كويسه

في الطرق المتعرقه والمفصلات حماده بيبتدي يحضر معانا شويه مع العلم اننا زبطتا الكاوتشات كلها لانها طبعا طالعه من المعرض كاوتش 50 والتاني 40 وحاجه تفرح الحقيقه

النور بتاعها كويس جدا جدا وتقريبا فيها فوجات شغاله اوتوماتك كمان

مفتاح امبوليزر شكل بتاع الاوكتافيا بالضبط

ادونا دواسات وفواحه وميداليه واشتيرنا ضمان مش فاكر كام سنه الحقيقه بس هو سعر السنه تقريبا 1200 او 1500 مش فاكر

ووقفنا كمين النمر فين مفيش لسه مستلمين ربنا يباركلوا شكرا ياباشا اطلع ياباشا كله في الجميل الحمد لله


وطبعا لا تخلى الزحمه من واحد تلاقيه نط من عربيته بالجلابيه جوه عربيتك هي دي بكام ياكابتن الله يباركلك وشويه دعابه على الماشي


بس هو ده التقييم الفعلي للعربيه


انا شخصيا النوع ده من العربيات مبركبوش خالص ف قصه سعر مقابل امكانيات مقدرش افتي فيها الحقيقه

انما لو مثلا متجوز ومراتي واجعه دماغي هركبها حاجه زي كده وعلى البركه

طبعا تحفظي على العفشه عند ناس مرفوض وعند ناس مقبول ولكن انا شايف انها مش على المستوى

ومحتاجه تعامل حنيين معاها شويه

وبعتذر مره تانيه عن عدم وجود صور

ونسالكم الدعاااااء