فكرة مجنونة بس لو موجودة ياريت تفيدوني

**shaikh_tamer** · 08-10-2012 04:47 AM

رحت للسمكري علشان 128 بتاعتي و الراجل قالي ان العربية محتاجة عربية تانية
يعني باختصار شديد قالي الاربع ابوب و السقف و السدر و الشنطة و الكبوت و القوائم و القنطرة و شوية حاجات تانية مش فاكرهم
ولان السمكري كان انسان امين, و كمان لانه قالي الموضوع ده حيتكلف 8000 جنيه بس و طبعا ده اعلي من قدراتي فهو قالي منصحكش تغير جزء و تسيب جزء لانك بعد كده حتحتاج تغيرها و انصحك انك تفضل راكبها لحد لما تقع منك خالص و ساعتها تبقي تشرفني

الفكرة بتاعتي علشان مطولش عليكم هي ليه محدش يصنع هيكل السيارة بالكامل, بمعني اني بدل لما اغير كل ده فانا باختصار شديد اروح اشتري هيكل او جسم عربية جديد 128 و اسقط فيها كل حاجة بداية من المتور و الزجاج و العفشة و الفتيس و الكراسي و كمان ادهنه و كده

اعتقد ان لو فيه سمكري ياخد الفكرة ديه خصوصا في العربيات القديمة اللي زي 128 و اللادا, فيه ناس كتير اوي اوي اوي اوي نفسهم يشتروا عربيات قديمة و يغيروها بعربية جديدة بالكامل
صدقوني الفكرة انا دورت عليها في النت كتير و ملقتيش حد بيتكلم عنها او اي تاجر بيبعها
الفكرة حتوفر كتير اوي لاي شخص عايز يركب جديد و حتحرك سوق المستعمل كتير لان الزبون مش حيقلق من السمكري, كل الموضوع انه حيسال عن جسم السيارة الجديدة فاضي بكام و تكلفة نقل كل حاجة من السيارة القديمة للجديدة و بعد كده يبيع الجسم القديم خردة بدون المرور علي السمكري نهائيا

ايه رايكم في الفكرة ديه؟؟؟؟؟؟؟؟

**Ahmadhamza84** · 08-10-2012 04:54 AM

حضرتك جريء قوي في الطرح ...
أنا لو مكانك هختف أكتب فكرة زي دي لحسن يقولولي بس ياحبيبي :)))
هي فعلا فكرة حلوة بس أنا مش خبير علشان أفهم وأقول هل هي جيدة أم لا ...لهذا معجب جدا بجرأتك في الطرح ..
دم رائعا

**shaikh_tamer** · 08-10-2012 05:04 AM

المشاركة الأصلية كتبت بواسطة ahmadhamza84

حضرتك جريء قوي في الطرح ...
أنا لو مكانك هختف أكتب فكرة زي دي لحسن يقولولي بس ياحبيبي :)))
هي فعلا فكرة حلوة بس أنا مش خبير علشان أفهم وأقول هل هي جيدة أم لا ...لهذا معجب جدا بجرأتك في الطرح ..
دم رائعا

شكرا يا استاذ احمد علي تشجيعك
دمت صديقا

**alaamousa** · 08-10-2012 07:48 AM

طبعا يا استاذي مينفعش لسبب واحد واهم سبب ان كل سيارة ليها رقم قايم ورقم كارتيرة ده اولا
ثانيا فكرة زي دي تخلي سوق بيع سيارات تاني وده يخلي بقى اللي عايز يركب اوبل يركب واللي يركب دايو يركب لانه من الساهل يصنع البودي اللي هو عايزه ويسقط جواه اي حاجة
ثالثا موضوع البودي ده ليه مكن غالي جداااا عشان الميزان والقوايم وده بيسبب ثبات العربية
يارب مروري يكون طيب

**amdd** · 08-10-2012 09:12 AM

فكره حلوه بس رقم الشاسيه هتعمل فيه ايه؟!!

**benmatar** · 08-10-2012 11:25 AM

كلام جميل، وهو ده اللي بيحصل يا فندم، لما تشتري 4 أبواب استيراد ورفارف وكبوت وشنطة تبقى عملت كده ووفرت وقت ومجهود سمكري وتكلفته، بدل ما تسمكرها كلها في أيام وليالي ومش هتطلع زي ما تجيبلها أبواب ورفارف استيراد، وبرضه عندك مصنع مشمش في العامرية بيصنع رفارف وأبواب صاج فقط جديدة لأغلب الموديلات المنتشرة، وأكتر شغله للفيات واللادا زمان ولازال وبضاعته موجوده في مصر عند بتوع قطع الغيار الجديدة اللي بتشوف رفرف28 جديد ولونه بيبقى اسود كده. وأعتقد كام مصنع تاني بيعمل كده بس مشمش أشهرهم.
بالنسبة لعربيتك ممكن تعمل زيارة سريعة لعزبة شلبي، وممكن تجمع من هناك عربية 128 زيرو، الحاجات اللي بتيجي بتكون من أوروبا ومركونة وغالبا هتلاقي الأبواب والكبوت فابريقة مترشتش وحالتها زي الفل وتنقي كويس، الشطارة إنك تلاقي طقم أبواب كامل بالزجاج والفرش الداخلي بتاعه وكبوت وشنطة ووش أمامي كامل (فوانيس وشبكة بالصدر) لونهم زي لون عربيتك، وجوز إكصدامات، وتفاصل معاه وتركبهم على عربيتك عند سمكري محترم، لو عاوز سقف هتلاقي عندهم.
هتلاقي العربية فلة بإذن الله ومتقعدش تسمكر وتدقدق وترش دوكو وتدخل في وجع دماغ. ولما تعجبك ربنا يكرمك وتروح تجيب تابلوة وطارة ولو عاوز عفشة أو ميكانيكا، والعربية تبقى تمام معاك وبلاش تشتري جديد وبلاش تقعد تصلح وتدوخ نفسك