أشترى بومه 1300cc ولا بلاش يا متعلمين يا بتوع اللانسر :)

**halika76** · 10-10-2012 04:24 AM

السلام عليكم ورحمة الله وبركاته ...

يا جماعة كنت محتار بين كورولا 2006 1300cc عداد 65000 كيلو ورشة بره نظافه وفابريكا من الداخل
وبين لانسر بومه 2008 1300cc عداد 50000 كيلو فابريكا بره وجوه ما عدا خبطه فى الرافرف الامامى

التنين أوتوماتيك :)

والأتنين بتوع ناس أعرفهم وأعرف إستخدامهم كويس ... وعرضت الموضوع فى قسم تويوتا من قبل
والكل أجمع على الكورولا أقوى وبصراحه كنت خلاص صليت إستخارة وكنت رايح أخلص فى الكورولا
ولكن للأسف صاحبها رجع فى كلامه لإنوا مش لاقى حاجه أعلى وبنفس النظافه فى الوقت الحالى بالفلوس إللى معاه ... فأجل موضوع البيع ...

فأنا الآن مضطر أشترى لانسر ... بس الغالبية بتقول لانسر أوتوماتيك 1300cc ضعيفه

مش عارف أعمل إيه ألغى الشراء خالص ولا أخلص فيها ...

ملحوظة هامة : أنا إستخدامى للسيارة بسيط ولست من هواة الشد والجرى ... بس لما بسافر بامشى على 120 - 140 حسب الطريق والظروف .... ولكن غير ذالك إستخدامى خفيف جداااا

أفيدونى أفادكم الله ... أنا محتاج عربية أتوماتيك ومكيفه ... أهم حاجه فيها الإعتمادية ... ياعني مش كل شوية فى الحرفيين بغيير حاجة فيها ... هل المواصفات دى متوفرة فى لانسر بومه 1300cc أتوماتيك ولا ... أصرف نظر

**Khaled Lanos** · 10-10-2012 07:38 AM

وعليكم السلام ورحمة الله وبركاته

بص ياباشا أنا جاري معاه لانسر بومة 2007 1300 سي سي وكنت بدردش معاه عن العربية فقولت له اخبار اللانسر معاك ايه فقالي هي اللانسر بصفة عامة جميلة بس الــ 1300 سي سي ضعيفة ولما بشغل التكييف سحبها بيبقى ميت وبتبقى بطة بلدي.

وكان متدايق اوي من النقطة دي لدرجة انو قالي انا بفكر أبيعها وأجيب الــ 1600.

فأنا رأيي تشوف حاجة 1600 نضيفة ويكون فرق السعر مش كبير بالنسبة لك.

لو مش هينفع شوف لك فيرنا 1600 وأمرك لله

**salah_86** · 10-10-2012 07:54 AM

بص ياباشا من مجرب 1300 مانيوال ماشاء الله زى الفل بالنسبالى بس طبعا العزم اقوى فى 1600 والقرار ليك

**MohammedAladel** · 10-10-2012 09:30 AM

خليك فى ال 1600 خصوصا لو كانت أوتو لو 1300 يبقى مانيوال متركبهاش أوتو

**mado83** · 10-10-2012 10:14 AM

ممكن تقولنا كنت راكب عربيه ايه قبل كده علشان الموضوع ده هيفرق
لانك لو كنت راكب حاجه اعلى يبقى مش هتعرف تركب دى

**thunder155** · 10-10-2012 11:25 AM

انا مش عارف الناس بتكره العربيه دى ليه , انا ركبتها مع واحد و سافرت معاه حوالى 200 كم و كان ماشي 120 و التكييف عادى جداً و كانت اوتوماتيك و طول السكه كنت مفكرها 1600 لحد ما وصلنا بتكلم معاه عرفت إنها 1300

غير كده كل الناس اللى راكبه الكريستاله محدش اشتكى منهم فى اى حاجه مع انها 1300 و موديل اقدم

**MohammedAladel** · 10-10-2012 11:59 AM

عشان الكريستالة والمكواة أغلبهم مانيوال وجايز يكون فيه اختلاف فى الوزن

**hanyhelmy** · 10-10-2012 02:14 PM

السلام عليكم
انا معيا 1300 اوتوماتيك هى حلوة بس لما تشغل التكيف بتبقى ضعيفة متوسط ولما بحب اشد بقفل التكيف نص دقيقة لحد اوصل 60 كيلو وارجع اشغلو تانى كل ده جوه البلد بس اما بره مفيش الكلام ده وعايش عادى جدا.:

**mody1221** · 10-10-2012 03:51 PM

الناس كلها مش بتتكلم فى ال 1600 بالتكييف مع انها 1600 وبرضة لما بتشغل التكييف الماكنة بتضعف
شيىء طبيعى لان التكييف بيسحب من قوة الموتور
من الاخر ال1300 لو مركب فيها 4 او 5 ومشغل التكييف وحبيت تجرى او تشد مش حتديك اداء مقنع
غير كدة عربية محترمة جدا وزيها زى الكورولا بالظبط ويمكن احسن ف الشكل والتابلوة

**walidadel81** · 10-10-2012 08:55 PM

توكل علي الله مدام انت سواقتك هاديه وانا شايف ان ال 1300 مش بطه بلدي وبالاول والاخر مهاره السواقه اللي بتجري العربيه باي وقت مش العربيه اللي بتجري لوحدها

الموضوع: أشترى بومه 1300cc ولا بلاش يا متعلمين يا بتوع اللانسر :)

LinkBack

أدوات الموضوع

عرض

-

-

-

-

-

-

المواضيع المتشابهه

استفسار بومه 2004 اوتو 1300cc

لانسر بومه 1300cc كامله اتوماتيك

لانسر بومه 1300cc كامله اتوماتيك 2008

للبيع لانسر بومه اتوماتك 1300cc 2006

يا بلاش عربية 1300cc انجكشن ب 30 الف جنية وعليها تكييف هدية

الكلمات الدلالية لهذا الموضوع

المفضلات

المفضلات

ضوابط المشاركة