الموضوع: مقترحات

السلام عليكم ورحمة الله وبركاته
حابب اعرض عليكم فكرتين لو ممكن المنتدى يتبناهم لو قابلين للتنفيذ :

الفكرة الاولى : افتتاح قسم خاص للتوظيف فى مجال سوق السيارات
بمعنى اى معرض / توكيل / مركز صيانة عنده فرصة توظيف او تشغيل او حتى فرص تدريبية لاعداد كوادر جديدة فى سوق العمل فى مجال سوق السيارات يتم الاعلان عنها من خلال المنتدى.

يمكن نكون سبب فى تشغيل حد قاعد فى البيت او حد فقد وظيفته وخصوصا فى الفترة السابقة وكذلك اقترح ان يقوم المنتدى بالاتفاق مع المعارض والوكلاء ومراكز الخدمة بنشر اعلانتهم الوظيفية بالمجان حتى نساهم فى حل ازمة البطالة بقدر المستطاع.

الفكرة الثانية : وهى عن تجربة شخصية حيث اننى لم اكن اعمل فى الصغر فى فترات الاجازة الصيفية وده خالانى فاقد شيئين :

الشئ الاول افتقد خبرة التعامل مع الناس عامة ( اكتسبتها بعد فترة طويلة من العمل )

الشئ الثانى افتقد لخبرة التعامل مع الصنايعية وخاصة لما اشتريت العربية حيث اننى لم اكن
استطيع الحكم على مصداقية الميكانيكى او الكهربائى لانى جاهل باللى بيقوله وكذلك معنديش الخبرة فى تقدير تكلفة الحاجة اللى بيعملها.
لانه فيه حاجات لما تيجى تتعمل فى العربية بتحس من اسمها اول مرة انها حاجة كبيرة ولكن عند التنفيذ بتلاقيها حاجة صغيرة وممكن تعملها بنفسك
(على سبيل المثال ومن غير تريقة انا كنت بروح فى الاول للميكانيكى عشان يغير فلتر الهوا لانى ماكنتش اعرف بيتركب فين وازاى وكذلك ماكانش عندي الثقة بالنفس انى لو ركبته حركبه صح )
طيب ايه المطلوب من المقدمة ديه :

بقترح لو فيه فرص تدريبية لاولادنا او شبابنا او حتى لينا احنا ككبار فى مراكز الصيانة يتم الاعلان عنها من خلال المنتدى حتى نكتسب الخبرة فى التعامل مع السيارة ونحاول نعرف الاعطال ولو حتى البسيطة اللى ممكن نتعرض لها وازاى نقدر نحلها .

وصدقونى يا جماعة الاولاد لازم يعملوا حاجة فى الصيف لانى سمعت الدكتور عمرو خالد قبل كده بيقول لازم اولادنا يتعلموا حرفة او صنعة فى الصيف زى السباكة او النجارة او حتى يتعلموا لغة .

ولنا فى رسول الله صلى الله عليه وسلم الاسوة والقدوة الحسنة فقد كان يعمل راعى غنم فى الصغر (صلى الله عليك وسلم).

ديه مقترحات حبيت اعرضها على حضراتكم عشان تطورا او تعدلوا او تضيفوا عليها او قد تكون غير قابلة للتنفيذ من الاساس على ارض الواقع .

بشكركم وارجوا انى ماكنش طولت عليكم

الفكرتين احسن من بعض بصراحة
بس الفكرة التانية ملائكية شوية
لان مركز الصيانه هيستفاد ايه لما يضيع وقته عشان يعلم حد
غير ان لما العربية تعطل وانت صلحتها هو هيقعد في البيت كده
فلازم نفكر تبقى المسألة موزونة ويكون في حافز راجع للمركز ده

اما الفكرة الاولى فياريت فعلا يتم افتتاح قسم ومحاولة استقطاب اصحاب العمل هنا
لوضع الوظائف اكيد السوق دلوقت بيتحسن والناس عايزة موظفين