الموضوع: ليه المصريين بيزعقوا دايما سواء غلطانين ولا مجنى عليهم ؟

جيتي على الجرح والله
من كام يوم كنت ماشي في طريقي عادي جدا وفجأة لقيت العربية اتخبطت من يميني ورا ..ببص في المراية لقيت عربية ربع نقل بارزة شوية عن صف العربيات اللي راكنة قلت يمكن أنا اللي غلطان لأني افتكرتها راكنة ... ثانية ولقيته طالع بالعربية أتاري البيه عايز يرمي ضهرة في وش العربيات اللي جاية فاستعجل وما استناش أما عربيتي تطلع منه فخبط الرفرف اللي ورا ..فنازل بكلمه لقيته باااارد وبيرد علي بمنتهى البرود ويقولي انت اللي غلطان ... يا بيه ده أنا ماشي في طريقي وانت راكن وكمان خابطني من ورا .. المهم كنت سايب العربية دايرة فخفت حد يركبها ويجري فاستعوضت ربنا وسبته ومشيت ...
الموقف نفسه اتكرر بحذافيره من حوالي شهر... كنت ماشي على طريق سفر وباخد مطب على الهادي وواحد راكب شارك منتظر على طريق جانبي وبرضه استعجل وطلع بالعربية قبل ما عربيتي تطلع منه وخبطني خبطة جامدة في نفس المكان ونزل يزعق برضة ويقولي انت اللي هديت زياده عن اللزوم ... المشكلة إن ما حدش بيحاول يعتذر ولا يقول آسف ولا معلش ولا حقك عليا كله بيزعق ويغلطك وخلاص ومستحيل يعترف بالخطا ...شعب لا يعرف ثقافة الاعتذار هو شعب همجي

والله انا فعلا كنت همى انه يكون سليم مش اكتر ولا فكرت اديه ولا اخد منه بس بجد هو نازل اسلوبه من الاول قذ ر بيقولى دى طلعة تطلعيها طيب والنبى انا هعمل ايه اكتر من ادى مدية اشاره وبستنى لما ملاقيش عربيات قريبة منى هعمل ايه تانى هنزل اخد اذن من الشارع يعنى اللى مضايقنى انى كنت خايفة عليه وهو نزل فكرنى خايفة منه ومش هفكر امشى بالعربية لانى بنت ومش متخيل بنت تتجرا تعمل كده وتسيبه مع نفسه هو فكرنى هعيط واعصابى هتسيب وهقوله خد العربية لو تحب ثقافته كده واهو عمل شاطر وخد رقم العربية على اعتبار ان مش ممكن اعمل الف محضر لعربية راكنة طالما مفيش واقعة اصلا هيروح يثبت كلامه بايه بالشهود طيب ماهو الطرف الاخر كمان يجيب الف شاهد انه فى الوقت ده كان فى بيته ومعاه ناس شعب بقى ماشى بالدراع حتى مفهومهم عن القانون بلطجة لو لقيته محترم كنت مش هخليه يضطر يزعق اساسا والله العظيم حتى لو كان غلطان كنت هراعى انه غلبان ومش هاخد منه حاجة بس هو نازل عنده كمية حقد وغل اصلا تكفى شارع بحاله من البنات اللى اهلها جايبين لها عربيات نازل يقول كل ست بقت ............ ركبت عربية وتدوسنا منمشيش فى الشارع علشان الهوانم يمشوا براحتهم يعنى الراجل نازل مش مستعد غير للردح البلدى وانا مش هعرف انزل للمستوى ده فى الكلام شىء غريب بجد متخيلين ان الحكومة هتنضف البلد طيب هتنضف دمنا اللى الهمجية فيه ازاى

انا كتبت مشاركة ومش لقياها

خلاص ظهرت فوق

حاجه اخر قله ادب وكويس انك اتصرفتى كده
انا امبارح ريحت على واحد لادا وكسرتله وش فانوس ونزلت لقيته جالى وانا اتاسفتله وعرضت عليه انى ادفعله تمنه قالى عربيتك سليمه قلتله انا تمام قالى اتوكل على الله حصل خير ولا يهمك وكنت محرج من ذوقه جدا
فيه الوحش وفيه الكويس بس الوحش كتيييييييييييير

أسلم حاجة عملتيها
و نفسي الناس تفهم أنه مش بالعافية ولا الصوت العالي
إنما بالأدب و التفاهم كل خلاف أو مشكلة ممكن تتحل

أنا متذكر موقفين مريت بيهم
أول موقف كنت بأخد يو ترن على الضيق و فيه عربية ربع نقل مقفولة بتلف معايا عالواسع
طبعاً أنا ماكنتش شايف منها إللي جاي و كنت أساساً متنرفز بسبب مشكلة عندي
قمت طالع عالاطول من غير ما أستنى و جت عربية خبتطني في اليمين قدام
طبعاً أنا إللي غلطان ، المهم قام واقف و قافل عليا الطريق آل يعني بلطجي
و هو لسه في راكب في العربية قلتله أستأذنك نركن على جنب علشان ما نوقفش الطريق
و أنا إللي غلطان و إللي أنت عاوزه ، الراجل بصلي و تنح و قاللي سلامه عليكم !

الموقف التاني كنت ماشي في إشارة بطيئة جداً يعني على الأولاني
و أنا ماشي بصيت جنبي و سرحت لاقتني خبطت في إللي قدامي و خليته خبط في إللي قدامه
كانت واحدة ست نزلت من العربية قلتلها برضه لو ممكن نركن على جنب علشان الطريق
و أنا إللي غلطان و إللي أنتي عاوزاه
ركنا على جنب و قالتلي أنا بأعمل أي حاجة في عربيتي في التوكيل (كانت بيجو حديثة)
قلتلها خدي نمرتي و أنا هأخد نمرتك و لما تروحي التوكيل كلميني و أنا متكفل
المهم عدت الأيام ولا اتصلت ولا حاجة قمت أنا متصل بيها و لما عرفت أني إللي كنت خبطت عربيتها
استغربت و قالتلي هو فيه كده أن واحد يكون خبط حد و هو إللي غلطان و هو إللي يتصل
قلتلها شوفتي بقى ! المهم قالتلي لسه مارحتش التوكيل و بعدها ماتصلتش برضه (الكلام ده من حوالي سنتين)

خير إن شاء الله ...