الموضوع: موقفين زي الفل و ستر ربنا !

السلام عليكم..

أولاً بحب بجد اشكر كل واحد هنا في المنتدى, لولا بجد ستر ربنا أولاً و المنتدى ده و المعلومات اللي اخدتها منه كان زماني عملت حادثة صعبة و المشكلة ان كان معايا والدتي و صاحبتي !!

بجد ربنا يكرمكوا و يكفيكوا شر الحوادث !!

كنت راجعة امبارح من مدينة نصر للدقي على أكتوبر, طبعاً العربية قررت انها ترخم و المروحة وقفت.. أول ما أمبير الحرارة علي ركنت على اليمين طبعاً و فتحت الغطا و استنيت !

طبعاً كذا حد وقف عشان يساعدوا بس محدش متخصص منهم, المهم جيه واحد من المرور على بيتش باج و قالي هازق العربية لحد المنزل اللي جاي و تحت فيه الميكانيكي, قلت تمام أوي.. راح فعلاً زقني و جينا عند منزل شبرا و بدأنا ننزل..

الغلطة الشنيعة اللي عملتها ان طبعاً الكونتاكت كان مقفول, فأول ما بدأنا ننزل السرعة زادت , أدوس على الفرامل.. خارج الخدمة و متحجرة.. و كنا نازلين كمان على حتة ملف و اللي معايا شغالين هدي هدي

المهم رفعت فرامل اليد عشان تهدى شوية و الحمد لله افتكرت موضوع كان في المنتدي عن ان الفرامل بتحجر ساعة لما بيبقى الكونتاكت فاصل و شغلتها بسرعة و الحمد لله استجابت.. و الموضوع عدى بسلام "بغض النظر عن ان ركبي سابت "

بجد لولا الموضوع و المشاركات كنت كملت عادي جداً و لبست في الرصيف و الله اعلم كان ممكن يحصل ايه..


تاني موقف حصلي النهاردة "مش فاهمة حد باصلي في العربية ولا ايه " كنت ماشية في شارع متفرع من الهرم, و واخدة الشمال عشان هادخل يو تيرن, و ماشية على التاني و مهدية, إذ ا فجأة الأخ اللي كان في العربية اللي قدامي فرمل جامد, رحت مفرملة على الأخر طبعاً "رغم اني سايبة مسافة" و لبست فيه من ورا, راح واحد جيه و لبس في العربية عندي من ورا..

طبعاً انا اتنطط, نزلت و رحت للي كان قدامي عشان افهم هوا حصل ايه, بزعق طبعاً و بقوله حد يفرمل فجأة كده, راح مزعق هوا كمان و انا مالي و توكتوك كسر عليا و انتي اللي غلطانة و صوته فاتح على البحري !!

رحت قلتله هاكلم الشرطة ييجوا يعرفوا مين الغلطان, طبعاً اتصلت محدش رد , المهم سبته لصاحبتي اللي كانت معايا "مبهدلاها معايا و الله " و رحت اشوف العربية جرالها ايه, من قدام مكانش حصل حاجة, صاحب العربية اللي خبطت فيا من ورا كان واقف كده, عربيته كانت تويوتا قديمة فقلت انا هلاقي عربيتي بقت هاتش باك طبعاً..

سبحان الله بجد, لقبت ان عندي ماتخدتش, و عند اللي ورايا الكبوت اتنى كده و الرادباتير كان بيسرب !

الراجل كان محترم جداً و سألني ايه اللي حصل حكيتله و كان فيه ناس واقفه حكوله, جيه القرد التاني يقولي "مش عربيتك سليمة و عربيتي سليمة, مالك متضايق ليه بقى؟!! "
رحت طلعت فيه قلتله انا لو جبت بنزين و ولعت في عربيتي مش أزمة, انما الأستاذ اللي ورايا اتضر.. مكملش دقيقة و راح خد عريته و انا بكلم اللي اتخبط ورايا و مشي..

عرضت طبعاً اني ادفعله أي مبلغ يطلبه في التصليحات بس رفض و قالي ان مش ذنبي و رفض تماماً.. اعتذرتله تاني و روحت.

بجد اللي وقف فجأة قدامي لو كان اعتذر مكنتش هاعمل حاجة, بس اسلوبه خلاني اتعصب عليه في الشارع, و بجد اللي اتخبط فيا كان محترم لدرجة اني حاسة بتأنيب ضمير فظبع..

ستر ربنا معايا في الموقفين بجد مقدرش أوصفهم, أول مرة انه فكرني, و تاني حاجة ان العربية متخدشتش.. لدرجة اني قعدت أدور لما روحت على مكان الخبطة و الحمد لله مش باينة خالص..

اللي عملته في تاني موقف كان صح ولا انا غلط؟؟

الحمدلله جت سليمه
بس حاولي تخلي المسافه اللي بينك وبين العربيه اللي قدامك اكبر شويه