الموضوع: بالصـور .. الاعلان الرسمى من مصـنع نيـسان عن مواصـفات واسعار الصنى ســوبر صـالون 2013

بصراحة العربية على الطبيعة لما شوفتها يا جماعة عجبتى للامانة
الشكل من غير تعديل من الخارج كنت بعطيه مثلا 50% لكن دلوقتى ممكن اعطيه 75% للافضل .. وياسلام لو عرضوا مقاس الكاوتش الى 195 كنت حعطى الشكل الخارجى 85 % لان التعريض كان حيعطى جمال للعربية بردوا

نيجى بقا الى داخل السيارة .. لما اضافوا اوكر النواكل وكمان الحلى الكروم اللى فى الابواب مع الفرش اللى فى جنب الباب القماش بدل من كان فيبر .. اعطى للعربية شياكة وقيمة عن الاول
وفعلا كثر الفيبر زمان بدون ما كان بيدخل عليه اى تطعيمات بيعطى احساس ان العربية فقيرة من جوة .. لكن الموضوع ده اختلف
ويمكن زمان انا مكنتش بحب الطابلوه الاسودوبحب البيج .. عشان كثرة الفيبر اللى فيه بيخلى الاسود شكله فقير جداااا .. لكن دلوقتى احترمته بعد التعديل اللى علموه .. ولما اشوف الفرش الداخلى البيج حقولكم انطباعى بردوا
وبصراحة الاضافات اللى حطوها ممتازة بالنسبة للزيادة اللى حطوها ..

وبصراحة مع الفاميه اقدر اقولكم اللون الفيرانى فيها حيكسب جدااااااا .. وبصراحة كلها الوانها حتكون حلوة مع الفامية والجنوط الاسبور

والحجز ابتدى من دلوقتى .. وزيه زى الex بياخد وقت

عيوب الصنى الجديدة اتكلمنا فيها .. والمصنع ابتدى ياخد باله .. ويركز فى انتاج العربيات حتى لو طول واخد وقت .. المهم الحاجة مش تتكروت فى انتاجها .. وتطلع مظبوطة

فى توكيل كورى مشهور جدا .. عنده عربية مشهورة اوى .. وبتتميز بسوء فراملها وطنابيرها .. وناس كتير وصلوا للتوكيل ان فى مشكلة .. ومع ذلك .. معملش تطوير .. ولسه فى مشاكل فى العربية الكورى دى ومش عالجوا العيوب اللى فيها .. لكن فى نيسان الوضع مختلف

لان نيسان بتاخد تقارير مراكز الخدمة عشان تشوف العملاء بيشتكوا من ايه وياخدوا بالهم منه ويصلحوا من اى عيب وقعوا فيه .. وده اللى بنسعد بيه فعلا وبنقدره .. واتفرجوا بعد سنة حيكون للعربية دى مع التطوير واخد السلبيات وتحويلها الى امتيازات .. حيكون لها شان كبير فى مصر

نتمنى المجهود يكون حاز على اعجابكم

تحياتى

المشاركة الأصلية كتبت بواسطة land_cruiser

يا صقور رجاء اللى يلمح الموضوع ده فى اى منتدى تانى ملطوش و مش مكتوب انه مقتبس و مين هما أصحابه الحقيقين يدخل يحط تعليق ان الموضوع ده مقتبس من الموضوع الفلانى اللى اتكتب بتاريخ كذا . معلش مضطرين نعمل حفظ لحقوق الملكيه الفكريه بالطرق البلديه لان ده مجهود ناس تعبت فيه علشان تطلعه بالشكل المحترم ده

معاك حق يا وليد
بس صبر يومين وتلاقيه اتسرق وراح منتدى منافس .. ودعوات الجمهود تتنسب لناس تانية
اللى بيتعبنى بجد ان فى موضوعات عن تجارب شخصية فى سيارتك وتتاخد بالصور .. ويتنسب لشخص تانى

اومال حعمل ايه فى موضوع قطع الغيار اللى لفيت كعب داير على مودرن وعلى اوتو ايجيبت عشان اجيب الاسعار .. اكيد حيتسرق لما ينزل
والله لو اى حد راح عشان يجيب اسعار لقطع الغيار لاكثر من 20 بند قطع غيار .. حيدفع فلوس اكثر من 100 جنيه عشان يخدهم ..
لكن مركاز الخدمة دى الحمد لله فى علاقة تعاون ومحبة بينا وبينهم فعشان بيقدرونا ومش بيتاخروا علينا فى اى معلومة حتى لو كانت فوق طاقتهم

فبرنا يستر من اللى جى

والحمد لله ان المجهود نال على اعجابك يا ويل
ومتنسوناش ياشباب فى الدعاوى على المجهود المبذول
لان ده راس مالنا اللى بنسعى له كلنا .. وهو رضا المولى سبحانه وتعالى وارضاء اعضاء نيسان نايل ورضا النفس وسط محبتكم لينا

تحياتى ليك للجميع