الموضوع: تجربة سيئة جداً مع مركز Speed Service Center

السلام عليكم
يمكن يكون ده اول تعليق ليا علي المنتدي من فترة طويلة
ولكن حبيت اوضح شي مهم واقول كلمة حق انا اتعاملت مع مركز سبيد سيرفيس والذي عرفتة عن طريق المنتدي
تقييمي العام للمركز جيد بالنسبة للاسعار اللي بيشتغل بيها يعني الاخوة الافاضل لازم نكون منصفين مش معقول اعمل صيانة للعربية ب50 جنيها اللي بتتعمل في التوكيل ب400 جنيه وبنتزنب عليها يوم كامل في التوكيل ولما تحصل مشكلة عادية (وهقولك بعد كدة لية عادية) نقوم نعلق المشنقة للمركز والصنايعي اللي اشتغل في العربية ونتعامل معاه كاننا بنتعامل مع غبور مع العلم ان مشاكل اكتر من كده بتحصل من التوكيل (وهقولك بردة بعد كدة ليه) انا لية تجربتين واحدة مع التوكيل وواحدة مع مركز سبيد سيرفيس بعد ضمان العربية مخلص
التجربة الاولي مع غبور مركز ابو رواش
انا معايا النترا 2009 اشتريتها زيرو ومن اول مجبتها مبعملش الصيانة الا في التوكيل كل مرة بروح حتي لو هغير زيت باضي اليوم كلة في التوكيل وبدفع المبلغ المحترم اللي انتة عارفينة وكلها طبعا صيانات عادية ولكن علشان العربية في الضمان كنت مضطر دائما اوديها التوكيل بالرغم من الاسعار المبالغ فيها في المصنعيات وقطع الغيار والوقت الضائع في الانتظار والذي لا يتناسب مع الاعمال المطلوبة المهم مش هطول عليكو لحد مجت صيانة ال40000 حجزت معاد ورحت سلمت العربية وقاللي المهندس العربية فيها حاجة تانية غير الصيانة الدوريه قولتلة بعد اذنك الفرامل ضعيفة وطبعا قاللي علي اللي هيتم في العربية في الصيانة من تغيير الزيوت وماء الريداتير والتكلفة المبدئية ووافقت ومضيت ودخلوا العربية وبعد حوالي ساعتين لاقيت المهندس بيكلمني وبيقوللي التيل الامامي محتاج يتغير قولتلة امين المهم العربية خلصت واستلمتها الساعة 5 مساء وانا في التوكيل من الساعة 11 الصبح طبعا لقيت العربية مرمية قدام الاستقبال وحتي ملقتش حد يسلمهالي لان المهندسين كانوا تقريبا بيقلبوا علشان يمشوا اخدت العربية ومشيت علي الدائري في طريقي لبيتي في المعادي وقبل ماوصل محور المنيب وانا ماشي علي 90 تقريبا لقيت العربية بتتهز جامد جدا كاني ماشي علي زلط مش اسفلت اتخضيت وقولت دا اكيد عجلة مش مربوطة كويس هتفك من العربية قعدة اهدي لحد ماخدت يمين الطريق ونزلت ابص علي العجل والمسامير لقيتهم مربوطين كويس ومفيش حاجة مفكوكة فتحن الكابوت لقيت كل حاجة تمام قولت امال فية اية
المهم ركبت العربية تاني ومشيت لقتها ماشية عادي قولت يمكن تهيئات وقبل ماوصل لمدخل المعادي تكرر نفس الموقف ركنت تاني ونزلت بحط ايدي علي الجنط اللي ورا لقيتة مولع نار واللي قدام حرارته عادية المهم استنيت عليها شوية لما هديت وكان فاضل علي البيت حاجة بسيطة ووصلت وركنت العربية وطلعت وانا متعكنن وكان عندي مواعيد شغل بالليل لغيتها علشان العربية مش هقدر اروح بيها وفي اليوم التالي في الساعة التاسعة صباحا قومت من النوم واتصلت بيهم وعينك ماتشوف الا النور وصلوني بقسم الشكاوي وكلمت المسئول وقولتلة حرام عليكو بتسفحونا في اعار العربيات وقلة الكماليات وبتسرقونا في الصيانة وقطع الغيار كمان معندكوش ضمير في الشغل اللي بتعملوه اجي بالعربية علشان اعمل صيانة دورية وادفع 1200 جنية في تيل وشوية زيوت وفلاتر ومصنعية وبعد كدة معرفش اروح بيتي بالعربية امال لو كنت بعملها في ورشة ميكانيكي كان حصلي اية المهم قاللي لو حضرتك تقدر تجيب لنا العربية واحنا نعمل اللازم وتستلمها في نفس اليوم وكان ردي علية كلمة قبيحة وبعدها قولتلة انا مش هحرك العربية من تحت البيت اما تبعتلي عربية الصيانة المتنقلة اوتبعتلي ونش يشيل العربية لحد المركز وانا معاها ومش هسيبها اللي لما اعرف فيها اية وهخدها وانا واقف واللا ربنا يسامحني في اللي هعملة معاكو بكرة لو متنفذش اللي قولتة المهم قاللي ممكن 10 دقائق واكلم حضرتك تاني قولتله ماشي انا مستني
وفعلا بعد شوية لقيتة اتصل بيا وقاللي عامل الونش هيكلم حضرتك علي الموبايل لوسمحت اديلة العنوان
وفعلا بعد شوية اتصل بيا واديتلة العنوان وجالي ورفعت العربية وركبت معاة وروحنا التوكيل وبعد مادخلت قابلني مدير الاستقبال وقاللي اية المشكلة شرحتلوا اللي حصل وقاللي المفروض حضرتك تحاسب الونش وبعدين نشوف هل العيب اللي حصل ناتج من اعمال الصيانة ولا من حضرتك كررتلة نفس الكلمة القبيحة وصوتي علي وقولتله يعني اجي بالعربية اعمل صيانة دورية اقوم بعد مخلصها ناقلها بالونش دنتوا لو فعلا توكيل محترم من المفروض انتك تعتزرلي وتتاسف علي اللي اصابني من ضرر من اهمال الفنيين عندك وعدم فحص السيارة بعد الاصلاح
المهم الظاهر خاف من كلامي وصوتي العالي لاني كنت في قمة العصبية ودخل العربية الورشة ودخلت معاها وبص الفني عليها بعد ماستدعي المهندس اللي عمل صيانة امبارح واتضح ان الرجلاش كان زيادة والعربية متجربتش
واعتزرولي واخدت العربية ومشيت وبعد شهر بكشف علي مياة الريداتير لقيتها ناقصة شوية صغيرة ففتحت القربة وقولت اذودها لقيت ريحة ولا رائحة المجاري فروحت البنزينة علشان اشوف اية الحكاية لقيت مية الريداتير متغيرتش من ساعة مجبت العربية مع انهم واخدين حقها في صيانة ال40000 علي انهم غيروها ومكتوبة في الفاتورة وعند عمل غسيل للريداتير طلع منه كمية املاح لا حصر لها وقولت ساعتها (حسبي الله ونعم الوكيل) لما تكون التوكيلات اللي في بلدنا بتعمل كدة يبقي الورش اللي برة احسن علي الاقل بنشوف العربية اللي بيتعمل فيها
اسف للاطالة بس حبيت اني اقدم تجربتي مع غبور لعل احدا يستفيد مما حصل لي
اما بالنسبة لتجربتي مع سبيد فسوف اسردها لاحقا واسف مره اخري