عيد مع عربيتك

**maryano** · 26-10-2012 04:43 PM

اولا كل سنه وانتم طيبين و عيد سعيد عليكم باذن الله
و بمناسبه العيد كل واحد يحكيلنا علي ذكريات لعربيته في العيد
يعني عملتها معاه في العيد قبل كدة وعطلت و نكدة عليك ولا تنزل تلاقيها متبهدله من بمب و صواريخ العي ولا بتنزل تلف علي قريبك طول العيد لغايه متصعب عليك العربيه من كتر المشاوير و المطبات و النقر اللي بتخدها
انا فاكر وانا صغير والدي كان عندو عربيه بيجو 504 كانت لازم كل اسبوع تقضي الويك اند عند ميكانيكي كهربائي عفشجي كانت متدلعه يعني المهم بعد صلاه العيد و نزل مش عارف حيزبط ايه عند ميكانيكي (لغايه دلوقتي نفسي اعرف هو ازاي ميكانيكي يفتح في العيد ) و مش حيتاخر المهم انا شبت في والدي و نزلت معاه رحنا لواحد متفرع من شارع شامبيليون عند ابوطارق بتاع الكشري و المهم الشغلانا اللي كانت حتاخد ساعة اعدنا لغايه بعد المغرب لغايه مبقيت كدة كان يوم ممل كنت اعد علي كرسي و بشوف العيال بيلعبو و ابص علي العربيه و اعد ادعي عليهاا و تقريبا ولدي حس بذنب فاكلنا كشري من ابو طارق و كنت اول مرة اكل كشري و من سعتهاا و انا بموت في الكشري يمكن دي الميزة من اليوم دة طبعا روحنا و منزلناش يوميه و العربيه طلعت جدعه معانا مبظتش في العيد بس وقفت من والدي و هو رايح الشغل اول يوم بعد العيد اصيله اصيله يعني
اما لاما كبرت فيه واحد صحبي عندو عربيه لانسر جايبها تقريبا 2008 معتقدش عيد بيها عيدين ورة بعض مرة تتخبط يوم الوقفه و مرة ينزل بعد صلاة العيد متدورش و مرة يخبطو عليه يلاقي ازاز العربيه اتفشفش من طوبه و لغايه من العيد الفات بقي بيركن عربيتو و يغطيها من قبل العيد بيومين و مينزلش بيها لا تالت يوم في العيد و يبرشت علي اخو و اصحابوو الواد اتعقد بصراحة

**misoalex** · 26-10-2012 07:57 PM

ههههههههههههههههههههه ليه كده بس حتقلب علينا المواجع ما هى كتير اوى فمش فاكر منها حاجه غير مره من 4 سنيت تقريبا 2 بمتوسل صينى نزلو تحت عربيتى ال 128
يومها قولت بس حعيد يا عند سمكرى يا فى القسم من منظر الموتوسكل لما اتخبط وطار وخبط فى الرصيف

بس الحمد لله عدت على خير والناس كانت شايفه انى مش انا اللى غلطان لانى كنت ماشى بالراحه وهما جايين يجرو قطعو عليا الطريق

الله يحرق الموتوسكلات الصينى واللى بيأجروها والمصايب اللى بتيجى منها خصوصا فى الاعياد

ومره من سنتين تقريبا قبل الثوره قولت اخرج الاسره فى العيد امشيهم بالعربيه بس ونرجع فقولت ااكلهم جلاتى فى بحرى عند عزه وانا واقف ولسه ححط الجلاتى فى بوقى والاقيلك رتبه حلوه كده من اللى حاطط نسور ونجوم على كتافه وبيخبط على كتفى ومعاه بتاع 4 ظباط ووراهم عساكر يعنى كمين كامل جايلى
قولت بس رخصتى مسحوبه يعنى مسحوبه (عشان الوقوف على البحر ممنوع عندنا ) وانا رخصتى اتسحبت قبل كده تقريبا فى نفس المكان فمتعقد منه
المهم اللواء ده طلع محترم جدا وقاللى ياريت بعد ازنك تاكل الجلاتى فى مكان تانى وبلاش هنا عشان الزحمه والطريق
طلبعا ملحقش يقفل بوقه وانا كانت عربيتى دارت وانا فص ملح وداب من ادامه ومصدقتش نفسى انى الرخص متسحبتش
تقريبا لما لقى معايا الاسره محبش يعكنن علينا فى العيد هههههههههههههههه والله طلع راجل محترم جدا

**Ahmed Nasser** · 26-10-2012 10:22 PM

اللى العيد الصغير اللى قبل اللى فات
بعد ماصليت العيد ولسة مافطرتش ووالدى قالى العربية دى هتفضل معفنة كدة
قولت خلاص هغسلهالك المهم اخت العربية وانا ماشى لقيت اربعة اصحابى جبتهم معايا
وطبعا مش هتلاقى مغسلة فى اليوم دة
وكنا وقتها فى الفيوم طبعا المكان هنا يعتبر ريفى

فكان فى طريق اسمة التعبان من كتر الملفات اللى فية سموه كدة
ودة كان فية بحر وكنت واخد جردل وكنت هغسلها بنفسى
الطريق اساسا ميستحملش سرعة 80
انا كنت ماشى 130
وطبعا لقيت ملف ضيق اوى والمشكلة ان فى نص الملف دة معدى من تحتية ترعة ومعمول كوبرى فوق الترعة دى
فلو خت الملف دة وعديت بالسرعة اللى كنت ماشى بيها
فالكوبرى اللى عامل زى المطب دة كفيل انة يطير العربية متر عن سطح الارض
وكان ساعتها كاوتش وحش وعفشة خلفية وحشة

المهم طرت من على الكوبرى والعربية عامت ونزلت الاراضى الزراعية اللى واطية عن الطريق بمتر
وطبعا كنت واخد كل اللى فى وشى من شجر لطوف معمول على حرف الطريق لغاية كنت هتقلب لما نخلة سندت العربية بس دمرت الشنطة

طبعا جبت جرار زراعى شدنى من اللى كانت العربية فية

والعربية الجنب الشمال كلة ادمر
وكمان العربية خلفت زويا ومن بعدها مش عارف اظبطلها زويا لغلية انهردة

ودة كان اسوء عيد مر عليا على الاطلاق