تقرير عن إستبدال رخصه خليجيه بأخرى

**Dr.cairoky** · 26-10-2012 07:45 PM

السلام عليكم ورحمة الله وبركاته

حبيت أعمل الموضوع ده لأنى كنت دايخ على إجابة السؤال ده وموصلتش لإجابة قاطعه

" هل من الممكن إستبدال الرخصه الإماراتيه " أو أى رخصة قياده لدول من دول مجلس التعاون الخليجى " برخصة بلد أخرى خليجيه "؟؟؟؟؟؟

الإجابة بقى بعد التجربة الشخصية بتاعتى " أه ممكن إستبدالها مباشرة " بس حسب مزاج الضابط بتاع المرور.....!!!!!!!!!!!

أنا كان معايا رخصة قيادة إماراتيه صادره من دبى ....لما جيت هنا المملكة العربية السعودية ....طلعت على مرور الخبر ( المنطقة الشرقية).....وبعد ما وصلت للشباك أدام الضابط بتاع المرور....بقوله لو سمحت معايا رخصه إماراتيه وعاوز أستبدلها برخصة سعودية....قالى محتاجين من حضرتك ( شهادة براءة ذمة ).......!!!

طيب ياعم البيه\ الضابط أجيبها منين دى......قالى تجيبها من دبى....!!!! يحلاوة الموووولد....يا باشا انا سيبت دبى من سنتين اجيبها إزاى دى.....قالى بسيطه......روح دبى هاتها وتعالى.....شوفتوا الموضوع سهل إزاى...فركة كعب يعنى.....

طلعت بره المرور.....ويشاء سبحانه وتعالى...الاقى بره واحد مصرى بيتكلم فى الموبيل....سبحان الله معرفش ايه اللى خلاه يسالنى...يمكن عشان كان شكلى من الصدمه يضحك تقريبا....قالى حضرتك محتاج حاجه......فطبعا رديت عليه وانا مش طايقه قلتله أه مفيش حاجه من هنا بتروح دبى يا بيه.....وبعد ما شرحتله الموضوع قالى بس كده بسييييييييييييييييييييييي ييييييييييطه....

اطلع على مرور الدمام ( برده المنطقه الشرقيه) هتستبدلها وإنت واقف.......بينى وبينكم مخدتش فى بالى يعنى وقلت فتى المصريين بقى وانتوا عارفين......

بعدها بإسبوع بالصدفه رايح مع واحد زميلى الدمام بنجيب حاجات....قالى ما تيجى يبنى ندخل نسأل على الرخصه بتاعتك دى...

المهم دخلت بسأل الضابط بقوله عاوز أستبدل رخصة دبى ممكن...؟؟؟؟؟

قالى اه بس روح اعمل كشف نظر وفصيلة دم وحاجات بسيطه كده..

المهم يعنى بدلت الرخصه فى خلال 30 دقيقه كنت واخد الرخصه السعوديه وماشى والحمد لله

حبيت أعمل الموضوع ده.....يمكن يفيد حد كان عنده نفس السؤال....

**hossam_elwani** · 26-10-2012 08:11 PM

مبروك عليك الرخصه والظاهر نسبيا ان كل الاخوه العرب متساويين فى ذل المواطنين

**omaroof** · 26-10-2012 10:33 PM

الف مبروك عليك
المفروض تتبدل على طول لان الرخصه الاماراتى اعلى رخصه فى الخليج
وكمان فيه اتفاقية مجلس التعاون الخليجى بتدى حرية انك تستخدم فى اى بلد خليجى
وبلنسبه للمقيمين تتبدل

**moh19227** · 27-10-2012 08:08 AM

الف مبروووك
و بالنسبه للرخصه مصري تتحول خليجي " سعودي مثلا " ينفع ولا مبيعترفوش بيها :)

**د.محمود صلاح** · 27-10-2012 09:58 AM

في عمان عندي الرخصة المصري بيتم استبدالها بالعماني شرط مرور سنة من اصدار الرخصة المصري وكشف نظر وخطاب من جهة العمل
-------------------

**SYD** · 27-10-2012 10:39 AM

أخيراااااااااااااً
الف مبروك يا مان
بس كل دة كنت ماشي من غير رخصة ؟؟؟
هبلغ عنك - يدولك مخالفات بأثر رجعي
ههههههههههههه

طب وعلي كدة خلاص راحت رخصة دبي ؟؟؟
ولا دلوقتي معاك الأتنين ؟؟؟
ولا خدوا منك بتاعة دبي ومصر ودفعت فرق ؟؟