الموضوع: اجيب مكنة حلاقة فيليبس ولا براون ؟

حد يدلني يا ناس

أنا عندي براون ... وما بحلقش غير بيها من حوالي سنتين تقريبا

وكان عندي زمان فيلبس بس دي كانت موديل حاجة وسبعين قديمة جدا بس كانت شغالة .. عشان كدة المقارنة لصالح براون طبعا بالنسبة لي

لكن فيلبس منزلة حاجات جديدة تحفة بصراحة ما أقدرش أحكم عليها لأني ما جربتهاش

ميزة المكن الكهرباء إنك ممكن تحلق بيه كل يوم من غير ما تخاف من الإلتهابات اللى بيعملها الموس ..

عيب المكن ده بقى سواء فيلبس أو براون إنه مش بيخلي الدقن ناعم طبعا زي الموس إنما بتبقى نعومته مقبولة جدا خصوصا لو بتحلق كل يوم

الموس بيجيب الشعر حتى لوكان تحت الجلد وبيشيل الجلد اللى فوقيه عشان كدة الموس بيعمل التهابات على طول لو بتحلق كل يوم ونعومته بتكون عالية إنما المكن الكهرباء بيعدي على الشعر اللى بيكون تحت الجلد من غير ما يشيله عشان كدة بيكون نعومته مش زي الموس لكن بيتفادى حتة الإلتهابات

في الأول لو مش متعود عليها هاتحس إنك رميت الفلوس في الأرض لكن بعد فترة من الإستخدام هاتعرف تمشي المكنة إزاي لأن طريقتها مش زي الموس خالص وكل واحد ليه طريقة معينة هو بيكتشفها مع الإستخدام

مش بتحلق الشعر الطويل وليها سلاح لو الشعر طويل بتقصره الأول عشان تعرف تحلقه بعد كدة بالسلاح العادي

عشان كدة برضه هي مثالية للحلاقة اليومية قبل ما الشعر يكون لحق يطلع

طبعا بالنسبة للشعر اللى بيكون تحت الجلد هية بتسيبه زي ما قولنا ... بعد كام يوم بقى الشعر ده بيكون طلع من تحت الجلد وبيكون طويل طبعا وهية مش هاتجيبه عشان كدة يا إما تحلقه بالسلاح بتاعها التاني يا إما بعد تخلص حلاقة كل كام يوم تقوم ممشي الموس بالراحة كدة من بعيد وجايب الشعر ده من سحبة واحدة حنينة وخلاص

الفلبس تجربتي معاه كانت قديمة ومش هاقدر أحكم عليها لكن كانت كويسة برضه أعتقد قعد أحلق بيها لمدة 3 سنوات متواصلة قبل ما تبوظ ... وكانت مركونة أصلا قبل كدة عند الحاج لمدة بتاع عشرين سنة بدون استخدام وبرغم كدة بطاريتها كانت لسة كويسة .. كنت أشحنها وتشتغل بتاع نص ساعة كدة لغاية ما أخلص الحلقة

أعتقد دي خلاصة تجربتي معاها ولو عندك استفسار تاني أنا تحت أمرك