استفسار بخصوص لانسر بومة 2007

**Mahmoudkassem** · 31-10-2012 01:09 AM

بسم الله الرحمن الرحيم السلام عليكم
عندي استفسار بخصوص لانسر بومة 2007 سوبر اكشن فابريكا برة
مفيهاش خدش علي حسب الكلام المبدئي الي وصلني من تاجر سيارات معرفة .. يا ترا تساوي كام علما بان السعر الي قالهولي والنهائي علي كلامة 88000 .. يا ترا السعر دة معقول لموديل السنة دي عموما ولا اوفر علي العربية حتي لو حالتها تمام

**darkangel007** · 31-10-2012 04:16 AM

كتير

**AHMED_DINAMO** · 31-10-2012 05:19 AM

كتيــــــــــــــــــــــ ـــــــــــــــــــــــــ ــــــــــــر ^_^

**Mohamed.Fawzy** · 31-10-2012 10:41 AM

المشاركة الأصلية كتبت بواسطة drmsadek1979

لو ماشية عدد كيلومترات قليل يبقى سعر معقول

+1

الكيلو متر و الحاله .... بتفرق كتيييييييييييير

انا كان جارى بيبيع واحده سوبر اكشن اوتوماتيك 2007 برضه ... و كان طالب فيها 65 الف .... بس مزبله السنين ... و مغيرلها فيتيس ... و حالتها كرب

لو العربيه اللى معروضه على حضرتك ماشيه كيلو متر قليل و مش متهانه ... بص عليها و فاصل معاه على قد ما تقدر برضه

**Mahmoudkassem** · 31-10-2012 02:35 PM

متشكر ليكو خالص .. فاضل اني اشوف العربية واشوف ازا كانت حالتها شازة فعلا ولا كلام تاجر عايز كومشن بتاعة بس من فوق الترابيزة وتحتها
انا هصورها واوصف حالة التجربة ليها بالظبط ليكو علشان تساعدوني في تحديد السعر المناسب اكتر بعد تجربتها والحكم علي حالتها واشوف عاملة كام كيلو ومتناسب لو الكيلو متر قليل مع الحالة العامة ليها ولا لأ .. بس ياريت اخواتي الي قالولي ان سعرها عالي يدوني رنج للسعر يكون اية وشاكر للجميع علي الردود

**M.FOUAD** · 31-10-2012 03:07 PM

سعرها مناسب لو فعلا مش راشة برة بس اشك انها تكون بالمواصفات دية و السعر دة من تاجر لانهم بيطلبوا فيها لو مش راشة برة 95 الف جنية

**Mahmoudkassem** · 31-10-2012 03:28 PM

المشاركة الأصلية كتبت بواسطة m.fouad

سعرها مناسب لو فعلا مش راشة برة بس اشك انها تكون بالمواصفات دية و السعر دة من تاجر لانهم بيطلبوا فيها لو مش راشة برة 95 الف جنية

انا شوفت عضو في المنتدي بيسأل علي سعر واحدة زيها بس راشة رفرفين وبيتكلم في 86000 فلما دي جت قدامي ومن تاجر ! وفبريكا كلها والحالة العامة علي كلامة تحفة ومفيهاش قلم بوية فقولت تبقي كويسة
بس دلوقتي السعر فية ناس بتقول كتير وناس يتقول كويس فأنا متلخبط بصراحة ..
المشكلة وحلها بسيط اني بس كنت قاعد مع التاجر دة امبارح بالليل متأخر نوعا ما ومكنش ينفع انزل صاحبها في وقت مش مناسب كدة وفجأة يفرجني علي العربية .. ان شاء الله هكلمة النهاردة واحدد معاد قريب اشوفها فية بكرة او بعدة وارفع صوها وحالتها هنا بس موضوع السعر دلوقتي فية اراء متضاربة فبصراحة مش قادر احدد موقف

**eldell** · 31-10-2012 04:58 PM

بصراحه كتييييييييييييييييييييييي ر لو بالحاله الى حضرتك بتقولها ديه مش هتزيد عن 82 الف علشان كان معروض عليا واحده 2008 بره وجوه بالكامل قبل مااجيب عربيتى وكانت عامله 20 الف عداد والله مكان فيها خدش وكان طالب 94 الكلام ده من سنه تقريبا ياااريت حضرتك تحاول تنزل معاه فى السعر

**Mahmoudkassem** · 31-10-2012 06:58 PM

المشاركة الأصلية كتبت بواسطة eldell

بصراحه كتييييييييييييييييييييييي ر لو بالحاله الى حضرتك بتقولها ديه مش هتزيد عن 82 الف علشان كان معروض عليا واحده 2008 بره وجوه بالكامل قبل مااجيب عربيتى وكانت عامله 20 الف عداد والله مكان فيها خدش وكان طالب 94 الكلام ده من سنه تقريبا ياااريت حضرتك تحاول تنزل معاه فى السعر

انا سئلتة علي عداد العربية قالي مش متأكد قولتلة رنج سبعين الف مثلا قالي تقريبا في الحدود دي سبعين تمانين كدا يعني مش عداد صغير ولا لقطة في اغلب الأمر يبقي اعتقد انة السعر مرفوع عليا كتير ... يعني !
اعتقد سعرها المناسب لا يزيد عن 84000 مثلا دا ولو حلتها وعدادها مشجعين .. مش كدا بردو ؟