الموضوع: تتصرف ازاي لو جالك شد عضلي

أولا ألف حمدالله على سلامتك والحمد لله إنها جت على قد كده

أولا عشان نكون ماشيين صح يبقى نطبق المقولة اللى بتقول "الوقاية خير من العلاج" تمام

طيب تعالى نشوف إيه هيا أسباب الشد العضلي الشائعة ..

أولا نقص الكالسيوم والبوتاسيم وده بسبب إن الغذاء اليومي مافيهوش إمداد كافي للجسم بالمعدنين دول اللي هما المفتاح الأساسي لعمل العضلات وفي جالة نقص أي منهم بشكل كبير في الجسم يحصل شد عضلي قوي وخاصة في عضلة السمانة لأنها أكتر عضلة في الجسم شغالة في حالة السكون والحركة ...

يبقى أول حاجة نتأكد إن غذاءنا اليومي فيه إمداد كافي من الكالسيوم وده في منتجات الألبان كلها واللبن الحليب ... والبوتاسيوم وده تلاقيه في جاجات كتير أهمها "الموز،الخضروات بأنواعها، البقول،السمك،الفواكه"

ثانيا ممكن يكون الشد العضلي ده بسبب وضع غلط للعضلة لمدة طويلة فبيحصل إن قنوات تصريف حمض اللاكتيك اللي بينتج عن تنفس العضلة ما بتصرفوش وده بيؤدي للشد العضلي وده نوع أخف من اللي بيجي بسبب نقص الكالسيوم والبوتاسيوم ... نفس السبب ده بيشترك معاه إنك تكون لابس حذاء ضيق أو ملابس ضيقة على الفخذين وده بيسبب نقص إمداد العضلة بالدم اللي بيحمل الأكسجين اللازم لعملها فبيحصل نفس اللي بيحصل فوق والنتيجة شد عضلي قوي جدا

والحل الوقائي إننا نلبس حذاء مريح لا يكون ضيق ولا نلبس أي بنطلونات أو ملابس داخلية ضيقة تضغط على الشرايين المارة في الفخذ حتى تسمح بوصول الدم بشكل صحيح للعضلات فلا يحدث شد عضلي والجلوس بوضعية سليمة على مقعد السائق بحيث يكون هناك مسافة بين خلف الركبة ومقعدة الكرسي لا تقل عن 5سم ويكون الظهر على زاوية لا تقل عن 110 درجة وتكون الركبة نصف مثنية "ليست مفرودة بالكامل ولا منثنية بزاوية قائمة"


بالنسبة لعلاج الحالة في وقت حدوثها يكون بالتوقف بشكل آمن خارج حدود الطريق ثم تأمين السيارة والنزول منها ثم تفعل حركة الركوع والركبة مفرودة تماما وتحاول لمس أطراف أصابع قدميك بيديك وتثبت على هذا الوضع حتى يزول الشد العضلي ... وفي الحالات الشديدة جدا والتى غالبا ما تكون نتيجة لنقص الكالسيوم أو البوتاسيوم عليك بشرب كمية مناسبة من اللبن "أي نوع حتى لو رائب أو زبادو" وأيضا أي ثمرة فاكهة ويفضل الموز ...

تحياتي لك وحفظ الله الجميع من كل مكروه

نقطة هامة أخرى ... في حالة القيادة لمسافات طويلة ينصح بالتوقف كل ساعتين قيادة والنزول من السيارة والمشي جانبها أو حولها لمدة 5 دقائق وذلك لتنشيط الدورة الدموية العميقة في شرايين وأوردة الساق وذلك للوقاية من الدوالي وكذلك الشد العضلي ..

معلومات جميلهد
شكرااا للجميع

المشاركة الأصلية كتبت بواسطة hpxp

هيا حصلت معايا الحمد لله في شارع فاضي
اول حاجه عملتها روحت ناطر الفتيس علي n ودايس فرامل بالشمال ويا دوبك وقفت علي ناصيه الشارع الرئيسي
وقلعت الجزمه وقعد ماسك صوابعي شويه لحد اما رجلي فكت بعدها كملت
فعايز اعرف هو الي عملته صح ولا غلط
وايه التصرف الصح الي المفروض يتعمل
وشكرا

متفكرنيش ... لسه جايلى مي يومين و كان الم رهييييب لدرجه ان وش رجلى لف و اتعوج و مكنتش قادر افكه ... و كل اللى قدرت اعمله انى قعدت اقول يا رب ... يارب ... و مكنتش عارف اتنفس من كتر الألم و الله .... و بدأ يروح تدريجى بعد حوالى 20 ثانيه من العذاب

بس عضله السمانه من ساعتها حاسسها تقيله و مشدوده ... و فيها الم على خفيف ... الحمد لله

شكرا ليك انك فتحت الموضوع لأنه موضوع مهم جدااا

المشاركة الأصلية كتبت بواسطة hany63

الله ينور عليك يا دكتور
طب ازاي الواحد يتجنب حدوثه اثناء ممارسة الرياضه عشان الموضوع متكرر و عايش في رعب بسبب ان جالي مزق في السمانه من الدرجه التالته قبل كده و سني 48 سنه و معنديش سكر

الله يكرمك ..

الأول هل حضرتك تم معالجة المزق بشكل صحيح وتم التأكد من الشفاء التام منه قبل الرجوع لممارسة الرياضة؟ النقطة دي هيتحدد عليها حاجات كتير

بإفتراض إن المزق تم معالجته بشكل صحيح وتام فدلوقتي موضوع الشد اللي بيحصل أثناء الرياضة ده ليه أكتر من سبب لكن ممكن نركز على سببين مهمين ...

الأول شرحناه فوق الخاص بالتغذية السليمة وإمداد الجسم بالقدر الكافي من الكالسيوم والبوتاسيوم وفي حالة ممارسة الرياضة فبيكون المطلب ده أهم بكتير قبل التمرين وأثناءه وبعده ...

يعنى نقول مثلا حضرتك وأنت رايح التمرين يكون معاك 3 موزات متوسطة الحجم وناضجة + إما لبن حليب صافي محلى بعسل النحل "يفضل" أو ساندويتاشت صغيرة من الجبن الأبيض خفيف الملح

ويتم تناول موزة قبل التمرين وموزة في منتصف التمرين وموزة بعد التمرين ... ويفضل تناول اللبن أو السانوديتشات قبل التمرين مباشرة... وهذه الخطوة تضمن وجود إمداد مستمر للعضلات من الكالسيوم والبوتاسيوم مما يخرجنا من دائرة الإشتباه في حدوثه نتيجة لنقص أي من هذين المعدنين


الحالة التانية هي تمرينات الإحماء وده اللي بيغفل عنه وبيهمله كتير من ممارسي الرياضة فيبدأون التمرينات مباشرة دون فترة إحماء كافية "سويدي" قبل التمرين مما يسبب عدم قدرة الدورة الدموية على إمداد العضلات بالقدر الكافي من الأكسجين بشكل سريع وتراكم منتوجات تنفس العضلات "حمض اللاكتيك" داخل العضلة وينتج عن ذلك الشد العضلي

وده بيحصل لأن الدورة الدموية في الوضع العادي أثناء السكون أو النشاط العادي اليومي بتكون بطيئة وأغلب الدم المنقول بيكون عن طريق الدورة الدموية السطحية وفايدة السويدي أو تمرينات الإحماء إننا ننشط الدورة الدموية العميقة وزيادة سرعتها فتكون جاهزة للعمل بتناغم مع عمل العضلات القوي أثناء التمرين وتكون قادرة على نقل الأكسجين بشكل سريع وفعال وكافي للعضلة وفي نفس الوقت القدرة على تصريف نواتج عمل العضلة وتنفسها إلى الأوردة بشكل سريع ومستمر


نزيد على ذلك كله ضرورة عمل تحاليل وظائف الكبد والكليتين لأنهم يساهموا بشكل أساسي وكبير في كفاءة عمل الدورة الدموية ككل وقدرة الجسم على التخلص من فضلات تنفس العضلات المشاركة في التمرين وعند وجود أي مشكلة كبيرة في وظائف أيا منهما يجب التوقف عن التمارين حتى معالجة المشكلة الموجودة ...

أتم الله عليكم جميعا الصحة والعافية وتحياتي لك أ.هاني