الموضوع: فكرة لعزل الأرضى من الشقة للمتخصصين فى الكهرباء

بص يا سيدي

نظام الكهرباء في مصر بيستخدم الفردة الميتة ( neutral ) ويستخدمها كأرضي

وكل الشبكة بتكون متوصلة للأرضي


وبكده بيكون أي إتصال بين الفردة الحية ( Line ) وبين أي جسم متصل بالأرض بيقفل الدائرة وبيتعرض للصعق الكهربائي


بره طبعا الكلام مختلف نوعا ما لأن الأرضي غير الفردة الميتة وبيتم توصيل جسم كل جهاز بسلك الأرضي بحيث لو واحد ماسك جسم الجهاز ده وحصل إن جسم الجهاز لمس الفردة الحية يبقى فيه مسارين

1- مسار من جسم الجهاز لجسم الإنسان ثم للأرضي
2- مسار من جسم الجهاز لسلك الأرضي للأرضي

وطبعا مقاومة سلك الأرضي بتكون أقل بكثير من الإنسان فتشيل غالبية تيار الصعق وده يخلي التيار المسحوب كبير ويخلي الأوتوماتيك يفصل






طيب إيه اللي بيحصل لو وصلنا جميع الأجهزة من خلال محول

اللي بيحصل إن الطرف الثاني من المحول ( طرف الخرج ) بيكون منفصل تماااااااااما عن قصة التأريض دي سواء عن طريق الفردة الميتة زي في مصر أو عن طريق السلك الأرضي زي خارج مصر


يعني مش بيكون متصل بشبكة الكهرباء غير عن طريق الطاقة الكهربائية اللي تم نقلها داخل المحول من طرف الدخل لطرف الخرج عن طريق المجال المغناطيسي

وبكده لو واحد واقف على الأرض ومسك طرف واحد فقط من طرفي الخرج مش هيحصله حاجة

وهيتعرض للصعق الكهربائي المميت في حالة واحدة فقط لو مسك طرفين الكهربء بتوع الخرج ( لأنه بكده كأنه وضع نفسه مكان أي جهاز والكهرباء هتمر بقى بصورة طبيعية من خلال جسمه )





طيب هل فيه أفكار أفضل من كده


طبعا !!!!!!! وسهلة جدا




كان زمان فيه جهاز أتوماتيك بيسمى ELCB ومعناه بالإنجليزي Earth Leakage Circuit Breaker وبالعربي جهاز يعمل في حالة وجود تسريب في الأرض

والجهاز ده عبارة عن أتوماتيك بيتحط في لوحة الكهرباء بيه ملف مغناطيسيي وبيتوصل على فردة السلك الأرضي وفي حالة وجود تسريب كهربائي فيها يحس بيه ويفصل دائرة الكهرباء

اللي الناس ما تعرفهوش إن الجهاز ده ما ينفعش يركب في مصر لأن مصر ما فيش فيها نظام السلك الأرضي لكل دائرة ( الفيشه الثلاثية اللي بتشوفها في بعض الأجهزة المستوردة من الخليج )

وفي بلاد بره لقيوا إنه ممكن في حالة سوء توصيل الجهاز بالسلك الأرضي إن الجهاز ما يحسش بالمشكلة وما يفصلش

قوم إيه عملوا أتوماتيك بفكرة أروع من كده

وسموه RCD أو RCBO ومعناه بالإنجليزي Residual Current Device وبالعربي جهاز أتوماتيك يفصل في حالة وجود فرق في التيار


الجهاز ده فكرته عظيمة وحاليا موجود في مصر وممكن تشتريه بسعر الجملة من عند شركة ( جبريل ) اللي في العتبة عن المطافي

هم بيسموه جهاز تسريب أرضي 2 خط ( وده بيتركب داخل لوحة الكهرباء والأتوماتيك رغم إن اسمه 2 خط لكن هو بيستخدم لخط واحد وهم مسمينه بالخطأ لأن بيطلع منه فردتين سلك ) وجهاز تسريب أرضي عمومي 4 خط ( وده بيركب مكان الأتوماتيك الرئيسي في اللوحة )


الأتوماتيك ده بيفصل علطول لو حس بأي فرق بين السلكتين في الدائرة اللي راكب عليها

يعني لا قدر اللي لو موصل جهاز في بيتك وبعدين الجهاز جسمه الخارجي لمس كهرباء وسرب جزء منها في الأرضي ( 30 ملل أمبير تسريب ) الأوتماتيك يفصل علطول

ولو صادف إن طفل مسك جزء كهربي عريان أو جسم جهاز ملمس كهرباء ففيه جزء من الكهرباء هتدخل جوه جسم الطفل وتمشي في مسار تاني غير المسار الطبيعي - الجهاز في ميكرو من الثانية يلاقي إن التيار اللي ماشي في السلك الأول وداخل الجهاز فيه مثلا أمبير واللي راجع من الجهاز فيه أمبير إلا ثلاثين مللي أمبير يفصل علطول



هتلاقي في السوق أنواع معتمدة منها الهاجر الفرنسي والإم إي إم البريطاني والإي بي بي الألماني وفيه اللي متجمع في مصر

المهم يكون مكتوب عليه RCD أو RCBO أو RCCB - سعر الجهاز الخطين حوالي 190 جنيه وتجيبه بحساسية قطع 30 مللي أمبير وللورش بحساسية قطع 100 مللي أمبير وده بيكفي دائرة واحدة مثلا فيش الحمام أو المكيف أو الإنارة في منطقة معينة وهكذا


وما يكونش مكتوب عليه ELCB لأن ده اتمنع خلاص عالميا

أو MCCB أو MCB لأن دول أتوماتيكات ما فيهاش جهاز حساس



ولو اللوحة ما فيهاش مكان ممكن تشتري لوحة من نوع Three Brother ودلوقتي نازلة باسم تاني مش فاكره لكن نوعها وسعرها ممتازين - من عند محل الباشا في نفس المنطقة وتمها في حدود ال 170 جنيه وتجسبيبها 24 خط علشان ترتاح في المستقبل

عفوا للإطالة





.

المشاركة الأصلية كتبت بواسطة gelgel2004

روح يا شيخ الله يباركلك
مركب عند ايرث ليكدج 3 فيزو عامله حربه نحاس

مشكور على الشرح الوافى ..........:ta_clap[1]::ta_clap[1]:

ربنا يبارك في حضرتك ويجازيك خير على ذوقك


في حاجة نسيتها


ممكن تركب أتوماتيك بحساس عمومي على اللوحة كلها بس مش هتلاقي أكتر من 63 أمبير بحساسية 30 مللي

لكن لو الأحمال عندك كتيرة ومحتاج أتوماتيك عمومي 100 أمبير يبقى تجيبه عادي من نوعية mmcb وتجيب الأتوماتيكات الفرعية بحساسات

وطبعا التكلفة هتزيد لكن الأداء هيكون أحسن لأنك في الحالة الأولى أي دائرة أو جهاز كهربي في تلميس هتلاقي اللوحة كلها هتفصل لغاية ما تحدد المشكلة فين

لكن في الحالة التانية الخط اللي بيغذي الجهاز بس هو اللي هيفصل وباقي اللوحة شغالة عادي

تحياتي






.

المشاركة الأصلية كتبت بواسطة Mahmoud Saloum

أنا ليا تعليقين لازم تاخدوا بالكم منهم :

أولا : بالنسبة للمحول isolating transformer ده بيسحب كهربا كتير وبيبوظ معامل القدرة Power factor وهيخليك تدفع كهرباء كتير على الفاضى ده غير ان حجمه هيبقى كبير

ثانيا بالنسبة لأجهزة الحماية طرازات RCCB, RCBO ما ينفعش نهائيا تتركب على العمومى بتاع الشقة وتكون لحماية الافراد يعنى 30mA لأن بالتجربة العملية والمتكررة وجد ان هناك اجهزة كهربية خاصة غسالات الاطباق وغسالات الملابس بيحصل فيها تسرب ارضى وده بتكون قيمته اكبر من 30mA وبالتالى لو انت مركب عمومى عليه حماية ضد التسرب على 30mA هتلاقى انك تيجى تشغل الغسالة كهربة البيت تقطع. لذا لزم التنويه

كلام حضرتك تمام

وعشان كده الأفضل

1- يتم تركيب العمومي MCCB علشان ما يفصلش كل الدوائر لمجرد مشكلة في دائرة واحدة

2- الفرعي للإنارة RCCB بحساسية 100 مللي أمبير

3- الفرعي للغسالات والثلاجة والسخان ومضخة المياه والبرايز والمكيف RCCB بحساسية 30 مللي أمبير وده الكود العالمي حاليا ولو الدائرة الفرعية فصلت يبقى الأفضل إنك تشيل الجهاز اللي عاملك مشكلة وتصلحه لأن المفروض ما يبقاش فيه أي تسريب

4- لو مش قادر تصلحه ومش عاوز فصل كتير يبقى تركب للكل RCCB 100mA

5- تخلي كام واحد MCB ( أتوماتيك عادي من غير حساسية تسريب ) تخليهم احتياطي في اللوحة علشان لو عندك جهاز مسرب لكن بعيد عن متناول الأيدي زي مثلا وحدة إنارة داخلية أو خارجية أو جهاز في ورشة وفيه تسريب لكن مضطر تشغله بحرص ومن غير ما حد يلمسه يبقى توصله على اوتوماتيك عادي - وطبعا قبل ما توصله الكهرباء تحاول بقدر الإمكان تأرضه كويس مع أي ماسورة مياه مرتفعة عن مستوى الإيدين


وأنا هنا بأتكلم عن الكود اللي العالم دلوقتي ماشي عليه - لكن اللي عاوز يمشي بالبركة يبقى يستعين بالله وربنا يسترها على الجميع




المشكلة اللي ممكن تتعرض لها إنك ممكن ما تلاقيش في السوق RCCB فرعي بحساسية 100 مللي أمبير - هتتعب شوية علشان تحصله

لكن اللي بحساسية 30 مللي أمبير هتلاقيه بسهولة




لكن الصراحة موضوع القواطع اللي بيها حساسية ضد التسريب دي فعلا بتخليك إن شاء الله نايم مطمئن على ولادك واللي حواليهم

أنا ساعات بأركب لمواطنين وخصوصا في المدارس هنا - العمومي وحتى الفرعي كلهم قواطع ضد التسريب لكن طبعا العمومي بأخليه 100 مللي أقل شئ وساعات 300 ملي وبيكون زيادة في االإحتياط




.

وحاليا في الإمارات من 2009 بدأت لوحات التوزيع تنزل بقطاعين - قطاع بيه عمومي حساسيته 100 ملل أمبير وقطاع بيه عمومي 30 ملل أمبير واللوحة كلها بها عمومي من غير حساسية وبالإضافة لكده الأحمال اللي فيها تعامل مع المياه زي السخان ومضخة المياه بيركب على دائرتها واحد rcbo تاني ضد التسريب بحساسية 30 ملل ( غير طبعا إنها متوصله على عمومي 30 ملل لكن علشان لو ده فشل في الفصل التاني يفصل )

ومش بيحصل فصل ولا حاجة ولو حصل نشيل الجهاز اللي بيعمل المشكلة ونصلح ويبقى كله تمام - لأن أي جهاز حتى لو غسالة أطباق أو مضخة لو شغالة كويس يبقى فيها ما فيهاش تسريب نهائي أما لو العزل بتاعها سقط مش هتقدر تحجم التسريب وتخليه في حدود آمنة



.