مراية اللوجان إتخبطت، متكسرتش بس بقت سايبة!

**ahmed_m_ashraf** · 02-11-2012 06:55 PM

السلام عليكم ياشباب ورجالة اللوجان، كل عام وأنتم بخير ويارب تكونو قضيتو عيد سعيد جميعا.

طبعا أنا من إسكندرية فياريت إخوانا من لوجاناوية إسكندرية القدام يفيدونا بخبرتهم.

الحمد لله سايس الجراج الله يسامحه قرص علي العمود بالمراية وهي مقفولة، فكانت النتيجة إن المرايه حصلها حاجة غريبة مش عارف تتصلح ولا لأ. هي متكسرتش، شكلها طبيعي وفي مكانها بس المشكله إنها سايبة، يعني بتروح وتيجي ورا وقداء لو فرملت فجأه أو طلعت طلعة سريعة مثلا. واضح إن المشكلة جوه الكف في السوسته مش في الرقبة إللي راكبة في الباب نفسة.

السؤال بقة، هل حد يعرف طريقة أفتح بيها الكف نفسة من غير ما أفك المراية من الباب، هل الكافر الملون ده بيتفك ويبقى قلب الكف ظاهر ولا إيه؟ أكيد فيه طريقة للوصول لقلب الكف وأضن الموضوع ملهوش علاقة بفك المراية من الباب، بس إزاي؟

لو التصليح منفعش، هل في حد جرب المرايات التركي أو أي كان نوعها إللي عند تجار قطع الغيار بره التوكيل؟ أنا أغرف إنها سوداء ومفيهاش مكان للكافر الملون، بس هل لو إترشت هيبات فرق؟ وكمان هل فيها خاصية التسخين أو إزاله الشبورة زي الأصليه؟؟؟؟

هل حد يعرف تاجر إستيراد عنده حاجت اللوجان في إسكندرية؟

وأخيرا، لو إحتجت أروح لحد يفكلي فرش الباب (أنا هحاول أفكه، بس مقلق أكسر كلبس ولا حاجة) مين نضيف في إسكندرية ويكون حد مجربة في لوجان بالتحديد.

ياريت تفيدونا ياجماعة، وبأكد أنا محتاج معلومات من إسكندرية، يعني التوفيقية والكلام ده مش حيفيدني. يعني مثلا أنا أعرف الوشاحي بتاع قطع الغيار الجديدة من بره التوكيل، بس لسه مسألتش عنده. أشكركم مقدما.

**ayman1204** · 03-11-2012 01:13 PM

حصل معايا نفس الكلام وتحس انها باظت ومهروله كدة ( جية واحد صاحبي ودخل صباعه فى السوتسة ومش عارف عمل فيها خلاها نطت تانى لمكانها )
حاول تظبط السوستى بايدك هتلاقيها اتعدلت معاك
+ كف المرايا برضوا لو اتخبطت دوس عليه جامد بايك وهتلاقيها رجعت زى الاول ....

المرايا دى والله العظيم اختراع اختراع اختراع
ولو انها دينماكية
كان زمانى اشتريت بتاع 100 مرايا غيرها

**ahmed_m_ashraf** · 03-11-2012 06:36 PM

الله يطمنك، عايز يوم أكون فاضي بالنهار أجرب. بس ياريت لو حد ليه تجربة مع الموضوع ده يعرفنا عمل إيه برضه. بس هو دخل صباعة منين؟ مفيش مكان كافي أدخل صباعي منه أصلا. إنت تحس إنها طالعة لبره حوالي نصف سنتي كده بس مش أكتر.

وعلى فكره المراية بتتقفل وتفتح عادي بس مقاومة السوسته أقل وأنا بقفلها وبتبقي سايبة وهي مفتوحة، أنا بس لو أعرف إيه إللي إتحرك من مكانة ويترد إزاي، أعتقد ممكن تتحل إن شاء الله.

**maxfirefox** · 03-11-2012 08:42 PM

انا يرضو حصلت معايرجعت عادي زي الاولا ورحت التوكيل راح المهندس جاب بنسه وفتح المرايه علي الاخر وعمل السوسته

**ali_333** · 04-11-2012 12:48 AM

حصلت معاايا وكانت عادية لكن سايبة وقعة شوية على تحت روحت التوكيل بتاع السمكرة قالي لازم تتغير ب 600 تقريبا او 500 حاجة كده

قولت سيبك انت اهي ماشية وشايف بيها عادي زي الفل

الصيانة اللي بعدها مكنش في بالي المراية روحت اعمل صيانة عادي العربية خرجت لقيتهم صلحوها مجانا
يبدو الموضوع بسيط ان شاء الله