لوجان اوتوماتيك والا استب واى ؟

**m_medo** · 04-11-2012 01:30 PM

السلام عليكم يا اخوانى
انا بقالى شهر بادور على عربية اشتريها زيرو فى حدود 80 الف... فى الاول اقتنعت جدا بالبروتون ساجا ولكن بعد زيارة للتوكيل لقيت ان مستقبل قطع غيارها مش مضمون... وطبعا استبعدت لانوس و فيرنا عشان مش بحب كل التاكسيات اللى ماشية جنبى تبقى زى عربيتى (ممكن تسميه نقص لو عايز بس دى وجهة نظري) لحد ما رحت شفت اللوجان عند المصرية وتغاضيت عن بعض الحاجات اللى تنرفز فيها زى مكان الكلاكس وشكل الفتيس الاوتو ومكان مفتاح الباب من الخارج و لمبة الاشارة الموحدة اللى فى التابلوه... بصراحة حسيت ان دى حاجات لا تعيب العربية وانه ممكن الاعتياد عليها... و اليوم اللى كنت رايح اشتري فيه الاوتوماتيك لقيت على المحور فرجينيا جميلة الجميلات (ستيب واى)
سحرتنى بجمالها ولونها الاحمر اللى هياكل منها حتة...... المهم حظى انى وقفت جنبها تحت الدائرى عند الاختناق الشهير اللى فى اخر المحور وسألت صاحبها عنها وقالى انها تحفة ومش عاملة اى مشاكل معاه لكنه صدمنى ان مفيش منها اوتوماتيك .... المهم اجلت الشراء ومش عارف اعمل ايه انا بصراحة وقعت فى الحب لشوشتى بس انا نفسى اركب اوتوماتيك زى ما انا زوجتى متفقين... كمان موتور الستيب واى مش فى قوة اللوجان الاوتوماتيك انا خايف ليكون ضعيف على العربية... انا والله تايه ومش عارف اعمل ايه... وحياة اغلى حاجة عندكم انصحونى اعمل ايه

**amr.elsayed** · 04-11-2012 03:02 PM

جزئية ضعف الماتور دى مش موجودة لكن يبقى ان حضرتك تحدد ما هى السيارة المناسبة
على فكرة فى اختلافات بين العربيتين غير الشكل
زى مثلا الستب واى فيها جنوط اسبور و abs وحامل فى السقف
واللوجان فيها كمبيوتر رحلات وازاز كهربا خلفى وسماعات خلفية وشنطة اكبر بالاضافة للاوتوماتيك

**m_medo** · 04-11-2012 03:08 PM

المشاركة الأصلية كتبت بواسطة amr.elsayed

جزئية ضعف الماتور دى مش موجودة لكن يبقى ان حضرتك تحدد ما هى السيارة المناسبة
على فكرة فى اختلافات بين العربيتين غير الشكل
زى مثلا الستب واى فيها جنوط اسبور و abs وحامل فى السقف
واللوجان فيها كمبيوتر رحلات وازاز كهربا خلفى وسماعات خلفية وشنطة اكبر بالاضافة للاوتوماتيك

شكرا لردك........ انا عارف انى بقارن بين حاجتين مش زى بعض..... وهو ده الصعب صدقنى لأنى فى النهاية لازم اشترى واحدة بس منهم...... انا المشكلة اكتشفت انى معجب بالستيب واى شكلا بس لدرجة انى مش موهوم بحاجة جواها وعشان كدة خايف اضحى بالاوتوماتيك واندم عليه بعد اما اخد اللى انا عايزه من الستب واى..... هما الرجالة كدة

**amr.elsayed** · 04-11-2012 03:18 PM

المشاركة الأصلية كتبت بواسطة m_medo

شكرا لردك........ انا عارف انى بقارن بين حاجتين مش زى بعض..... وهو ده الصعب صدقنى لأنى فى النهاية لازم اشترى واحدة بس منهم...... انا المشكلة اكتشفت انى معجب بالستيب واى شكلا بس لدرجة انى مش موهوم بحاجة جواها وعشان كدة خايف اضحى بالاوتوماتيك واندم عليه بعد اما اخد اللى انا عايزه من الستب واى..... هما الرجالة كدة

هههههههههه
خلاص التوكيل محدد انك ممكن تحجز اربعة

**أبو آسر** · 04-11-2012 03:47 PM

لو عايز شكل ومنظر خليك في الستيب واي
لو عايز موتور وراحة (الفتيس) خليك في اللوجان الأوتوماتيك

**nouranwar** · 04-11-2012 05:15 PM

النهاردة كنت في حيرتك ديه لكن قررت اللوجان علشان اتوماتيك و ده اهم حاجة بالنسبالي و كمان تبترونيك مش اتوماتيك بس و مرايات كهرباء و زجاج خلفي كهرباء
انا معاك الستيب واي شكلها جاحد بالنسبة للوجان لكن قررت اكون عملي و اشتري دماغي من المانيوال اللي مبقاش يناسب مصر

**mrking8** · 04-11-2012 06:43 PM

انا معايا ستيب واى وفعلا سواقتها مريحه جدا وماتورها كل يوم بيتحسن و شنطتها مش صغيره ياجماعه بتاخد عربيه البيبى مستريح والازاز الكهربا الخلفى يتركب بعد 3 سنين والكاسيت البلوتوث ممتع و الحمد لله مفيش مشاكل غير مشكله واحده انها جذابه جدا للرايح واللى جاى واللى بيبقى سايق عربيه زيرو بيبقى خايف عليها من عادم شكمان العربيه اللى قدامه
لكن تخيل انى كل ما اركنها ارجع الاقى كام واحد بيحوم حوليها وعيب تانى الكاوتش بتاعها كونتنال ودى ماركه كويسه لكن نقشته بتلم زلط بالهبل