الموضوع: شكرا نايل موتورز

السلام عليكم ورحمه الله وبركاته


السادة / رئيس مجلس إدارة وأعضاء نايل موتورز الكرام
تحياتى لكم جميعا وأمنياتى الغاليه لكم بالنجاح والتوفيق
لا أجد من الكلمات ما يعبر عن سعادتى الكبيرة وفرحتى الغامرة بتكريمكم الكريم لشخصى المتواضع .
وكذلك لا أستطيع أن أصف لكم إعتزازى الكبير بكونى عضو وواحد من ضمن ألاف فى هذا الصرح الكبير .

وقد تكون مصادفه سعيدة وغريبه بالنسبه لى أن يكون تكريمى بعد إتمامى عامى الرابع هنا كعضو فى نايل موتورز وبداياتى لعامى الخامس معكم وبكم .

أربع سنوات كان المنتدى خير صديق لى بأعضاؤة الكرام
بمواضيعهم ومشاركاتهم
بأحزانهم وأفراحهم
يمكن قضيت معاكم كل المناسبات
فقدان عزيز لدينا
مشاركه فرحه مولود جديد
أو زواج سعيد
او نجاح أو عمل جديد
او ترقيه او سيارة جديدة
أو حتى أى مشاعر من أى نوع .

المنتدى كان هو العائله الكبيرة بالنسبه ليا ، كان هو البيت المفتوح ليا فى كل وقت
أصدقائى وأخواتى هنا دايما جاهزين مستنين ، بس انت اطلب ...... تلاقى
جدعنه تلاقى
رجاله بجد تلاقى
اخوات تلاقى
استشارات تلاقى
أبواب من المعرفه وخبرات متنوعه أكيد هتلاقى .

هنا حاجه غريبه عامله زى الإدمان بس الإدمان الجميل الغير مضر .
تلاقى نفسك تغيب وتغيب بس لازم ترجع وتفتح المنتدى
تطمن على كل الناس وتشوف اخر الأخبار .

تتجول وأنت ماشى فى شارع الإجتماعى
تقعد على جنب فى أى قسم من الأقسام المتخصصه
وتشوف مشاركات الأعضاء وإنحيازهم الكبير لعربياتهم
ومعاهم حق هو كل يوم الواحد بيشترى عربيه .
كل العربيات كويسه بس الموضوع نسبى من كل واحد للتانى .

تاخد لفه فى أحوال الشارع المصرى الحبيب وتشوف مشاركات ومبارزات وإختلافات فى وجهات النظر تصل لحد الخلافات .
أكيد كلنا مصريين وبنحب بلدنا وعاوزنها أحسن بلد فى الدنيا لكن الله يسامحهم بقى اللى كانوا السبب .

رجليك توجعك من كتر اللف على الأقسام مع إن معاك عربيه بس هو دة سلو منتدانا وإنت داخل تركن عربيتك برة يا محترم .
المنتدى خالى من الرصاص والنيكوتين وبيحافظ على البيئه .

تاخد لفتك وترجع تانى شارع الإجتماعى عند المشرف الكبير قوى قرصان الشرق و الغرب الأخ العزيز
عازب المنتدى الأول : شنورى
نشرب شاى وقهوة وكمان ناكل حاجه حلوة
طبعا دة شنورى أبو الكرم .

تلاقى نفسك قعدتلك اربع خمس ساعات يا نهار أبيض
الوقت بيجرى معاكم بسرعه الصوت والضوء والصاروخ .

تقوم تلحق نفسك وتاخد بعضك وتخرج علشان عندك شغل الصبح .

وبرضو مبتحرمش
تيجى بكرة وبعدة من تانى ........

شكرا نايل موتورز